Dipotšišo tše Tšwago go Babadi

Ge Jesu Kriste a be a roma baapostola ba 12 go yo dira boboledi, na o ile a ba botša gore ba sware mahlotlo le go rwala diramphašane?

Ba bangwe ba bolela gore dipego tše tharo tša Ebangedi tšeo di bolelago ka Jesu ge a roma baapostola ba gagwe di a ganetšana. Lega go le bjalo, re ka kgona go fihlelela phetho e kgahlišago ge re ka bapiša dipego tše. Sa pele, bapiša seo Mareka le Luka ba se ngwadilego. Pego ya Mareka e re: “[Jesu] a ba nea . . . ditaelo tša gore ba se tšee selo bakeng sa leeto ge e se lehlotlo feela; a re ba se tšee senkgwa, mokotlana wa dijo goba tšhelete ya koporo dikhwameng tša bona tša tšhelete, eupša a re ba rwale diramphašane le gore ba se apare diaparo tše pedi.” (Mar. 6:7-9) Luka o begile gore: “Le se tšee selo bakeng sa leeto, le ge e ka ba lehlotlo goba mokotlana wa dijo goba senkgwa goba tšhelete ya silifera; le gona le se ke la ba le seaparo se sengwe gape.” (Luka 9:1-3) Mo re bona selo seo o ka rego ke go ganetšana. Go ya ka Mareka, baapostola ba ile ba botšwa gore ba sepele le lehlotlo le go rwala diramphašane, eupša pego ya Luka e re ba be ba sa swanela go tšea selo, gaešita le lehlotlo. Ka go fapana le Mareka, Luka ga a bolele ka diramphašane.

Gore re kwešiše seo Jesu a bego a nyaka go se bolela mo, ela hloko seo se swanago ka Diebangedi tše tharo. Dipegong tše di sa tšwago go tsopolwa go akaretša le pego ya Mateo 10:5-10, baapostola ba ile ba botšwa gore ba se apare goba go ba le “diaparo tše pedi.” Mohlomongwe moapostola yo mongwe le yo mongwe o be a apere seaparo se tee. Ka gona ba be ba se ba swanela go nyaka se sengwe bakeng sa leeto. Le gona, ba be ba rwele diramphašane. Mareka o bontšha bohlokwa bja gore ba “rwale diramphašane,” e sego gore ba ye go tsoma diramphašane tše dingwe. Go thwe’ng ka mahlotlo? The Jewish Encyclopedia e re: “Go bonagala go be go tlwaelegile go Baheberu ba bogologolo gore ba dule ba swere lehlotlo.” (Gen. 32:10) Mareka o boletše gore baapostola “ba se tšee selo bakeng sa leeto” ntle le lehlotlo leo ba bego ba le swere ge Jesu a be a ba nea taelo ye. Ka baka leo, bangwadi ba Diebangedi ba be ba gatelela taelo ya Jesu ya gore ba se ke ba hlwa ba diegiša leeto ka go nyaka dilo tše dintši.

Ntlha ye e gatelelwa gape ke Mateo, yo a bego a le gona ge Jesu a nea taelo ye gomme a ngwala ka yona. Jesu o itše: “Le se ke la tla le dikhwama tša go tsenya gauta goba silifera goba koporo, goba mokotlana wa dijo bakeng sa leeto goba diaparo tše pedi goba diramphašane goba lehlotlo, gobane mošomi o swanelwa ke dijo tša gagwe.” (Mat. 10:9, 10) Go thwe’ng ka diramphašane tšeo baapostola ba bego ba di rwele le mahlotlo ao ba bego ba a swere? Jesu ga se a re ba lahle tšeo ba šetšego ba di swere, eupša o be a ba botša gore ba se ke ba tla le dilo tše bjalo. Ke ka baka la’ng a ile a ba nea taelo e bjalo? Ka gobane “mošomi o swanelwa ke dijo tša gagwe.” Wo e be e le moko wa taelo ya Jesu, e lego seo se bego se dumelelana le keletšo ya gagwe ya Thuto ya Thabeng ge a be a re ba se tshwenyege ka seo ba tlago go se ja, go se nwa goba go se apara.—Mat. 6:25-32.

Gaešita le ge ka lekga la mathomo ge o bala dipego tše tša Ebangedi go ka bonagala di ganetšana, ka moka di be di na le ntlha e tee. Baapostola ba be ba swanetše go sepela ka mokgwa woo ba bego ba le ka wona gomme ba se šitišwe ke go tsoma selo se sengwe gape. Ka baka la’ng? Ka gobane Jehofa o be a tla ba nea tšeo ba di nyakago.

 “Basadi ba bantši” bao Solomone a bego a bolela ka bona ke bomang?—Mmo. 2:8.

Re ka se kgodišege ka bona, eupša go ka direga gore e be e le basadi ba go tuma bao Solomone a ilego a kopana le bona kgorong ya gagwe ya ka mošate.

Go Mmoledi kgaolo 2, Solomone o boletše ka dilo tše dintši tšeo a ilego a di fihlelela, go akaretša le mediro ya gagwe e megolo ya go aga. O ile a ba a re: “Ke ikgobeletše le silifera le gauta gotee le dithoto tšeo di hwetšwago dikgošing le dileteng feela. Ke ikhweleditše diopedi tša banna le tša basadi le dilo tšeo di thabišago barwa ba batho, e lego basadi ba bantši.”—Mmo. 2:8.

Ba bantši ba nagana gore “basadi” bao Solomone a boletšego ka bona ke basadi ba bantši ba šele le basadi ba direthe bao a bilego le bona ge a šetše a godile, basadi bao ba ilego ba mo lebiša borapeding bja maaka. (1 Dikg. 11:1-4) Lega go le bjalo, tlhaloso yeo e bonagala e sa nepagala. Ge Solomone a be a ngwala mantšu a, o be a šetše a tlwaelane le “basadi” ba. E bile ka nako yeo, o be a sa amogelwa ke Jehofa, ka ge Modimo a be a mmudulela go ngwala dipuku tša Beibele. Se se tloga se fapane le kamoo dilo di bego di le ka gona ge a šetše a godile ge a be a na le basadi ba šele ba makgolo le basadi ba direthe moo a ilego a ba a tsena borapeding bja maaka.

Ka pukung ya Mmoledi, Solomone o boletše gore “o ile a phegelela go hwetša mantšu a thabišago le go ngwala mantšu a nepagetšego a therešo.” (Mmo. 12:10) Go molaleng gore o be a tseba mantšu a bjalo ka “bahumagadi” le “basadi ba direthe,” ka ge a ile a diriša mantšu a mangwalong a gagwe ao a buduletšwego. (Sefela 6:8, 9) Eupša go Mmoledi 2:8, mantšu ao a a tlwaelegilego ga a dirišwe.

Mantšung ao a rego “basadi ba bantši,” ke gona feela moo Beibele e dirišago lentšu la Seheberu leo le sa tlwaelegago. Baithuti ba dumela gore ga go tsebje seo ge e le gabotse se bolelwago ke mantšu a. Bafetoledi ba bantši ba Beibele ba nagana gore mantšu ao a lego go Mmoledi 2:8 a šupa go basadi ka kwešišo ya gore ke basadisadi. Polelwana e rego “basadi ba bantši” e fetišetša kgopolo yeo.

Solomone o be a tumile kudu moo kgošigadi ya mmušo o humilego wa Sheba e ilego ya ba ya kwa ka yena, ya mo etela moo a bego a kgahlegile kudu. (1 Dikg. 10:1, 2) Se se ka dira gore re kgone go kwešiša gore Solomone o be a bolela ka eng ge a bolela ka “basadi ba bantši.” A ka ba a be a bolela ka basadi ba tumilego bao a ilego a kopana le bona kgorong ya gagwe nakong ya pušo ya gagwe ya nywaga e mentši ge a be a sa amogelwa ke Modimo.