Hlompha Lenyalo ka ge e le Mpho e Tšwago go Modimo

“Ke ka baka leo monna a tlago go tlogela tatagwe le mmagwe, a kgomarela mosadi wa gagwe gomme bona e tla ba nama e tee.”—GEN. 2:24.

1. Ke ka baka la’ng Jehofa a swanelwa ke gore re mo hlomphe?

RURI Jehofa Modimo o swanelwa ke gore re mo hlomphe ka ge e le Mothomi wa lenyalo. Ka ge e le Mmopi, Mmuši wa legohle le Tatago rena wa legodimong, o hlaloswa ka mo go swanetšego gore ke Monei wa “mpho e nngwe le e nngwe e botse.” (Jak. 1:17; Kut. 4:11) Ye ke pontšho ya lerato la gagwe le legolo. (1 Joh. 4:8) Dilo ka moka tšeo a re rutilego tšona, dilo ka moka tšeo a re kgopetšego tšona le dilo ka moka tšeo a re neilego tšona ke tša go re hola.—Jes. 48:17.

2. Jehofa o neile banyalani ba mathomo ditaelo dife?

² Beibele e hlalosa lenyalo e le e nngwe ya dimpho tše ‘dibotse’ tše di tšwago go Modimo. (Ruthe 1:9; 2:12) Ge Jehofa a be a nyadiša banyalani ba mathomo, Adama le Efa, o ba neile ditaelo tšeo di tlago go dira gore ba atlege. (Bala Mateo 19:4-6.) Ge nkabe ba ile ba latela tlhahlo ya Modimo, ba be ba tla dula ba thabile. Lega go le bjalo, ka bošilo ba ile ba nyatša taelo ya Modimo gomme ba lebeletšana le ditlamorago tše šoro.—Gen. 3:6-13, 16-19, 23.

3, 4. (a) Batho ba bantši lehono ba hlompholla bjang lenyalo gotee le Jehofa Modimo? (b) Re tla ahlaahla mehlala efe sehlogong se?

³ Go swana le banyalani bao ba mathomo, batho ba bantši lehono ba dira diphetho tša lenyalo ba se na taba le tlhahlo ya Jehofa. Ba bangwe ga ba nyake le go kwa selo ka lenyalo, mola ba bangwe ba leka go le hlalosa ka tsela yeo e dumelelanago le dikganyogo tša bona. (Baroma 1:24-32; 2 Tim. 3:1-5) Ba hlokomologa taba ya gore lenyalo ke mpho e tšwago go Modimo gomme ka go hlompholla mpho yeo, ba hlompholla le Monei wa yona, Jehofa Modimo.

⁴ Ka dinako tše dingwe, gaešita le ba bangwe ba bahlanka ba Modimo ba lahlegelwa ke pono e nepagetšego yeo Jehofa a nago le yona ka lenyalo. Banyalani ba bangwe ba Bakriste ba dira phetho ya go arogana goba go hlalana ntle le mabaka ao a theilwego Mangwalong. Se se ka phengwa bjang? Tlhahlo ya Modimo yeo e lego go Genesi 2:24 e ka thuša bjang banyalani ba Bakriste go matlafatša lenyalo la bona? Le gona, bao ba naganago ka go nyala goba go nyalwa ba ka itokišetša bjang go tsena lenyalong? Anke re boneng manyalo a mararo ao a ilego a atlega mehleng ya Beibele ao a bontšhago kamoo go hlompha Jehofa e lego selo sa bohlokwa seo se dirago gore lenyalo le atlege.

Dula o Botega

5, 6. Ke boemo bofe bjo mohlomongwe bo ilego bja leka Sakaria le Elisabetha, gona potego ya bona e ile ya putswa bjang?

⁵ Sakaria le Elisabetha ba be ba dira dilo tše dibotse. Bobedi bja bona ba be ba rata dilo tša moya. Sakaria yo a botegago o ile a phetha mediro ya gagwe ya boperisita gomme bobedi bja bona ba be ba boloka Molao wa Modimo kamoo ba bego ba ka kgona ka gona. Ruri ba be ba na le mabaka a mantši a go thaba. Lega go le bjalo, ge o be o ka etela lapa la bona kua Juda, kapejana o be o tla lemoga gore go na le selo seo se sego gona. Ba be ba se na bana. Elisabetha e be e le moopa gomme bobedi bja bona ba be ba tšofetše.—Luka 1:5-7.

⁶ Isiraeleng ya bogologolo, go belega bana go  be go tšeelwa godimo kudu gomme batho ba be ba eba le malapa a magolo. (1 Sam. 1:2, 6, 10; Ps. 128:3, 4) Ka nako yeo, monna wa Moisiraele o be a ka loga maano a go hlala mosadi wa gagwe ge a be a sa mmelegele bana. Lega go le bjalo, Sakaria o ile a dula a botegela Elisabetha. Ga se a ka a nyaka go ngwega lenyalong, le mosadi wa gagwe ga se a ka a nyaka go dira bjalo. Gaešita le ge ba be ba nyamišwa ke go se be le bana, ba ile ba dula ba hlankela Jehofa ka potego ba le gotee. Jehofa o ile a ba putsa ka go dira mohlolo wa gore ba belege morwa botšofading bja bona.—Luka 1:8-14.

7. Elisabetha o ile a bontšha ka tsela efe e nngwe gore o botegela monna wa gagwe?

⁷ Elisabetha o ile a bontšha potego e kgahlišago ka tsela e nngwe gape. Ge morwa wa gagwe Johane a be a belegwa, Sakaria o be a sa kgone go bolela ka ge a ile a otlwa ka go ba semumu ka baka la go belaela seo morongwa wa Modimo a bego a mmotša sona. Lega go le bjalo, go ka direga gore Sakaria o ile a bolela le mosadi wa gagwe ka tsela e nngwe a mmotša gore morongwa wa Jehofa o mmoditše gore ngwana ba mmitše “Johane.” Baagišani le ba leloko ba be ba nyaka go reelela mošemane yo ka tatagwe. Eupša Elisabetha o ile a botegela taelo ya monna wa gagwe. O itše: “Aowaowaa! O tla bitšwa Johane.”—Luka 1:59-63.

8, 9. (a) Go botegelana go matlafatša bjang lenyalo? (b) Monna le mosadi ba ka bontšha ka ditsela dife gore ba a botegelana?

⁸ Go swana le Sakaria le Elisabetha, banyalani lehono ba lebeletšana le manyami le ditlhohlo tše dingwe. Ge banyalani ba sa botegelane, lenyalo la bona le ka se atlege. Go bapala ka maikwelo a lerato, go bogela diswantšho tše di kgothaletšago bootswa, bohlotlolo le dilo tše dingwe tše di beago lenyalo kotsing di ka dira gore banyalani ba se sa hlwa ba botegelana. Le gona, ge banyalani ba thoma go se sa botegelana, lerato le lona le thoma go fola. Ka tsela e itšego, potego e swana le legora leo le ageleditšego lapa leo le dirago gore go se tsene mang le mang ka lapeng gomme seo sa dira gore lapa le ikwe le šireletšegile. Ka gona, ge monna le mosadi ba botegelana, ba ka dula gotee ka tšhireletšego gomme ba ntšhetšana sa mafahleng, seo sa dira gore lerato la bona le tuke. Ee, potego ke ya bohlokwa.

⁹ Jehofa o boditše Adama gore: “Monna [o tla] tlogela tatagwe le mmagwe, a kgomarela mosadi wa gagwe.” (Gen. 2:24) Seo se bolela’ng? Tswalano yeo motho a bego a na le yona le bagwera le ba leloko e swanetše go fokotšega. Monna goba mosadi o swanetše go fetša nako e ntši a na le molekane wa gagwe le go mo hlokomela. Ba ka se sa hlwa ba fetša nako e ntši ba na le bagwera le ba leloko gomme ba hlokomologa lenyalo la bona le lefsa, e bile banyalani ga se ba swanela go dumelela batswadi ba bona ba tsenatsenana le diphetho tša bona tša lapa goba dithulano tša bona. Ga bjale banyalani ba swanetše go kgomarelana. Yeo ke tlhahlo ya Modimo.

10. Banyalani ba ka thušwa ke’ng go hlagolela potego?

¹⁰ Gaešita le malapeng ao a sego bodumeding botee, potego e na le meputso. Kgaetšedi yo mongwe yoo monna wa gagwe e sego modumedi o re: “Ke leboga Jehofa ge a nthutile kamoo nka ikokobeletšago monna wa ka le go mo hlompha ka mo go tseneletšego. Go dula ke botega go dirile gore re ratane le go hlomphana ka nywaga e 47.” (1 Bakor. 7:10, 11; 1 Pet. 3:1, 2) Katanela go dira gore molekane wa gago a ikwe a šireletšegile. Ka mantšu le ka ditiro, tsoma ditsela tša go kgonthišetša molekane wa gago gore o mo rata go feta batho ka moka mo lefaseng. Go ba go fihla moo o ka kgonago, o se ke wa dumelela motho goba selo le ge e le sefe se go aroganya le molekane wa gago. (Bala Diema 5:15-20.) Ron le Jeannette, bao ba bego ba dutše ba thabile lenyalong ka nywaga ya ka godimo ga e 35, o re: “Ka ge ka potego re dira seo Modimo a se nyakago go rena, re thabile e bile le lenyalo la rena le a atlega.”

Botee bo Matlafatša Lenyalo

11, 12. Akhwila le Perisila ba be ba dirišana bjang (a) ka gae, (b) modirong wa bona wa boiphedišo le (c) bodireding bja Bokriste?

¹¹ Ge moapostola Paulo a be a bolela ka bagwera ba gagwe ba paale e lego Akhwila le Perisila,  ga se a ka a bolela ka yo mongwe wa bona a tlogela yo mongwe. Banyalani ba bao ba nago le botee ke mohlala o mobotse wa seo Modimo a bego a se bolela ge a be a re monna le mosadi ba swanetše go ba “nama e tee.” (Gen. 2:24) Ka mehla ba be ba šoma gotee lapeng la bona, modirong wa bona wa boiphedišo le bodireding bja Bokriste. Ka mohlala, ge Paulo a be a eya Korinthe ka lekga la mathomo, Akhwila le Perisila ba ile ba mo amogela ka botho lapeng la bona, moo a ilego a feleletša a dula gona ge a phetha mediro ya gagwe. Ka morago ge ba le Efeso, ba ile ba diriša lapa la bona go swarela diboka tša phuthego gomme ba šoma gotee go thuša bao ba sa tšwago go thoma go kopanela gore ba gole moyeng, go swana le ge ba thušitše Apollo. (Dit. 18:2, 18-26) Ke moka, banyalani ba bao ba fišegago ba ile ba ya Roma, moo le gona go ilego gwa swarelwa diboka tša phuthego ka lapeng la bona. Ka morago ba ile ba boela Efeso gomme ba matlafatša bana babo bona.—Baroma 16:3-5.

¹² Akhwila le Perisila ba ile ba ba ba fetša nako e itšego ba šoma le Paulo modirong woo ba bego ba iphediša ka wona, modiro wa go dira ditente. Le mo nakong ye, go bolelwa ka banyalani ba ba šoma gotee, ba dirišana ntle le moya wa phenkgišano goba tshele. (Dit. 18:3) Lega go le bjalo, ga go pelaelo gore nako yeo ba e feditšego ba le gotee medirong ya Bokriste ke yona e dirilego gore lenyalo la bona le tie. Go sa šetšwe gore ba be ba le Korinthe, Efeso goba Roma, ba be ba tsebja kudu e le “badirišani . . . go Kriste Jesu.” (Baroma 16:3) Ba be ba šoma gotee go tšwetša pele modiro wa go bolela ka Mmušo kae le kae moo ba bego ba hlankela gona.

13, 14. (a) Ke maemo afe ao a ka dirago gore go se ke gwa ba le botee lenyalong? (b) Ke dilo dife tšeo banyalani ba ka di dirago gore ba matlafatše tlemo ya bona bjalo ka “nama e tee”?

¹³ Ke therešo gore lenyalo le a matlafala ge banyalani ba dira diphetho le mediro e mengwe ba le gotee. (Mmo. 4:9, 10) Ka maswabi, banyalani ba bantši lehono ba fetša nako e nyenyane ba le gotee. Ba šoma diiri tše dintši mešomong ya bona e sa swanego. Ba bangwe ba sepela maeto a matelele ba eya mošomong goba ba hudugela dinageng tše dingwe ba le noši gore ba romele tšhelete gae. Gaešita le ge ba le gae, banyalani ba bangwe ba ikhwetša ba aroganywa ke nako yeo ba e fetšago ba bogetše thelebišene, ba dira dilo tšeo ba di ratago, dipapadi, ba bapala dipapadi tša bidio goba ba fetleka Inthanete. Na go bjalo le ka lapeng la lena? Ge e ba go le bjalo, na le ka fetoša maemo a lena gore le fetše nako e teletšana le le gotee? Go thwe’ng ka go dira mediro e tlwaelegilego le le gotee, bjalo ka go apea, go hlatswa dibjana goba go hlagola serapana? Na le ka šoma gotee go hlokomeleng bana goba go thušeng batswadi ba lena bao ba tšofalago?

¹⁴ Sa bohlokwa le go feta, ka mehla šomang gotee medirong yeo e tswalanago le borapedi bja lena go Jehofa. Go hlahloba temana ya letšatši le le gotee le go ba le borapedi bja lapa go le nea dibaka tše dibotse kudu tša go dira gore lapa le nagane le go ba le dipakane tše di swanago. Le gona, sepelang gotee go ya bodireding. Ge e ba go kgonega, lekang go bula madibogo gotee, gaešita le ge maemo a lena a ka le dumelela go bo tšea ka kgwedi e tee goba gatee mo ngwageng. (Bala 1 Bakorinthe 15:58.) Kgaetšedi yo mongwe yoo a bego a bula madibogo le monna wa gagwe o re: “Go ba bodireding e be e le tsela e  nngwe ya go fetša nako re le gotee gomme poledišano ya rena e be e tloga e tsenelela. Ka ge ka moka ga rena re be re na le pakane e tee ya go thuša ba bangwe ka dilo tša moya, ke ile ka kwa gore ruri re ngatana e tee. Ke ile ka kwa ke le kgauswi le monna wa ka e bile e le mogwera wa ka.” Ge o šoma gotee le molekane wa gago medirong e bohlokwa, ganyenyane-ganyenyane dikgahlego tša lena, dilo tšeo le di etišago pele le mekgwa ya lena di tla swana go ba go fihla ge le nagana le go ikwa le le “nama e tee,” go swana le Akhwila le Perisila.

Dumelela Dilo tša Moya Gore di go Hlahle

15. Ke’ng seo se dirago gore lenyalo le atlege? Hlalosa

¹⁵ Jesu o be a tseba gore go etiša Modimo pele lenyalong go bohlokwa. O bone ge Jehofa a be a nyadiša batho ba mathomo. O bone tsela yeo Adama le Efa ba bego ba thabile ka yona ge ba be ba latela tlhahlo ya Modimo gomme a bona le mathata ao a bilego gona ge ba be ba thoma go e hlokomologa. Ka gona, ge Jesu a be a ruta ba bangwe o ile a bolela se se sepedišanago le taelo ya Tatagwe yeo e hwetšwago go Genesi 2:24. O ile a ba a oketša ka gore: “Se Modimo a se tlemagantšego jokong go se be le motho yo a se aroganyago.” (Mat. 19:6) Ka gona, go hlompha Jehofa ka mo go tseneletšego e sa dutše e le selo sa bohlokwa kudu seo se tla dirago gore lenyalo e be le le thabilego le go atlega. Batswadi ba Jesu ba mo lefaseng e lego Josefa le Maria ba bea mohlala o mobotse kudu tabeng ye.

16. Josefa le Maria ba bontšhitše bjang gore ke batho ba moya bophelong bja bona bja lapa?

¹⁶ Josefa o be a swara Maria ka botho le ka tlhompho. Ge a be a thoma go kwa gore ke moimana, o be a ikemišeditše go mo swara ka botho, gaešita le ge morongwa wa Modimo a be a se a hlwa a mo hlalosetša seo se diragaletšego Maria. (Mat. 1:18-20) Bobedi bja bona ba be ba ekwa ditaelo tša Kesara gomme ba kgomarela ka go tia Molaong wa Moše. (Luka 2:1-5, 21, 22) Le ge e be e le banna bao ba bego ba gapeletšega go ba gona menyanyeng e megolo ya bodumedi kua Jerusalema, Josefa le Maria gotee le ditho tša malapa a bona ba be ba eba gona ngwaga le ngwaga. (Doit. 16:16; Luka 2:41) Ge batho ba ba babedi ba be ba dira mediro ye go akaretša le e mengwe, ba be ba katanela go kgahliša Jehofa le go bontšha tlhompho e tseneletšego ya dilo tša moya. Ga go makatše ge Jehofa a kgethile bona gore ba hlokomele Morwa wa gagwe nakong ya ge Jesu e be e sa le ngwana mo lefaseng.

17, 18. (a) Ke ka ditsela dife balekane ba ka etišago dilo tša moya pele lapeng la bona? (b) Se se tla ba hola bjang?

¹⁷ Na lapa la lena le lona le hlahlwa ke dilo tša moya? Ka mohlala, ge le dira diphetho tše bohlokwa, na le thoma ka go dira nyakišišo melaong ya motheo ya Beibele, la rapela ka taba yeo gomme la tsoma keletšo ya Mokriste yo a godilego ka tsebo? Goba na le fo rarolla mathata ka go dumelelana le seo lena le se naganago goba seo se naganwago ke ba leloko le bagwera? Na le katanela go diriša ditšhišinyo tše dintši tše di šomago tša mabapi le lenyalo le bophelo bja lapa tšeo di gatišitšwego ke mohlanka yo a botegago? Goba na le ikhwetša le šetše le latela meetlo ya lefelong leo goba keletšo yeo e newago ke batho ba bantši? Na ka mehla le a rapela le go ithuta gotee, le ipeela dipakane tša moya le go bolela ka dilo tšeo le di etišago pele lapeng la lena?

¹⁸ Ge Ray a bolela ka go fetša ga bona nywaga e 50 ba thabile lenyalong o re: “Ga go na bothata bjo re bilego le bjona bjo re sa kago ra kgona go bo fenya, ka gobane re be re dirile Jehofa gore e be karolo ya ‘thapo ya rena ya melogo e meraro’.” (Bala Mmoledi 4:12.) Danny le Trina ba dumelelana le se. Ba re: “Ge re dutše re hlankela  Jehofa gotee, lenyalo la rena le ile la matlafala.” Ba na le nywaga e fetago e 34 ba thabile lenyalong. Ge ka mehla le etiša Jehofa pele lenyalong la lena, o tla le thuša go atlega e bile o tla le šegofatša kudu.—Ps. 127:1.

Tšwela Pele o Hlompha Mpho ya Modimo

19. Ke ka baka la’ng Modimo a ile a re nea mpho ya lenyalo?

¹⁹ Batho ba bantši lehono ba tshwenyegile feela ka go ipona ba thabile. Eupša mohlanka wa Jehofa ga a lebelele dilo ka tsela yeo. O a tseba gore Modimo o re neile lenyalo e le mpho gore a phethagatše morero wa Gagwe. (Gen. 1:26-28) Ge nkabe Adama le Efa ba ile ba hlompha mpho yeo, nkabe lefase ka moka e le paradeise yeo e tletšego ka bahlanka ba Modimo ba ba thabilego le ba go loka.

20, 21. (a) Ke ka baka la’ng re swanetše go tšea lenyalo e le le lekgethwa? (b) Ke mpho efe yeo re tla ithutago ka yona bekeng e tlago?

²⁰ Go feta tšohle, bahlanka ba Modimo ba lebelela lenyalo e le sebaka sa go tagafatša Jehofa. (Bala 1 Bakorinthe 10:31.) Bjalo ka ge re bone, Jehofa o kgahlwa ke potego, botee le go mo etiša pele lenyalong gomme seo se tiiša lenyalo. Ka gona, go sa šetšwe gore re lokišetša go tsena lenyalong goba go le tiiša goba re leka go šireletša lenyalo la rena, re swanetše gore sa pele re kwešiše seo ge e le gabotse lenyalo e lego sona: ke tswalano e kgethwa e hlomilwego ke Modimo. Go dula re gopola therešo yeo go tla re tutueletša go dira sohle seo re ka se kgonago gore re dire diphetho tša lenyalo tše di theilwego Lentšung la Modimo. Ka go dira bjalo, re bontšha gore re hlompha mpho ya lenyalo le Monei wa yona, Jehofa Modimo.

²¹ Go ba gona, ga se lenyalo feela leo Jehofa a re neilego lona e le mpho e bile ga se lona feela le tlišago lethabo bophelong. Sehlogong sa rena se se latelago, re tla hlahloba mpho e nngwe gape yeo Modimo a e neago—mpho ya go se be lenyalong.

O be o tla Araba Bjang?

• Potego e swanetše go kgoma bjang Bakriste bao ba lego lenyalong?

• Ke ka baka la’ng lenyalo le matlafatšwa ke go šoma gotee ka kwano?

• Batho bao ba lego lenyalong ba ka dumelela go hlahlwa ke dilo tša moya ka ditsela dife?

• Re ka bontšha bjang gore re hlompha Jehofa, Mothomi wa lenyalo?

[Dipotšišo tša Thuto]

[Diswantšho go letlakala 15]

Go šoma gotee go thuša banyalani gore ba dule ba le ngatana e tee