Dipotšišo tše Tšwago go Babadi

Re swanetše go kwešiša bjang dipalopalo tšeo di tšwelelago pegong ya ngwaga wa tirelo?

Ngwaga le ngwaga, re fagahlela go bona pego ya tirelo yeo e tšwelelago ka go Yearbook. Go tloga go kgahliša go bona seo batho ba Jehofa e le sehlopha ba se fihleletšego modirong wa go bolela le wa go ruta ka Mmušo lefaseng ka moka. Eupša gore re holwe ka botlalo ke pego ye, re swanetše go ba le kwešišo ya maleba ka dikarolo tše di tšwelelago moo gomme re be le pono e lekalekanego ka dipalopalo tšeo di lego moo. Ela hloko mehlala e sego kae.

Ngwaga wa tirelo. Ngwaga wo o thoma ka September ya ngwaga o mongwe gomme wa fela ka August ya ngwaga woo o o latelago. Yearbook e ba le pego ya ngwaga o fetilego wa tirelo. Ka go re’alo, 2011 Yearbook e na le pego ya ngwaga wa tirelo wa 2010, e lego woo o thomilego ka September 1, 2009 gomme wa fela ka August 31, 2010.

Tlhora ya bagoeledi le karolelano ya bagoeledi. “Bagoeledi” ba akaretša Dihlatse tša Jehofa tše kolobeditšwego gotee le bao ba sa kolobetšwago bao ba swanelegelago go ba bagoeledi ba Mmušo. “Tlhora ya bagoeledi” ke palo e kgolo e fihleletšwego ya bao ba begilego kgweding e itšego mo ngwageng wa tirelo gomme e ka akaretša le dipego tšeo di fihlilego ka morago ga nako tšeo di bego di se tša akaretšwa pegong ya kgwedi ya pele ga yeo. Ka baka la seo, bagoeledi ba bangwe ba ka balwa gabedi. Lega go le bjalo, palo yeo ya tlhora ga e akaretše palo ya bagoeledi bao ba tšerego karolo bodireding eupša ba lebala go bega. Se se gatelela bohlokwa bja gore mogoeledi yo mongwe le yo mongwe a bege kapelapela kgwedi le kgwedi. “Karolelano ya bagoeledi” ke kakaretšo ya bagoeledi bao ba begago nako ya bona bodireding kgwedi le kgwedi.

Palo ya diiri. Go ya ka 2011 Yearbook, Dihlatse tša Jehofa di feditše diiri tša ka godimo ga 1,6 bilione bodireding bja tšhemo. Lega go le bjalo, palo ye ga e emele diiri ka moka tšeo re di dirišago borapeding bja rena, ka gobane ga e akaretše nako yeo re e fetšago re dira mediro e bjalo ka wa bodiši, go ba dibokeng le go ithuta ga rena Beibele re le noši le go naganišiša.

Tšhelete e dirišitšwego. Ngwageng wa tirelo wa 2010, Dihlatse tša Jehofa di dirišitše tšhelete ya ka godimo ga diranta tše bilione go hlokomela babulamadibogo ba kgethegilego, baromiwa le balebeledi ba basepedi dikabelong tša bona tša tirelo ya tšhemo. Lega go le bjalo, palo ye ga e akaretše ditshenyagalelo tša go gatiša dikgatišo tše theilwego Beibeleng tšeo re di tšweletšago; le gona ga e akaretše tšhelete yeo e dirišitšwego go hlokomela baithaopi ba Bethele ba ka godimo ga 20 000 bao ba lego meagong ya makala go dikologa lefase.

Bao ba jelego segopotšong. Ye ke palo ya batho ba kolobeditšwego bao ba jago diswantšhetšo Segopotšong lefaseng ka bophara. Na palo ye e emela palo ya batlotšwa ba lego mo lefaseng? Ga se gore go bjalo. Dilo tše mmalwa—go akaretša ditumelo tša nakong e fetilego goba gaešita le mathata a monagano goba a maikwelo—di ka dira gore ba bangwe ka phošo ba nagane gore ba bileditšwe legodimong. Ka gona, ga go ka tsela yeo re ka tsebago palo e lebanyago ya batlotšwa ba lego mo lefaseng; le gona ga go hlokagale gore re e tsebe. Sehlopha se Bušago ga se boloke lelokelelo la maina a bohle bao ba jago senkgwa le go nwa beine Segopotšong. *

Seo re se tsebago ke gore mo lefaseng go tla ba go na le ba bangwe ba “bahlanka ba Modimo wa rena” ba tloditšwego ge diphefo tše senyago tša masetlapelo a magolo di lokollwa. (Kut. 7:1-3) Go ba go fihla ka nako yeo, batlotšwa ba tla etelela pele go dira selo seo se bontšhwago gabotse ke pego ya rena ya ngwaga le ngwaga ya tirelo—modiro o mogologolo wa go bolela le go ruta historing ya batho.

[Mongwalo wa tlase]