Go Thoma ga Kgatišo ya Seisemane se se Nolofaditšwego

RE THABELA go le tsebiša gore ka nako e lekanago ngwaga, go thoma ka tokollo ye ya kgatišo e ithutwago ya Morokami, re tla gatiša kgwedi le kgwedi le kgatišo ya Seisemane se se nolofaditšwego; eupša re tla bona ge e ba seo se tla tšwetšwa pele ntle le go kgaotšwa. E tla ba le dihlogo tšeo di ithutwago, gomme ge e ba go sa na le sekgoba, e tla ba le dihlogo tše dingwe tša ka thoko. Re dumela gore se se tla kgotsofatša dinyakwa tše bohlokwa kudu tša moya tša bontši bja Dihlatse tša Jehofa. Ke ka baka la’ng re bolela bjalo?

Seisemane ke leleme leo le tlwaetšwego go bolelwa ke bana babo rena dinageng tše bjalo ka Fiji, Ghana, Kenya, Liberia, Nigeria, Papua New Guinea le Solomon Islands. Le ge bana babo rena mo dinageng tše ba kgona go bolela maleme a mangwe a dinageng tšeo, gantši leleme leo ba le dirišago ge ba le dibokeng tša phuthego le bodireding bja tšhemo ke Seisemane. Lega go le bjalo, Seisemane seo ba se dirišago se bonolo go feta seo re se dirišago dikgatišong tša rena. Le gona, go na le Dihlatse tše dingwe tša Jehofa tšeo di hudugetšego mafelong ao di gapeletšegago go bolela Seisemane le ge di se kwešiša ganyenyane. Godimo ga moo, ga di kgone go ba gona dibokeng tšeo di swarwago ka leleme la gabo tšona.

Dihlogo tšeo re di ahlaahlago beke le beke Thutong ya Morokami ke sedirišwa se segolo sa gore re dule re na le dijo tša moya tše di lego nakong. Ka gona, e le gore bohle bao ba bago gona sebokeng se ba holwe ka botlalo ke dihlogo tše, kgatišo ya Seisemane se se nolofaditšwego e diriša mantšu a bonolo e bile e na le popopolelo e nolofaditšwego. Kgatišo ye e mpsha e tla ba le letlakala la ka ntle la moswananoši. Dihlogwana, dirapa, dipotšišo tša poeletšo le diswantšho tšeo di tšwelelago dihlogong tšeo tše ithutwago di tla swana tlwaa le tšeo di lego ka go kgatišo e tlwaelegilego. Ka go re’alo, bohle ba ka kgona go sepedišana ba dutše ba diriša kgatišo le ge e le efe nakong ya Thuto ya Morokami. Gore o bone phapano tseleng yeo dikgatišo tše di tlago go ba ka yona, bona mohlala o lego ka mo tlase go tšwa go serapa 2 sa sehlogo sa mathomo se ithutwago tokollong ye.

Re holofela gore tokišetšo ye e mpsha e tla araba dithapelo tša ba bantši bao ba boditšego Jehofa gore: “Dira gore ke kwešiše, gore ke ithute ditaelo tša gago.” (Ps. 119:73) Re kgodišegile gore bao ba kwešišago Seisemane ganyenyane, gotee le bana ba bangwe ba banyenyane bao ba bolelago Seisemane, ba tla kgona go lokišetša gakaone Thuto ya Morokami ya beke le beke. Re lebiša ditebogo ka moka go Jehofa gore ka baka la “[go rata] mokgatlo wohle wa bana babo rena,” o diriša “mohlanka yo a botegago le wa temogo” go aba dijo tša moya ka boati.—1 Pet. 2:17; Mat. 24:45.

Sehlopha se Bušago sa Dihlatse tša Jehofa