O se ke wa Hlokomologa Badumedigotee le Wena

JAROSŁAW le mosadi wa gagwe, Beata * ba anega ka gore: “Re feditše nywaga e lesome re nweletše medirong e mentši ya kgwebo ya lefase le, e bile re be re humile le dinala. Gaešita le ge re godišeditšwe therešong, re ile ra katologela kgole kudu le yona gomme re be re ikwa re se na matla a go boela go yona.”

Ngwanabo rena yo mongwe, e lego Marek, o gopola gore: “Ke ile ka lahlegelwa ke mošomo ka baka la go fetoga ga maemo a bophelo le a dipolitiki kua Poland. Ke be ke ferekane. Ke be ke boifa go thoma khampani ya ka ka ge ke be ke sa tlwaelana kudu le tša kgwebo. Mafelelong, ke ile ka lekega gore ke e thome, ke nagana gore se se tla nthuša go hlokomela dinyakwa tša lapa la ka ntle le go gobatša bomoya bja ka. Ge nako e dutše e eya, ke ile ka lemoga gore ruri ke be ke fošitše.”

Lefaseng leo maemo a boiphedišo a phuhlamago ka lebelo e bile go hlokega ga mešomo go atago, batho ba bangwe ba ikhwetša ba se na selo gomme ka baka leo, ba dira diphetho tše di sego bohlale. Bana babo rena ba bantši ba dumetše go šoma nako e oketšegilego, go šoma mešomo e mengwe ya ka thoko goba go thoma dikgwebo tša bona gaešita le ge ba se na phihlelo. Ba nagana gore go hwetša mogolo o oketšegilego  go tla thuša lapa gomme gwa se kgome boemo bja bona bja moya. Lega go le bjalo, maemo a sa letelwago le maemo a sa tsepamago a boiphedišo a ka šitiša le dilo tšeo di rulagantšwego ka maikemišetšo a mabotse. Ka baka leo, ba bangwe ba tantšwe ke molaba wa megabaru gomme ba gafile dikgahlego tša moya ka baka la dilo tša nama.—Mmo. 9:11, 12.

Ba bangwe ba bana babo rena le dikgaetšedi ba nweletše kudu dilong tša lefase moo ba se sa bago le nako ya thuto ya motho ka noši, ya diboka goba ya tšhemo. Ga go pelaelo gore go hlokomologa dilo tšeo go senya bomoya bja bona le tswalano ya bona le Jehofa. Ba ka ba ba hlokomologa le tswalano e nngwe e bohlokwa—tlemo ya bona le ‘bao ba tswalanego le bona tumelong.’ (Bagal. 6:10) Ba bangwe ba aroga borwarreng bja Bokriste ganyenyaneganyenyane. Naganišiša kudu ka taba ye.

Seo re Swanetšego go se Direla Badumedigotee le Rena

Ka ge re le bana ba motho ba moya, re na le dibaka tše dintši tša go bontšha gore re a ratana. (Baroma 13:8) Mohlomongwe go na le “mohlaki yo a llelago thušo” ka phuthegong ya geno. (Jobo 29:12) Ba bangwe ba ka ba ba hloka dilo tša motheo tša go iphediša. Moapostola Johane o re gopoditše sebaka seo maemo a a re bulelago sona. O itše: “Mang le mang yo a nago le dilo tša lefase le gomme a bona ngwanabo a hloka, fela a se mo šokele, ke ka tsela efe lerato la Modimo le dulago le le go yena?”—1 Joh. 3:17.

Maemo a bjalo a ka ba a ile a go tutueletša go thuša ba bangwe ka seatla se se bulegilego. Lega go le bjalo, ga re thuše bana babo rena ka dilo tše di bonagalago feela. Ba bangwe ba ka ba ba llela thušo ka ge ba lewa ke bodutu goba ba nyamile. Ba ka ikwa ba sa swanelegele go hlankela Jehofa, ba babja goba ba hlokofaletšwe ke motho yo ba mo ratago. Tsela e nngwe yeo re ka ba kgothatšago ka yona ke ka go ba theetša le go bolela le bona, ka go re’alo re tla kgona go ba thuša maikwelong le go ba nea dinyakwa tša bona tša moya. (1 Bathes. 5:14) Gantši se se matlafatša tlemo ya lerato yeo re nago le yona le bana babo rena.

Bagolo ka phuthegong ba ka ba boemong bjo bobotse bja go theetša ka kwelobohloko, ba bontšha gore ba a kwešiša gomme ba nea keletšo e lerato ya Mangwalo. (Dit. 20:28) Ge ba dira bjalo, balebeledi ba ekiša moapostola Paulo, yo a bego a “rata” bana babo le dikgaetšedi tša moya.—1 Bathes. 2:7, 8.

Lega go le bjalo, ge e ba Mokriste a aroga mohlapeng, na o thuša badumedigotee le yena? Le balebeledi ba ka lebeletšana le teko ya go phegelela dilo tše di bonagalago. Go thwe’ng ge e ba Mokriste a ka ineela tekong e bjalo?

Go Imelwa ke Dipelaelo tša Bophelo

Go etša ge go boletšwe, go šoma ka thata gore re hlokomele dinyakwa tša nama tša malapa a rena gantši go a re imela gomme go ka fokodiša  pono ya rena ka dilo tša moya. (Mat. 13:22) Marek, yo go boletšwego ka yena pejana, o hlalosa gore: “Ge kgwebo ya ka e be e sa atlege, ke ile ka phetha ka gore ke nyake mošomo wo o lefago tšhelete e ntši nageng e nngwe. Ke be ke fela ke boa gae dikgwedi tše dingwe le tše dingwe tše tharo. Se se ile sa dira gore mosadi wa ka yo e sego modumedi a tlaišege maikwelong.”

Ga se feela bophelo bja lapa bjo bo ilego bja tlaišega. Marek o tšwela pele ka gore: “Go tlaleletša diiring tše dintši tšeo ke bego ke di šoma phišong ya go ntšha hlapi ka meetseng, ke be ke šoma le batho ba maroga bao ba bego ba katanela go kweša ba bangwe bohloko. Ba be ba itshwere bjalo ka disenyi. Ke be ke ikwa ke gateletšegile e bile ke tšeelwa fase. Ke be ke ikwa ke se na nako ya go itlhokomela, ke ile ka thoma go belaela bokgoni bja ka bja go hlankela ba bangwe.”

Ditlamorago tše di nyamišago tša phetho ya Marek di swanetše go re tutueletša gore re naganišiše e le ruri. Gaešita le ge go hudugela nageng e nngwe go bonagala go ka rarolla mathata a ditšhelete, na go ka se rotoše mathata a mangwe? Ka mohlala, go tla direga’ng ka boemo bja moya le bja maikwelo bja malapa a rena? Na go huduga moo go tla dira gore re kgaotše go gwerana le phuthego? Na go ka se re amoge tokelo ya go hlankela badumedigotee le rena?—1 Tim. 3:2-5.

Lega go le bjalo, go etša ge o ka ba o lemogile, ga se gore motho o swanetše go hudugela nageng e nngwe e le gore a hwetše mošomo wa boiphedišo. Ela hloko mohlala wa Jarosław le Beata. Jarosław o re: “Mathomong dilo di be di bonagala di sepela gabotse. Ka ge re be re sa tšwa go nyalana, re ile ra bula kgwebo ya go rekiša di-hot-dog lefelong leo le bego le swanetše kgwebo. Ka ge re be re hwetša tšhelete ya go bonagala, re ile ra godiša kgwebo ya rena. Eupša re be re se na nako, ka gona re be re fošwa ke diboka tša Bokriste. Go se go ye kae, ke ile ka kgaotša go bula madibogo le go hlankela ke le mohlanka wa bodiredi. Ka ge re be re kgahlišwa ke tšhelete yeo re bego re e hwetša, re ile ra bula lebenkele le legolo gomme ra thoma go hlakanela kgwebo le motho yo e sego modumedi. Go se go ye kae ke ge ke tšea maeto a go ya dinageng tše dingwe go yo saena ditumelelano tša kgwebo tšeo di bego di tla re fa ditolara tše dimilione. Ke be ke eba gae ka sewelo gomme tswalano yeo ke bego ke na le yona le mosadi wa ka le morwedi wa ka e ile ya thoma go fokola. Mafelelong, go atlega ga kgwebo ya rena go ile gwa dira gore re hwe moyeng. Ka ge re be re se sa hlwa re kopanela le phuthego, re be re se sa hlwa re nagana ka bana babo rena le dikgaetšedi.”

Re ka ithuta’ng go se? Kganyogo ya go itirela paradeise ya ditoro e ka ba moreo go Mokriste, ya feleletša ka gore a katanele go ikgotsofatša kudu—seo sa dira gore a lahlegelwe ke “diaparo tša gagwe tša ka ntle,” e lego leswao la gagwe la Bokriste. (Kut. 16:15) Seo se ka dira gore re kgaotše go gwerana le bana babo rena bao re bego re kgona go ba thuša.

Itlhahlobe ka Potego

Re ka ba re tlwaetše go bolela gore: ‘Seo se ka se ntiragalele.’ Lega go le bjalo, re swanetše go naganišiša ka šedi gore ke eng seo re tlogago re se hloka bophelong. Paulo o ngwadile gore: “Ga se ra tliša selo lefaseng, le gona re ka se ke ra tloga le selo. Ka gona ge re na le dijo le diaparo re tla kgotsofala ka tšona.” (1 Tim. 6:7, 8) Ke therešo gore maemo a boiphedišo a fapana go ya ka dinaga. Seo se ka lebelelwago e le go ikhweletša dilo tša motheo nageng e hlabologilego se ka lebelelwa e le go huma dinageng tše dintši.

Go sa šetšwe gore re phela maemong afe, ela hloko mantšu a latelago a Paulo, a rego: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago tšeo di wetšago batho tahlegong le tshenyegong.” (1 Tim. 6:9) Molaba o a fihlwa gore selo seo o nyakago go se tanya se se ke sa o bona. O hlametšwe gore o tanye selo se sa itebetše. Re ka phema bjang gore re se tanywe ke ‘dikganyogo tše gobatšago’?

Go ipeela dilo tše di tlago pele go ka re tutueletša gore re tsome nako e oketšegilego ya go phegelela dikgahlego tša Mmušo, go akaretša le nako ya thuto ya motho ka noši. Go ithuta mo go bjalo le go rapela go ka thuša Mokriste gore  “a swanelege ka botlalo, a hlangwe ka mo go feletšego” gore a thuše ba bangwe.—2 Tim. 2:15; 3:17.

Nywageng e sa tšwago go feta, bagolo ba lerato ba ile ba katanela go matlafatša le go kgothatša Jarosław. O ile a tutueletšega go dira diphetogo tše dikgolo. O re: “Poledišanong e nngwe e bohlokwa, bagolo ba ile ba tsopola mohlala wa Mangwalo wa lesogana le le humilego leo le bego le nyaka go phela ka mo go sa felego eupša le sa ikemišetša go lahlegelwa ke dilo tša lona tše di bonagalago. Ke moka ka bohlale ba ile ba botšiša ge e ba tsebišo ye e ka šoma go nna. Ruri seo se ile sa mphahlolla!”—Die. 11:28; Mar. 10:17-22.

Jarosław o ile a lekola maemo a gagwe ka potego gomme a phetha ka gore o tla kgaotša kgwebo ya gagwe e kgolo. Ka morago ga nywaga e mebedi feela, yena le lapa la gagwe ba be ba tsošološitše bomoya bja bona. Ga bjale o hlankela bana babo e le mogolo. Jarosław o re: “Ge bana babo rena ba nwelela medirong ya kgwebo moo ba feleletšago ba hlokomologa bomoya bja bona, ke diriša mohlala wa ka go ba bontšha gore ga se gabohlale go rwala joko le ba ba sa dumelego. Ga go bonolo go gana mešomo yeo e goketšago le mediro yeo e sa botegego.”—2 Bakor. 6:14.

Marek le yena o ithutile go tšwa lebading. Gaešita le ge go hwetša mošomo o lefago gabotse nageng e šele go ile gwa thuša lapa la gagwe ka tša ditšhelete, tswalano ya gagwe le Modimo le bana babo e ile ya fokola. Ge nako e dutše e eya, o ile a lekola lefsa dilo tšeo a bego a di etiša pele. O re: “Nywageng e fetilego, boemo bja ka bo be bo swana le bja Baruke wa bogologolo yo a bego a ‘duletše go itsomela dilo tše dikgolo.’ Mafelelong, ke ile ka tšhollela Jehofa sa mafahleng, ka mmotša dipelaelo tša ka gomme ga bjale ke ikwa ke lekalekane moyeng.” (Jer. 45:1-5) Marek ga bjale o katanela “modiro o mobotse” wa go ba molebeledi ka phuthegong.—1 Tim. 3:1.

Marek o lemoša bao ba nyakago go hudugela nageng e šele e le ge ba nyaka mošomo o lefago gabotse gore: “Ge o le nageng e šele, go bonolo kudu go wela melabeng ya lefase le le kgopo. Go se kgone go bolela leleme la lefelong leo go ka dira gore o palelwe ke go bolela le ba bangwe. O ka no tla gae o swere tšhelete, eupša gape o na le dintho tša moya tšeo di ka tšeago nako e telele gore di fole.”

Go boloka tekatekano magareng ga mošomo wa boiphedišo le go phetha dilo tšeo re swanetšego go di direla bana babo rena go tla re thuša go kgahla Jehofa. E bile re ka ba mohlala o mobotse wo o ka tutuetšago ba bangwe gore ba dire diphetho tše bohlale. Bao ba imelwago ba nyaka thekgo, kwelobohloko le mohlala o mobotse wa bana babo bona le dikgaetšedi. Bagolo ba phuthego le ba bangwe bao ba godilego ka tsebo ba ka thuša badumedigotee gore ba dule ba na le tekatekano gomme ba pheme go imelwa ke dipelaelo tša bophelo.—Baheb. 13:7.

Ee, anke le ka mohla re se ke ra hlokomologa bana babo rena le dikgaetšedi ka baka la go nwelela mešomong ya boiphedišo. (Bafil. 1:10) Go e na le moo, anke re ‘humeng go Modimo’ ge re dutše re etiša dikgahlego tša Mmušo pele maphelong a rena.—Luka 12:21.

[Mongwalo wa tlase]

[Diswantšho go letlakala 21]

Na mošomo wa gago wa boiphedišo o go šitiša go ba gona dibokeng?

[Diswantšho go letlakala 23]

Na o tšeela godimo dibaka tšeo o nago le tšona tša go thuša bana beno le dikgaetšedi tša moya?