A re Thabeng Mmogo!

GO THATA kudu go hwetša lethabo le tlhalalo. Go batho ba bantši, go abelana maikwelo a kgonthe le ba bangwe ke selo seo se ka se tsogego se kgonegile. Bophelo bja lehono, kudukudu bja ditoropong tše dikgolo, bo dira gore batho ba ipee lekatana gomme ba ikarole.

Moprofesara Alberto Oliverio, yoo e lego setsebi sa tsela ya batho ya go phela o re: “Bodutu ke boemo bjo bo tlwaelegilego, gomme ga go pelaelo gore go phela mafelong ao a ageleditšwego ka maboto a matelele go šušumeletša batho gore ba ikarole. Mabakeng a mantši go dira gore re hlokomologe seo se diregago bophelong bja motho yoo re šomago le yena ka ofising e tee, moagišani goba motho yoo a šomago lebenkeleng la kgauswi.” Gantši go ikarola mo go bjalo go feleletša ka kgateletšego.

Lega go le bjalo, boemo le moya wa Bakristegotee le rena ke tše fapanego. Moapostola Paulo o ngwadile gore: “Thabang ka mehla.” (1 Bathes. 5:16) Go na le mabaka a mantši ao a dirago gore re thabe le go hlalala mmogo. Re rapela Jehofa, Modimo yo Godimodimo; re kwešiša molaetša wa Beibele wa therešo; re na  le kholofelo ya go phološwa le go hwetša bophelo bjo bo sa felego; e bile re ka thuša ba bangwe go hwetša ditšhegofatšo tše.—Ps. 106:4, 5; Jer. 15:16; Baroma 12:12

Go ba yo a thabilego le go thaba le ba bangwe ke dika tša Bakriste ba therešo. Ka gona ga go makatše ge Paulo a ngwaletše Bafilipi gore: “Ke a thaba le go hlalala le lena ka moka. Le lena ka tsela e swanago le thabeng gomme le hlalale le nna.” (Bafil. 2:17, 18) Ka mantšu ao a sego kae, Paulo o bolela gabedi ka go ba yo a thabilego gotee le go hlalala le batho ba bangwe.

Ke therešo gore Bakriste ba swanetše go ela hloko gore ba phema mokgwa le ge e le ofe wa go ikarola. Ga go na motho le o tee yoo a ipeago lekatana yoo a ka thabago mmogo le badumedigotee le yena. Ka gona, re ka diriša bjang keletšo ya Paulo ya go “tšwela pele re thaba Moreneng” le bana babo rena?—Bafil. 3:1.

Thaba le Badumedigotee le Wena

Ge Paulo a be a ngwala lengwalo la gagwe le le yago go Bafilipi, o swanetše go ba a be a golegilwe Roma ka baka la modiro wa gagwe wa go bolela. (Bafil. 1:7; 4:22) Lega go le bjalo, go golegwa ga se gwa ka gwa fokotša go fišegela ga gagwe bodiredi. Go fapana le seo, o ile a thabela go hlankela Jehofa ka mo go tletšego go fihla bokgoleng bjo bo kgonegago le go “[tšhollwa] bjalo ka sebego sa dino.” (Bafil. 2:17) Moya woo Paulo a bego a na le wona o bontšha gore lethabo ga se la ithekga ka maemo ao motho a ikhwetšago a le go ona. Go sa šetšwe go golegwa, o itše: “Ke tla ba ka tšwela pele ke thabile.”—Bafil. 1:18

Paulo o be a hlomile phuthego kua Filipi gomme o be a tloga a rata bana babo ba moo. O be a tseba gore go ba botša kamoo a bego a thabile ka gona ka baka la go hlankela Jehofa go be go tla ba kgothatša. Ka gona, o ngwadile gore: “Bjale bana bešo, ke nyaka gore le tsebe gore ge e le gabotse dilo tše di ntiragaletšego di feleleditše ka go tšwetšwa pele ga ditaba tše dibotse, mo e lego gore ditlemo tša ka tša kgolego di tsebja ke bohle gare ga Baleti bohle ba Mmušiši le ba bangwe ka moka ka baka la ge ke latela Kriste.” (Bafil. 1:12, 13) Go abelana ga Paulo le bana babo phihlelo ye e kgothatšago e be e le tsela e nngwe ya go thaba le go hlalala le bona. Bafilipi le bona ba swanetše go ba ba ile ba thaba le Paulo. Lega go le bjalo, e le gore ba fihlelele lethabo leo, go be go nyakega gore ba se nyamišwe ke seo Paulo a bego a lebeletšane le sona. Go e na le moo, ba be ba swanetše go ekiša mohlala wa gagwe. (Bafil. 1:14; 3:17) Go oketša moo, Bafilipi ba be ba ka tšwela pele ba akaretša Paulo dithapelong tša bona, ba mo thuša  le go mo thekga ka tsela yeo ba bego ba ka kgona.—Bafil. 1:19; 4:14-16.

Na re bontšha moya wa lethabo go swana le Paulo? Na re katanela go bona dibopego tše dibotse maemong a rena a bophelo le bodireding bja rena bja Bokriste? Ge re le gare ga bana babo rena, ke gabotse go thaba ka baka la modiro wa go nea bohlatse. Ga se ra swanela go letela gore go be le diphihlelo tše di kgahlišago kudu gore re dire se. Mohlomongwe re kgonne go dira gore motho a kgahlegele molaetša wa Mmušo ka matseno a atlegilego goba ka go nea mabaka ka tsela e kgodišago. Re ka ba re bile le poledišano e botse le mong wa ntlo ka temana yeo re e dirišitšego ya Beibele. Goba mohlomongwe e ka ba e le gore re ile ra lemogwa tšhemong gore re Dihlatse tša Jehofa gomme seo ka bosona sa nea bohlatse bjo bobotse. Go abelana diphihlelo tše bjalo ke tsela ya go thaba mmogo.

Bontši bja batho ba Jehofa bo ile bja ikgafela go dira modiro wa boboledi e bile bo sa ikgafile. Babulamadibogo, balebeledi ba basepedi, ditho tša lapa la Bethele, baromiwa le bahlanka ba ditšhabatšhaba ba diriša nako ya bona tirelong ya nako e tletšego gomme ba thabela go dira seo. Na re thaba le go hlalala le bona? Ka gona a re bontšheng go leboga “badirišani [ba ba rategago] bakeng sa mmušo wa Modimo.” (Bakol. 4:11) Ge re na le bona dibokeng tša phuthego goba dikopanong tše dikgolo tša Bokriste, re ka ba kgothatša ka borutho. Re ka ba ra ekiša mohlala wa bona wa phišego. Le gona re ka ipha “sebaka” sa go theeletša diphihlelo tša bona le mantšu a bona a kgothatšago ka go ba laletša le go ba amogela magaeng a rena, mohlomongwe ka go ja gotee le bona.—Bafil. 4:10.

Thaba le Bao ba Lebeletšanego le Diteko

Go kgotlelela tlaišo le go fenya diteko go ile gwa matlafatša boikemišetšo bja Paulo bja go dula a botegela Jehofa. (Bakol. 1:24; Jak. 1:2, 3) Go tseba ga gagwe gore bana babo ba Filipi ba be ba tla lebana le diteko tše di swanago le gore ba tla kgothatšwa ke kgotlelelo ya gagwe go ile gwa mo nea lebaka la gore a thabe le go hlalala le bona. Ka baka leo, o ile a ngwala gore: “Le neilwe tokelo bakeng sa Kriste, e sego feela gore le dumele go yena, eupša le gore le tlaišege ka baka la gagwe. Gobane le lwa ntwa yeo le bonego ke elwa, yeo ga bjale le kwago gore ke sa dutše ke elwa.”—Bafil. 1:29, 30.

Ka mo go swanago, lehono Bakriste ba tlaišwa ka baka la go nea ga bona bohlatse. Ka dinako tše dingwe kganetšo ye e ba e šoro, eupša gantši ga e bonale. E ka tla ka ditatofatšo tša maaka tšeo di tšwago go bahlanogi, go swarwa gampe ke ditho tša lapa, go kwerwa ke bašomigotee le rena goba bao re tsenago le bona sekolo. Jesu o re lemošitše gore diteko tše ga se tša swanela go re makatša goba go re nyamiša. Go e na le moo, di re nea lebaka la go thaba. O itše: “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe ka lena ka baka la ka. Thabang le hlalaleng ka ge moputso wa lena e le o mogolo magodimong.”—Mat. 5:11, 12.

Ga se ra swanela go boifa goba go tšhoga ge re ekwa gore bana babo rena ba lebeletšane le kganetšo e šoro dinageng tše dingwe. Go e na le moo, re swanetše go thabela kgotlelelo ya bona. Re ka ba rapelela gomme ra kgopela Jehofa gore a tiiše tumelo ya bona le go ba thuša gore ba kgotlelele. (Bafil. 1:3, 4) Le ge re ka se direle bana bao babo rena ba rategago selo se segolo, re ka thuša bao ba lego phuthegong ya gabo rena bao ba lebeletšanego le diteko. Re ka bontšha gore re a ba kgahlegela gomme ra ba thekga. Re ka bula dibaka tša go thaba le bona ka go fela re ba laletša mantšiboeng a Borapedi bja Lapa la rena, ka go tšea karolo gotee le bona modirong wa boboledi le ka go fetša nako le bona boitapološong.

Re na le mabaka a mantši a go thaba mmogo! Anke re ganetšeng moya wa lefase le wa go ikarola gomme re tšwele pele re abelana lethabo la rena le bana babo rena. Ka go dira bjalo, re ka se tšee karolo leratong le boteeng bja phuthego feela, eupša gape re tla thabela borwarre bja Bokriste ka mo go tletšego. (Bafil. 2:1, 2) Ee, “ka mehla thabang Moreneng,” ka gobane Paulo o re kgothatša ka gore: “Ke tla buša ke re thabang!”—Bafil. 4:4.

[Mothopo wa Seswantšho go letlakala 6]

Globe: Courtesy of Replogle Globes