Leina le le Lego Moeding

ST. MORITZ. Na o tlwaelane le leina leo? Go ka direga gore o tlwaelane le lona ka gobane ke lefelo le le tumilego lefaseng leo batho ba yago go lona bakeng sa maikhutšo Moeding wa Engadine kua Switzerland. Eupša St. Moritz ke lefelo leo le gogetšego batho moeding wo o kgahlišago wo o lego Dithabeng tšeo di khupeditšwego ke lehlwa ka borwabohlabela bja Switzerland kgauswi le mollwane wa Italy. E bile ke moo go nago le Serapa sa Diphoofolo sa Switzerland, moo bobotse bja tlhago bja lefelo le gotee le dimela le diphoofolo tša lona tša mehutahuta di retago Mmopi wa rena yo Mogolo, Jehofa. (Ps. 148:7-10) Go bjalo le ka mašaledi a setšo sa batho bao ba phetšego magareng ga ngwagakgolo wa bo-17.

Go na le selo se se kgahlišago se se sa tlwaelegago dintlong tše dintši tše di lego moeding wo. Gantši o tla bona leina la Modimo le ngwadilwe lehlakoreng la ka pele la dintlo, kudukudu ka godimo ga mojako wa ka pele. Nywagakgolong e fetilego,  gantši go be go kgabišwa bokantle bja dintlo ka mengwalo, e ka ba ka go penta leboto, go gwaya leboto leo le poleisetetšwego goba ka go betla leswika. Seswantšho se o se bonago ka mo tlase ke sa ntlo yeo e lego motseng wa Bever. Phetolelo ya mongwalo wo e re: “Ntlo ye e agilwe ka 1715. Jehofa ke wa mathomo e bile Jehofa ke wa mafelelo. Dilo ka moka di a kgonega ka Modimo.” Leina la Modimo le tšwelela gabedi leswaong le la kgale.

Le gona go na le mongwalo wa kgale kudu motseng wa Madulain wo o bontšhitšwego ka mo tlase. Mongwalo wo o re: “Psalme 127. Ge ntlo e sa agwe ke Jehofa, Ke ga lefeela ge baagi ba yona ba šomile ka thata go e aga. Lucius Rumedius. E agilwe ka 1654.”

Ke ka baka la’ng leina la Modimo le bewa phatlalatša ka tsela ye moeding wo? Morago kua mehleng ya Mpshafatšo, Beibele e ile ya gatišwa ka se-Romansh, e lego leleme leo le theilwego go Selatine leo le bolelwago kua Engadine. Ge e le gabotse, e bile puku ya mathomo yeo e ilego ya fetolelwa ka leleme leo. Ka ge batho ba bantši ba lefelong leo ba be ba tutueditšwe ke seo ba se badilego Lentšung la Modimo, ka ntle ga dintlo tša bona ba ile ba ngwala maina a bona le ditsopolo tše di tšwago ka Beibeleng tšeo di bego di akaretša leina la Modimo.

Ee, go ba go fihla le lehono, mengwalo ye e sa dutše e tsebatša leina la Jehofa le go mo tumiša gaešita le ge go fetile nywagakgolo e mentši e ngwadilwe dintlong tše. Baeng le badudi ba moeding wo ba sa dutše ba ka ithuta mo go oketšegilego ka Modimo yo a kgahlišago, Jehofa, ka go etela o mongwe wa meago yeo e godišago leina la gagwe—Holo ya Mmušo ya Dihlatse tša Jehofa yeo e lego kua Bever.

[Mothopo wa Seswantšho go letlakala 7]

© Stähli Rolf A/age fotostock