‘Tatago Lena o a Gaugela’

“Tšwelang pele le le ba gaugelago, go etša ge Tatago lena le yena e le yo a gaugelago.”—LUKA 6:36.

1, 2. Mantšu ao Jesu a a boditšego bamangwalo le Bafarisei gotee le balatedi ba gagwe a bontšha bjang gore kgaugelo ke seka se sebotse?

MOLAO wo o neilwego ka Moše o be o e-na le melao le melawana e ka bago e 600. Gaešita le ge go kgomarela Molao wa Moše go be go nyakega, go bontšha kgaugelo le gona go be go le bohlokwa kudu. Ela hloko seo Jesu a se boditšego Bafarisei, bao ba bego ba bonagatša go hloka kgaugelo. O ile a ba sola ka makga a mabedi, a ba bontšha gore Modimo o itše: “Ke nyaka kgaugelo, e sego sehlabelo.” (Mateo 9:10-13; 12:1-7; Hosea 6:6) Go ya bofelong bja bodiredi bja gagwe, Jesu o itše: “Go madimabe lena bamangwalo le Bafarisei, baikaketši! gobane le ntšha sa lesome sa dimela tša minti le dili le kumine, eupša le hlokomologile ditaba tše boima tša Molao, e lego, toka le kgaugelo le potego.”—Mateo 23:23.

² Ka kgonthe, Jesu o be a tšeela kgaugelo godimo. O boditše balatedi ba gagwe gore: “Tšwelang pele le le ba gaugelago, go etša ge Tatago lena le yena e le yo a gaugelago.” (Luka 6:36) Lega go le bjalo, gore re be “baekiši ba Modimo” tabeng ye, re swanetše go tseba seo kgaugelo ya kgonthe e lego sona. (Baefeso 5:1) Go oketša moo, go lemoga mehola ya kgaugelo go tla re tutueletša go bonagatša seka se ka botlalo maphelong a rena.

Go Gaugela Bao ba se Nago sa Bona

3. Ke ka baka la’ng re swanetše go lebelela go Jehofa go bona seo kgaugelo ya kgonthe e lego sona?

³ Mopsalme o opetše ka gore: “Morêna ké yo mabobo le kxauxêlô, wa xo se fêle pelo, wa botho byo boxolo. Morêna ké mo-setša-bohle, kxauxêlô ya xaxwe e ukametše tšohle tše a di dirilexo.” (Psalme 145:8, 9) Jehofa ke “Tate wa dikgaugelo tše bonolo le Modimo wa khomotšo yohle.” (2 Bakorinthe 1:3) Kgaugelo e bonagatšwa ka go swara motho yo mongwe ka tsela e bontšhago kwelobohloko. Se ke sebopego se segolo sa semelo sa Modimo. Mohlala wa gagwe le ditaelo tšeo a re neago tšona di ka re ruta seo kgaugelo ya kgonthe e lego sona.

4. Jesaya 49:15 e re ruta’ng mabapi le kgaugelo?

⁴ Go etša ge go begilwe go Jesaya 49:15, Jehofa o re: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?” Mantšu a Seheberu ao a tswalanago kudu le leo le fetoletšwego mo e le “šôkêlwa” a dirišwa ka go dumelelana le kgaugelo go Psalme 145:8, 9, yeo e tsopotšwego ka mo godimo. Maikwelo ao a tutuetšago Jehofa gore a be le kgaugelo a bapišwa le maikwelo  a borutho ao gantši mma yo a hlokomelago ngwana wa gagwe a bago le ona. Mohlomongwe ngwana o swerwe ke tlala goba go na le selo se sengwe seo a se nyakago. A tutuetšwa ke maikwelo a kwelobohloko goba lešoko ao a bakwago ke se, mma o nea lesea seo le se nyakago. Jehofa o na le maikwelo a bjalo a lerato ka bao a ba gaugelago.

5. Jehofa o ipontšhitše bjang e le “yo a humilego ka kgaugelo” go Baisiraele?

⁵ Go kwela batho bao ba se nago sa bona bohloko ke mo gobotse eupša go dira ka go dumelelana le kwelobohloko yeo bakeng sa go ba thuša ke mo gobotse le go feta. Ela hloko kamoo Jehofa a ilego a arabela ka gona ge barapedi ba gagwe ba be ba le bothopša kua Egipita nywageng e ka bago e 3 500 e fetilego. O boditše Moše gore: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla ka ’baka la baxapeletši ba bôná; ruri, ditlaišêxô tša bôná ke a di tseba. Byale ke tletše tšôna, xore ke ba namolêlê diatleng tša Ba-Egipita, ke ba nthšê naxeng yé, ke ba išê naxeng e botse ye e ahlamexo, ye e êlaxo mafsi le nose.” (Ekisodo 3:7, 8) Mo e ka bago nywaga e 500 ka morago ga ge Baisiraele ba lokolotšwe Egipita, Jehofa o ile a ba gopotša gore: “Ké Nna ke nthšitšexo Isiraele kwa Egipita. Ke Le namoletše diatleng tša Ba-Egipita, le mo diatleng tša mebušô yohle e bexo e Le tlaiša.” (1 Samuele 10:18) Ka baka la go aroga ditekanyetšong tša Modimo tša go loka, Baisiraele ba be ba dula ba le mathateng a šiišago. Lega go le bjalo, Jehofa o ile a ba kwela bohloko gomme o be a ba phološa leboelela. (Baahlodi 2:11-16; 2 Koronika 36:15) Se se bontšha kamoo Modimo yo lerato a arabelago ka gona go bao ba se nago sa bona, bao ba lego kotsing goba mathateng. Jehofa ke “yo a humilego ka kgaugelo.”—Baefeso 2:4.

6. Jesu Kriste o ekišitše Tatagwe bjang tabeng ya go ba le kgaugelo?

⁶ Ge Jesu Kriste a be a le lefaseng, o ile a ekiša Tatagwe ka mo go phethagetšego mabapi le go bonagatša kgaugelo. Jesu o ile a arabela bjang ge banna ba babedi ba difofu ba be ba mo lopa ka gore: “Morena, re gaugele, Morwa wa Dafida”? Ba be ba lopa Jesu gore a dire gore ba bone gape ka mohlolo. Jesu o ile a dira bjalo, eupša ga se a dira mohlolo ka tsela ya go fo phethagatša seo ba mo kgopelago sona. Beibele e re: “Jesu a hlomogile pelo, a kgwatha mahlo a bona, gatee-tee ba bona.” (Mateo 20:30-34) Go hlomoga pelo go ile gwa tutueletša Jesu go dira mehlolo e mentši yeo e ilego ya imolla difofu, bao ba nago le batemona, balephera le batswadi ba bana bao ba babjago.—Mateo 9:27; 15:22; 17:15; Mareka 5:18, 19; Luka 17:12, 13.

7. Mehlala ya Jehofa Modimo le Morwa wa gagwe e re ruta’ng mabapi le kgaugelo?

⁷ Mehlala ya Jehofa Modimo le Jesu Kriste e bontšha gore kgaugelo e na le dibopego tše pedi—kwelobohloko, lešoko, goba bopelo-tlhomogi go batho bao ba se nago sa bona le ditiro tšeo di imollago motho yo a direlwago tšona. Motho o swanetše go ba le dilo tše tše pedi gore a be le kgaugelo. Ka Mangwalong, gantši kgaugelo ke tiro e botho yeo e direlwago bao ba e hlokago. Lega go le bjalo, kgaugelo e bontšhwa bjang kahlolong? Na e bile e akaretša seo se ka lebelelwago e le go se dire selo, bjalo ka go phema go otla?

Go Gaugela Badiradibe

8, 9. Kgaugelo yeo e bontšhitšwego Dafida ka morago ga sebe sa gagwe le Batseba e be e akaretša’ng?

⁸ Ela hloko seo se diregilego ka morago ga ge moporofeta Nathane a boletše le Kgoši Dafida wa Isiraele ya bogologolo mabapi le bootswa bjo Dafida a bo dirilego le Batseba. Dafida yo a itsholago o rapetše ka gore: “Modimo, nthšôkêlwê, ka xobane O yo botho. Mphomolê bosenyi, ka xobane kxauxêlô y’axo ké e kxolo. Napa O nthlatswê molato, O nthseketšê, ke tšwê dibe. Xobane nna, bosenyi bya-ka ke a bo tseba, ’me sebe sa-ka  xa se tloxe pele xa-ka. Ké senyeditše Wêna, Wêna fêla; ke dirile sa xo Xo befêla; ké xôna, O tlo loka, x’O bolêla, O tlo rereša x’O ahlola.”—Psalme 51:1-4.

⁹ Dafida o be a kwele bohloko pelong. Jehofa o ile a lebalela sebe sa gagwe gomme a fokotša kahlolo yeo a bego a tla e nea yena le Batseba. Go ya ka Molao wa Moše, Dafida le Batseba ba be ba swanetše go bolawa. (Doiteronomio 22:22) Gaešita le ge ba ile ba se pheme ditla-morago ka moka tša sebe sa bona, ba ile ba tšwela pele ba phela. (2 Samuele 12:13) Kgaugelo ya Modimo e akaretša go lebalela dibe. Lega go le bjalo, ga a tlogele go nea kotlo e swanetšego.

10. Gaešita le ge Jehofa a ahlola ka tsela e nago le kgaugelo, ke ka baka la’ng re sa swanela go nyatša kgaugelo ya gagwe?

¹⁰ Go etša ge “ka motho o tee [Adama] sebe se tsene lefaseng” e bile “moputso woo sebe se o lefago [e le] lehu,” batho ka moka ba swanelwa ke go hwa. (Baroma 5:12; 6:23) Ruri re ka thaba kudu gore Jehofa o bontšha kgaugelo ge a ahlola! Lega go le bjalo, re swanetše go ba šedi gore re se ke ra nyatša kgaugelo ya Modimo. Doiteronomio 32:4 e re: “’Tsela [tša Jehofa] tšohle di lokile.” Ge a gaugela, Modimo ga a hlokomologe ditekanyetšo tša gagwe tše di phethagetšego tša toka.

11. Jehofa o ile a bontšha bjang kgaugelo e swanetšego ge a be a swaragane le sebe sa Dafida le Batseba?

¹¹ Pele ga ge Dafida le Batseba ba ka fokoletšwa kahlolo ya lehu, go be go swanetše gore sebe sa bona se lebalelwe. Baahlodi ba Baisiraele ba be ba sa dumelelwa go dira se. Ge nkabe ba be ba dumeletšwe go dira bjalo, ba be ba ka se dire dilo ka tsela e nngwe ge e se go ahlolela lehu. Molao o be o nyaka gore go dirwe bjalo. Lega go le bjalo, ka baka la go tšeela godimo kgwerano yeo a bilego le yona le Dafida, Jehofa o be a nyaka go bona ge e ba go ka ba le lebaka la gore a lebalele Dafida sebe sa gagwe. (2 Samuele 7:12-16) Ka baka leo, Jehofa Modimo, “Moahlodi wa lefase ka moka,” yena wa go “fenyêka pelo,” o ile a kgetha go ahlola ka boyena. (Genesi 18:25; 1 Koronika 29:17) Modimo o be a ka kgona go bona ka mo go nepagetšego seo se lego ka pelong ya Dafida, a bona ge e ba boitsholo bjoo e le bja kgonthe gomme a mo lebalela.

12. Batho ba sebe ba ka holwa bjang ke kgaugelo ya Modimo?

¹² Kgaugelo yeo Jehofa a re gaugelago ka yona ka go dira gore go kgonege go lokologa kahlolong ya sebe sa leabela e dumelelana le toka ya gagwe. Bakeng sa go dira gore go lebalela sebe ka ntle le go ba kgahlanong le toka go kgonege, Jehofa o neile sehlabelo sa topollo sa Morwa wa gagwe, Jesu Kriste —e lego pontšho e kgolo kudu ya kgaugelo yeo e kilego ya dirwa. (Mateo 20:28; Baroma 6:22, 23) E le gore re holwe ke kgaugelo ya Modimo, yeo e ka dirago gore re phologe kotlo ya sebe sa leabela, re swanetše ‘go dumela Morwa.’—Johane 3:16, 36.

Modimo wa Kgaugelo le Toka

13, 14. Na kgaugelo ya Modimo e dira gore toko ya gagwe e be e leka-lekanego? Hlalosa.

¹³ Gaešita le ge kgaugelo ya Jehofa e sa lwantšhane le ditekanyetšo tša gagwe tša toka, na e kgoma toka ya gagwe ka tsela e itšego? Na kgaugelo e fokotša tsela yeo toka ya Modimo e bontšhwago ka yona? Aowa, ga e dire bjalo.

¹⁴ Jehofa o boditše Baisiraele a diriša moporofeta Hosea gore: “Ke tlo Xo dira mmeeletšwa wa-ka ka molaô le ka tokô, le ka botho le ka kxauxêlô.” (Hosea 2:19) Mantšu a a bontšha gabotse gore kgaugelo ya Jehofa ka mehla e dumelelana le dika tša gagwe tše dingwe, go akaretša le toka. Jehofa ke “Modimo yo mabobo le kxauxêlô, . . . wa xo lebalêla batho bokxôpô le dikaroxô le dibê; fêla, a se kê a lesa xo ôtla mosenyi.” (Ekisodo 34:6, 7) Jehofa ke Modimo wa kgaugelo le toka. Beibele e bolela ka yena gore: “Ké Yêna Lentšwê, yo tirô-phethexi, ka xe ’tsela tsa’xwe tšohle dì lokile.” (Doiteronomio 32:4) Toka ya Modimo e phethagetše, go etša ge kgaugelo ya gagwe le yona e le bjalo. Ga go se se phalago se sengwe, e bile ga go se se ithekgilego ka se sengwe gore se dire gore go be le teka-tekano. Go e na le moo, dika tše ka bobedi di dirišana ka tsela e phethagetšego.

15, 16. (a) Ke’ng seo se bontšhago gore toka ya Modimo ga se e bogale? (b) Ge Jehofa a phethagatša kahlolo ya gagwe tshepedišong ye e kgopo ya dilo, barapedi ba gagwe ba ka kgonthišega ka’ng?

¹⁵ Toka ya Jehofa ga se e bogale. Mo e ka bago ka mehla, toka e sepedišana le molao gomme kahlolo e nyaka gore bao ba dirilego diphošo ba ahlolwe ka mo go swanetšego. Lega go le bjalo, toka ya Modimo gape e ka akaretša le go phološwa ga bao ba swanelegago. Ka mohlala, ge batho ba kgopo metseng ya Sodoma le Gomora ba be ba fedišwa, mopatriareka Lota le barwedi ba gagwe ba babedi ba ile ba phološwa.—Genesi 19:12-26.

¹⁶ Re ka kgodišega gore ge Jehofa a phethagatša kahlolo ya gagwe tshepedišong ye e kgopo ya dilo, “lešaba le legolo” la barapedi ba therešo, bao ba “[hlatswitšego] dikobo tša bona tše telele ba di šweufatša mading a Kwana,” ba tla phološwa. Ka baka leo, ba tla ‘tšwa masetlapelong a magolo.’—Kutollo 7:9-14.

Ke ka Baka La’ng re Swanetše go Gaugela?

17. Lebaka le motheo la gore re be bagaugedi ke lefe?

¹⁷ Mehlala ya Jehofa le Jesu Kriste ka kgonthe e re ruta seo kgaugelo ya kgonthe e lego sona. Ge e re nea lebaka la motheo la gore le rena re be le kgaugelo, Diema 19:17 e re: “Thlalla-badiidi ó adima Morêna; ’me Yêna ó tlo mmušetša tše a di neilexo bála.” Jehofa o thabela ge re ekiša yena le Morwa wa gagwe ka go gaugelana. (1 Bakorinthe 11:1) Ba  bangwe le bona ba kgothaletšwa go ba le kgaugelo, ka gobane ge re gaugela ba bangwe le bona ba a re gaugela.—Luka 6:38.

18. Ke ka baka la’ng re swanetše go katanela go ba le kgaugelo?

¹⁸ Kgaugelo e bopša ke dika tše dintši kudu tše dibotse. E akaretša lešoko, lerato, botho le bolo. Maikwelo a lerato ao a nago le kwelobohloko goba lešoko ke ona ao a dirago gore go be le kgaugelo. Gaešita le ge go bonagatša ga Modimo kgaugelo go sa fokodiše toka, Jehofa o diega go galefa gomme ka go se fele pelo o nea badira-diphošo nako e lekanego ya gore ba itshole. (2 Petro 3:9, 10) Ka baka leo, kgaugelo e tswalana le go se fele pelo le kgotlelelo. Ka ge e bopša ke dika tše dintši tše dibotse—go akaretša le dibopego tše di fapa-fapanego tša dienywa tša moya wa Modimo—kgaugelo e thuša gore dika tše di kgone go hlagolelwa. (Bagalatia 5:22, 23) Ruri go tloga go le bohlokwa gore re katanele go ba le kgaugelo!

“Go Thaba Bagaugedi”

19, 20. Ke ka tsela efe kgaugelo e hlalalago kahlolong?

¹⁹ Morutiwa Jakobo o re botša lebaka leo ka lona re swanetšego go dira gore kgaugelo e be seka se bohlokwa maphelong a rena. O ngwadile gore: “Kgaugelo e hlalala ka phenyo kahlolong.” (Jakobo 2:13b) Jakobo o be a bolela ka kgaugelo yeo morapedi wa Jehofa a e bontšhago ba bangwe. E hlalala ka phenyo kahlolong ka kgopolo ya gore ge go fihla nako ya gore motho a ‘ikarabele go Modimo,’ Jehofa o ela hloko ditsela tšeo motho yo a ilego a gaugela ka tšona gomme a mo lebalela motheong wa sehlabelo sa topollo sa Morwa wa Gagwe. (Baroma 14:12) Ga go pelaelo gore lebaka le lengwe leo le dirilego gore Dafida a gaugelwe sebe sa gagwe le Batseba ke gore le yena e be e le monna yo a gaugelago. (1 Samuele 24:4-7) Ka lehlakoreng le lengwe, “yo a sa tlwaelego go bontšha kgaugelo o tla ahlolwa ka ntle le kgaugelo.” (Jakobo 2:13a) Ga go makatše ge bao “ba hlokago kgaugelo” ba lokeleditšwe magareng ga batho bao Modimo a bonago ba “swanelwa ke lehu”!—Baroma 1:31, 32.

²⁰ Thutong ya gagwe ya Thabeng, Jesu o itše: “Go thaba bagaugedi, ka ge ba tla bontšhwa kgaugelo.” (Mateo 5:7) Ruri mantšu a a bontšha gabotse ka tsela ya go gatelela gore bao ba tsomago kgaugelo ya Modimo ba swanetše gore le bona ba gaugele! Sehlogo se se latelago se tla ahla-ahla ditsela tšeo ka tšona re ka bonagatšago kgaugelo maphelong a rena a letšatši le letšatši.

O Ithutile’ng?

• Kgaugelo ke’ng?

• Kgaugelo e bonagatšwa ka ditsela dife?

• Jehofa ke Modimo wa kgaugelo le toka ka tsela efe?

• Ke ka baka la’ng re swanetše go ba bao ba gaugelago?

[Dipotšišo tša Thuto]

[Seswantšho go letlakala 21]

Maikwelo a lerato a Jehofa go bao ba hlokago thušo a swana le ao mma a bago le ona ka ngwana wa gagwe

[Seswantšho go letlakala 23]

Mehlolo ya Jesu e re ruta’ng mabapi le kgaugelo?

[Seswantšho go letlakala 24]

Na Jehofa o dirile dilo ka go se dumelelane le toka ya gagwe ge a be a gaugela Dafida?

[Seswantšho go letlakala 25]

Kgaugelo ya Modimo go batho ba sebe e dumelelana le toka ya gagwe