Go Nea ka go Hlalala le ka go tšwa Pelong

GE E le mabapi le go nea, moapostola Paulo o ngwadile gore: “Anke yo mongwe le yo mongwe a dire feela kamoo a phethilego ka gona pelong ya gagwe,” gomme o ile a oketša ka gore: “E sego ka go kgokgona goba ka go gapeletšwa, gobane Modimo o rata monei yo a neago ka go hlalala.” (2 Bakor. 9:7) Jehofa ga a gapeletše motho le ge e le ofe go thekga borapedi bjo bo sekilego. O dumelela bahlanka ba gagwe gore ba bontšhe boineelo bja bona ka go nea ka boithatelo le ka go hlalala. Go theoša le histori, batho ba gagwe ba arabetše ka phišego. Ela hloko mehlala e meraro.

Ka morago ga gore Jehofa a ntšhe Baisiraele Egipita, o ile a laela gore ba age taberenakele. Go be go nyakega ditlabakelo, ka gona Baisiraele ba ile ba kgopelwa gore ba ntšhe meneelo. Ke moka, “mang le mang, wa xo tsošwa ke pelo ya xaxwe” o ile a tliša gauta le silifera, mabenyabje le ditlabakelo tše dingwe. Batho ba ile ba neela ka seatla se se bulegilego kudu moo ba ilego ba kgopelwa gore ba se sa tliša meneelo.—Ek. 35:5, 21; 36:6, 7.

Ge go be go rulaganywa modiro wa go aga tempele nywaga-kgolo ka morago, batho ba Modimo ba ile ba ba le sebaka se sengwe gape  sa go bontšha thekgo ya bona bakeng sa borapedi bjo bo sekilego. Kgoši Dafida o ile a ntšha moneelo o montši bakeng sa go thekga modiro wo gomme a laletša ba bangwe gore ba neele. Ba ile ba dira bjalo ka phišego. Ge o balwa ka tšhelete ya lehono, moneelo wa gauta le silifera feela o be o ka lekana le diranta tše dibilione tše 840. Batho ba ile ba thabela go ntšhetša Jehofa meneelo ya boithatelo.—1 Kor. 29:3-9; 2 Kor. 5:1.

Moya wa go nea ka lethabo o ile wa bontšhwa gape ke balatedi ba pele ba Jesu Kriste. Ka letšatši la Pentekoste ya 33 C.E., batho ba ka bago 3 000 ba ile ba kolobetšwa gomme bontši bja bona e bego e se badudi ba Jerusalema. E le gore ba thuše bao ba bego ba diila gore ba fetše nako e ntšhi ba le Jerusalema gomme ba ithute ka mo go oketšegilego ka tumelo ya bona e mpsha, Bakriste ba ile ba ntšha ka go ithatela meneelo ya nakwana ya tšhelete. Bana babo rena ba ile ba rekiša dithoto tša bona gomme ba tliša tšhelete yeo go baapostola gore ba thuše bao ba bego ba diila. Jehofa o swanetše go ba a ile a thaba gakaakang ge a bona pontšho yeo ya tumelo le lerato!—Dit. 2:41-47.

Lehono Bakriste ba tšwela pele ba thekga borapedi bjo bo sekilego ka go neela ka nako, matla le ditšhelete tša bona ka seatla se se bulegilego le ka go hlalala. Lepokisi le le sepedišanago le sehlogo se le hlalosa ditsela tše dingwe tšeo ka tšona o ka dirago bjalo.

[Lepokisi go letlakala 18, 19]

DITSELA TŠEO KA TŠONA BA BANGWE BA KGETHAGO GO NEA

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising a ngwadilwego “Modiro wa Lefase ka Bophara.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete le yona e ka romelwa ka go lebanya go Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa goba ofising ya lekala ya Dihlatse tša Jehofa yeo e hlankelago naga ya geno. (Meneelo ya boithatelo yeo go bolelwago ka yona dikarolong tše lego ka mo tlase le yona e ka romelwa ofising ya lekala ya Dihlatse tša Jehofa yeo e hlankelago naga ya geno.) Ditšheke tšeo di romelwago atereseng yeo e lego ka mo godimo di swanetše go dirwa gore di lefelelwe go “Watch Tower Society.” Go ka neelwa gape le ka mabenyabje goba dilo tše dingwe tša bohlokwa. Ka morago go moo, lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo yeo.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo (Inšuranse): Watch Tower Bible and Tract Society of South Africa e ka ngwadišwa e le mojabohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le Di-Bond: Di-Stock le di-bond di ka neelwa go Watch Tower Bible and Tract Society of South Africa e le mpho e neelwago ka go lebanya goba Watch Tower Bible and Tract Society of South Africa e ka ngwadišwa e le Mojabohwa wa Dithoto ka morago ga lehu la mong wa tšona.

Mafelo Ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikgokaganye le ofisi ya lekala ya nageng ya geno pele o fetiša lefelo le ge e le lefe leo e lego thoto.

Dikeno: Dithoto goba tšhelete di ka tlogelelwa Watch Tower Bible and Tract Society of South Africa e le bohwa ka go diriša keno yeo e dirilwego ka molao.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba wa ikgokaganya le ofisi ya lekala ya Dihlatse tša Jehofa yeo e hlankelago naga ya geno.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Mogala: 011 761 1000