“Selo le ge e le sefe seo le se dirago, se direng ka moya ka moka bjalo ka ge eka le se direla Jehofa.”—BAKOL. 3:23.

1-3. (a) Na lehu la Jesu koteng ya tlhokofatšo le bolela gore Jehofa ga a sa nyaka sehlabelo le ge e le sefe go rena? Hlalosa. (b) Ke potšišo efe e rotogago mabapi le dihlabelo lehono?

LEKGOLONG la pele la nywaga C.E., Jehofa o ile a utollela batho ba gagwe gore sehlabelo sa Jesu sa topollo se fedišitše Molao wa Moshe. (Bakol. 2:13, 14) Dibego ka moka tšeo Bajuda ba bego ba di dira ka nywaga e makgolo di be di se sa nyakega e bile di be di se sa na mohola. Molao o be o phethile morero wa wona e le “moetetši . . . wa go re iša go Kriste.”—Bagal. 3:24.

² Seo ga se bolele gore Bakriste ga ba sa kgahlegela dihlabelo. Go fapana le seo, moapostola Petro o boletše ka bohlokwa bja go “[neela] dihlabelo tša moya tše di amogelegago go Modimo ka Jesu Kriste.” (1 Pet. 2:5) Go oketša moo, moapostola Paulo o boletše ka mo go kwagalago gore bophelo bja Mokriste yo a ineetšego—sebopegong se sengwe le se sengwe sa bjona—bo ka tšewa ka mo go swanetšego e le “sehlabelo.”—Baroma 12:1.

³ Ka gona, Mokriste o direla Jehofa dihlabelo ka go mo nea dilo tše itšego goba ka go tlogela dilo tše itšego ka baka la gagwe. Motheong wa seo re se tsebago ka dilo tšeo di bego di nyakega go Baisiraele, re ka kgonthišega bjang gore dihlabelo tša rena ka moka di amogelwa ke Jehofa lehono?

BOPHELONG BJA LETŠATŠI LE LETŠATŠI

4. Ke’ng seo re swanetšego go se gopola ka mediro ya bophelo bja letšatši le letšatši?

⁴ Ge re dutše re dira mediro ya rena ya letšatši le letšatši, go ka bonagala go le thata go tswalanya mediro ya rena le go direla Jehofa dihlabelo. Mošomo wa ka gae, wa sekolo, wa boiphedišo, go ya mabenkeleng gotee le dilo tše dingwe tše di swanago le tšona di ka bonagala di sa sepedišane felo le dilo tša moya. Lega go le bjalo, ge e ba o ineetše go Jehofa goba o nyaka go dira bjalo kgauswinyane, gona go bohlokwa go ela hloko tsela  yeo o lebelelago mediro ya letšatši le letšatši. Re Bakriste diiri tše 24 ka letšatši. Re swanetše go diriša melao ya motheo ya Mangwalo sebopegong se sengwe le se sengwe sa bophelo bja rena. Ka baka leo, Paulo o re kgothaleditše gore: “Selo le ge e le sefe seo le se dirago, se direng ka moya ka moka bjalo ka ge eka le se direla Jehofa, e sego batho.”—Bala Bakolose 3:18-24.

5, 6. Ke dilo dife tšeo di swanetšego go kgoma tsela yeo re aparago ka yona le tsela yeo re itshwarago ka yona letšatši le letšatši?

⁵ Mediro ya Mokriste ya letšatši le letšatši ga se karolo ya tirelo ya gagwe e kgethwa. Lega go bjalo, taba ya gore Paulo o re eletša gore re dire dilo “ka moya ka moka bjalo ka ge eka [re] direla Jehofa” e re dira gore re nagane ka tsela ya rena ka moka ya bophelo. Ka gona, re ka diriša se bjang? Na re dira dilo le go apara ka tsela e nago le seriti ka dinako ka moka? Goba ge re dutše re dira mediro ya letšatši le letšatši, na re ka lewa ke dihlong tša go itsebiša gore re Dihlatse tša Jehofa mohlomongwe ka baka la tsela yeo re itshwerego ka yona goba ka tsela yeo re aperego ka yona? Anke go se be bjalo le ka mohla! Batho ba Jehofa ba ka se nyake go dira selo le ge e le sefe seo se ka nyatšišago leina la Modimo.—Jes. 43:10; 2 Bakor. 6:3, 4, 9.

⁶ Anke re hlahlobeng kamoo kganyogo ya go dira dilo “ka moya ka moka bjalo ka ge eka [re] direla Jehofa” e kgomago dikarolo tše fapafapanego tša bophelo. Ge re dutše re dira bjalo, gopola gore dihlabelo ka moka tšeo Baisiraele ba bego ba di direla Jehofa di be di swanetše go tšwa go tše kaonekaone tšeo ba bego ba na le tšona.—Ek. 23:19.

KAMOO BOPHELO BJA GAGO BO KGONGWAGO KA GONA

7. Ke’ng seo se akaretšwago ke boineelo bja Mokriste?

⁷ Ge o be o ineela go Jehofa, na ga se wa dira phetho yeo ka pelo ka moka? Ge e le gabotse, o boletše gore sebopegong se sengwe le se sengwe sa bophelo bja gago, o tla etiša Jehofa pele. (Bala Baheberu 10:7.) Yeo e bile phetho e botse. Ga go pelaelo gore o bone gore ge o nyaka go dira thato ya Jehofa tabeng e itšego e bile o katanela go dira dilo ka go dumelelana le yona, mafelelo e ba a thabišago. (Jes. 48:17, 18) Batho ba Modimo ke ba bakgethwa e bile ba thabile ka gobane ba bonagatša dika tša Yo a ba hlahlago.—Lef. 11:44; 1 Tim. 1:11.

8. Taba ya gore Jehofa o be a lebelela dihlabelo tša bogologolo e le tše kgethwa e re hola bjang?

⁸ Dihlabelo tšeo Baisiraele ba bego ba di direla Jehofa di be di lebelelwa e le tše kgethwa. (Lef. 6:25; 7:1) Lentšu la Seheberu leo le fetoletšwego e le “bokgethwa” le fetišetša kgopolo ya go beelwa ka thoko, go hlaolwa goba go kgethagatša selo gore e be sa Modimo. E le gore dihlabelo tša rena di amogelwe ke Jehofa, ga se tša swanela go tutuetšwa ke mekgwa ya lefase goba go re šilafatša. Re ka se rate dilo le ge e le dife tšeo Jehofa a di hloilego. (Bala 1 Johane  2:15-17.) Go a kwagala gore seo se bolela gore re swanetše go phema tswalano le ge e le efe goba go dira dilo tšeo di ka re šilafatšago go ya ka pono ya Modimo. (Jes. 2:4; Kut. 18:4) Se bolela gape gore re ka se dumelele mahlo a rena go tšwela pele a lebeletše dilo tšeo di sa hlwekago goba tše di gobogilego goba go dumelela menagano ya rena go naganišiša ka dilo tše bjalo.—Bakol. 3:5, 6.

9. Tsela yeo Mokriste a swarago batho ba bangwe ka yona e bohlokwa gakaakang, gona ka baka la’ng?

⁹ Paulo o kgothaleditše badumedigotee le yena gore: “Le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.” (Baheb. 13:16) Ka gona go ba yo a lokilego le go direla batho ba bangwe dilo tše dibotse e tloga e le sehlabelo seo Jehofa a se amogelago. Go tshwenyega ka batho ba bangwe ke leswao le le tlogago le hlaola Bakriste ba therešo.—Joh. 13:34, 35; Bakol. 1:10.

DIHLABELO BORAPEDING

10, 11. Jehofa o lebelela bjang bodiredi le borapedi bja Bokriste, gomme seo se swanetše go re kgoma bjang?

¹⁰ Tsela e nngwe yeo e lego molaleng yeo rena re le Bakriste re direlago batho ba bangwe botse ke ka “boipolelo bja phatlalatša bja kholofelo ya rena.” Na o diriša sebaka se sengwe le se sengwe go nea bohlatse? Paulo o biditše modiro wo o bohlokwa wa Bokriste gore ke “sehlabelo sa tumišo . . . , ke gore seenywa sa melomo ya rena yeo e bolelago ka leina la [Modimo] phatlalatša.” (Baheb. 10:23; 13:15; Hos. 14:2) Go ka bolelwa mo gontši ka nako yeo re e fetšago bodireding le kamoo re e dirišago ka gona go boleleng ditaba tše dibotse tša Mmušo, gomme dikarolo tša Seboka sa Tirelo di hlametšwe go tutuetša menagano ya rena ka taba ye. Lega go le bjalo, ge re bolela ka bokopana, tirelo ya rena ya tšhemo le mediro ya go nea bohlatse bjo bo sa rulaganyetšwago ke “sehlabelo sa tumišo,” karolo ya borapedi bja rena, ka gona sehlabelo seo e swanetše go ba se sekaonekaone seo re ka se neago. Le ge maemo a rena a sa swane, nako yeo re e fetšago re tsebatša ditaba tše dibotse gantši e bontšha tsela yeo re tlogago re leboga dilo tša moya.

¹¹ Ka mehla Bakriste ba diriša nako ya bona bakeng sa go rapela ba le noši goba e le sehlopha. Jehofa o nyaka gore re dire bjalo. Ke therešo gore ga re sa boloka molao wa go khutša ka Sabatha goba go tšea maeto a ka mehla a go ya menyanyeng Jerusalema. Lega go le bjalo, mekgwa yeo ya bogologolo e sa na le yeo e swanago le yona bophelong bja Bokriste. Modimo o sa letetše gore re kgaotše mediro e sa rego selo  gomme re ithute Lentšu la gagwe, re rapele le go ba gona dibokeng tša Bokriste. Le gona dihlogo tša malapa a Bokriste di etelela pele go swara borapedi bja lapa le ditho tša malapa a tšona. (1 Bathes. 5:17; Baheb. 10:24, 25) Mabapi le mediro ya rena ya moya, re dira gabotse go ipotšiša gore: ‘Na nka kaonefatša tsela yeo ke rapelago ka yona?’

12. (a) Go neelwa ga diorelo borapeding bja bogologolo go ka swantšhwa le eng lehono? (b) Re ka dira bjang gore dithapelo tša rena di swane le diorelo?

¹² Kgoši Dafida o opeletše Jehofa gore: “Anke thapelo ya ka e lokišetšwe bjalo ka seorelo pele ga gago.” (Ps. 141:2) Nagana go se nene ka dithapelo tša gago—gore o rapela ga kae le gore o di tšeela godimo gakaakang. Puku ya Kutollo e swantšha “dithapelo tša bakgethwa” le diorelo ka baka la gore dithapelo tšeo di amogelegago di rotogela go Jehofa go swana le monko o bose. (Kut. 5:8) Isiraeleng ya bogologolo, diorelo tšeo di bego di neelwa aletareng ya Jehofa ka mehla di be di swanetše go lokišetšwa gabotse le ka šedi. Jehofa o be a di amogela ge feela di be di neelwa ka go dumelelana le melao yeo a bego a e beile. (Ek. 30:34-37; Lef. 10:1, 2) Ge e ba dithapelo tša rena le tšona di dirwa ka tsela e bjalo, gona re ka kgonthišega gore Jehofa o a di amogela.

GO NEA LE GO AMOGELA

13, 14. (a) Ke tirelo efe yeo Epaforodito le phuthego ya Filipi ba ilego ba e direla Paulo, gomme moapostola yo o ile a ikwa bjang ka yona? (b) Re ka latela bjang mohlala wa Epaforodito le Bafilipi?

¹³ Meneelo ya ditšhelete ya go thekga modiro wa lefase ka bophara e ka swantšhwa le sehlabelo, go sa šetšwe gore ke e menyenyane goba ke e mentši. (Mar. 12:41-44) Lekgolong la pele la nywaga C.E., phuthego ya Filipi e ile ya romela Epaforodito kua Roma go yo išetša Paulo dinyakwa tša motheo. Go molaleng gore monna yoo yo a bego a romilwe ke Bafilipi o be a swere mpho ya tšhelete e tšwago phuthegong yeo. Le e be e se lekga la pele Bafilipi ba nea Paulo dimpho ka seatla se se bulegilego. Ba be ba ikemišeditše ka botho go dira gore Paulo a se ke a tshwenyega ka ditšhelete e le gore a fetše nako e ntši bodireding. Paulo o ile a lebelela bjang mpho ye? O ile a e bitša “monko o bose, sehlabelo se se amogelegago, se se kgahlišago kudu go Modimo.” (Bala Bafilipi 4:15-19.) Ka kgonthe Paulo o ile a leboga tiro e botho ya Bafilipi, gomme Jehofa le yena o ile a e leboga.

¹⁴ Ka mo go swanago lehono, Jehofa o leboga kudu meneelo ya rena bakeng sa modiro wa lefase ka bophara. Go oketša moo, o holofetša gore ge e ba re tšwela pele re etiša dikgahlego tša Mmušo pele maphelong a rena, o tla hlokomela dinyakwa tša rena ka moka, tša moya le tša nama.—Mat. 6:33; Luka 6:38.

BONTŠHA TEBOGO

15. Ke dilo dife tšeo o lebogago Jehofa ka baka la tšona?

¹⁵ Go ka tšea nako e telele go bala mabaka a mantši ao re nago le ona a go leboga Jehofa. Na ga se therešo gore re swanetše go mo leboga letšatši le letšatši bakeng sa mpho ya bophelo? O re nea dilo ka moka tšeo re di hlokago e le gore re tšwele pele re phela—dijo, diaparo, bodulo gotee le moya woo re o hemago. Go feta moo, tumelo ya rena e theilwego tsebong e nepagetšego, e re nea kholofelo. Re swanetše go rapela Jehofa le go mo neela dihlabelo tša tumišo, ka baka la seo a lego sona le seo a re diretšego sona.—Bala Kutollo 4:11.

16. Re swanetše go arabela bjang sehlabelong sa Kriste sa topollo?

¹⁶ Ka ge re bone sehlogong se se fetilego, mpho e bohlokwahlokwa yeo Modimo a e neilego batho ke sehlabelo sa topollo sa Kriste. Ye ke ponagatšo e kgolo ya lerato la Modimo go rena. (1 Joh. 4:10) Re swanetše go arabela bjang go se? Paulo o itše: “Lerato leo Kriste a nago le lona le a re tutuetša, gobane re phethile ka gore motho o tee o  hwetše bohle; . . . o hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.” (2 Bakor. 5:14, 15) Ge e le gabotse, Paulo o be a bolela gore ge e ba re leboga botho bjo bogolo bja Modimo, re tla diriša maphelo a rena go Mo godiša gotee le go godiša Morwa wa Gagwe. Go rata ga rena Modimo le Kriste gotee le go ba tšeela godimo go bontšhwa ka go kwa ga rena le go kganyoga ga rena go bolela ditaba tše dibotse le go dira barutiwa.—1 Tim. 2:3, 4; 1 Joh. 5:3.

17, 18. Ba bangwe ba okeditše sehlabelo sa bona sa tumišo go Jehofa ka ditsela dife? Nea mohlala.

¹⁷ Na o ka kgona go kaonefatša sehlabelo sa tumišo seo o se neelago Modimo? Ka morago ga go naganišiša ka dilo tše dibotse tšeo Jehofa a ba diretšego tšona, ba bantši ba tutueletšegile go rulaganya nako ya bona le mediro ya bona e le gore ba oketše nako yeo ba e fetšago ba tšea karolo modirong wa go bolela ka Mmušo goba medirong e mengwe ya pušo ya Modimo. Ba bangwe ba ile ba kgona go tšea bobulamadibogo bja go thuša ka kgwedi e tee goba go feta moo ngwaga le ngwaga, mola ba bangwe ba ile ba kgona go ba babulamadibogo ba ka mehla. Ba bangwe bona ba ile ba thuša go agweng ga meago yeo e dirišetšwago mediro ya Mmušo wa Modimo. Na tše ga se ditsela tše dibotse tša go bontšha ga motho gore o a leboga? Ge e ba di dirwa ka maikemišetšo a mabotse—a go bontšha tebogo—ditiro tše tša tirelo e kgethwa di a amogelega go Modimo.

¹⁸ Bakriste ba bantši ba ile ba ikwa ba gapeletšega go leboga Jehofa gomme seo se ile sa ba tutueletša go gata mogato. Yo mongwe wa batho bao leina la gagwe ke Morena. O ile a tsoma dikarabo tša dipotšišo tša gagwe tša mangwalo bodumeding bja Khatolika, e lego bodumedi bjoo a goletšego go bjona, a di tsoma le filosofing ya Asia. Eupša ga go le e tee ya tšona yeo e ilego ya mo nea dikarabo tše di kgotsofatšago. Ke feela ka morago ga gore a thome go ithuta Beibele le Dihlatse tša Jehofa moo lenyora la gagwe la moya le ilego la timolwa. Morena o ile a leboga Jehofa kudu ka baka la dikarabo tša dipotšišo tša gagwe tša moya le kamoo dikarabo tšeo di ilego tša tsepamiša bophelo bja gagwe moo a ilego a nyaka go mo leboga ka gore a diriše matla a gagwe ka moka tirelong ya gagwe. Gateetee ka morago ga go kolobetšwa, o ile a thoma go tšea bobulamadibogo bja go thuša nako le nako gomme go se go ye kae ge maemo a be a mo dumelela, o ile a ba mmulamadibogo wa ka mehla. Seo se diregile nywaga e 30 e fetilego, gomme Morena o sa dutše a le tirelong ya nako e tletšego.

19. O ka kgona bjang go oketša dihlabelo tša gago go Jehofa?

¹⁹ Ke therešo gore go na le bahlanka ba bantši ba botegago ba Jehofa bao maemo a bona a sa ba dumelelego go hlankela e le babulamadibogo. Go sa šetšwe gore ke selo sefe seo re ka kgonago go se dira tirelong ya Jehofa, ka moka ga rena re ka mo neela dihlabelo tšeo di amogelegago tša moya. Boitshwarong bja rena, re swanetše go latela ka kelohloko melao ya motheo ya go loka, re dutše re gopola gore re baemedi ba Jehofa ka dinako tšohle. Ka tumelo, re bota ka mo go feletšego gore merero ya Modimo e tla phethagala. Ka mediro e mebotse, re thuša go phatlalatša ditaba tše dibotse. Ka baka la ge re leboga ka pelo ka moka dilo tšohle tšeo Jehofa a re diretšego tšona, anke re tšweleng pele re direla Jehofa dihlabelo ka moya ka moka.

[Dipotšišo tša Thuto]

[Ntlhakgolo go letlakala 25]

Na go loka ga Jehofa go go tutueletša go kaonefatša sehlabelo sa gago sa tumišo?

[Seswantšho go letlakala 23]

Na o diriša sebaka se sengwe le se sengwe go nea bohlatse?