1, 2. (a) Go tlile bjang gore o dire phetho ya go hlankela Modimo? (b) Ke dipotšišo dife tšeo re ka ipotšišago tšona mabapi le bohwa bja rena bja moya?

BONTŠI bja rena re dirile phetho e bohlale ya go hlankela Jehofa Modimo gomme ra latela dikgato tša Jesu Kriste kgauswi. (Mat. 16:24; 1 Pet. 2:21) Ga re tšeele fase bophelo bja boineelo go Modimo. Re ile ra thea phetho ya rena thutong e tseneletšego ya Lentšu la Modimo, e sego mangwalong a sego kae ao re bego re a tseba. Ka baka la seo, re ile ra ithuta ditaba tše dintši tšeo di tiišago tumelo ya rena tša mabapi le bohwa bjoo Jehofa a bo holofeditšego bao ba ‘mo tsebago gotee le go tseba yo a mo romilego, Jesu Kriste.’—Joh. 17:3; Baroma 12:2.

² E le gore re dule re le Bakriste, re swanetše go dira diphetho tšeo di thabišago Tatago rena wa legodimong. Ka baka leo, sehlogo se se tla ahlaahla dipotšišo tše tše bohlokwa: Bohwa bja rena ke eng? Re swanetše go bo lebelela bjang? Re ka kgonthišetša bjang gore re amogela bohwa bja rena? Ke eng seo se tla re thušago go dira diphetho tše bohlale?

3. Ke bohwa bofe bjoo bo letilego (a) batlotšwa le (b) “dinku tše dingwe”?

³ Ke Bakriste ba sego kae bao ba fagahletšego go amogela “[bohwa] bjo bo sa senyegego le bjo bo sa šilafalago le bjo bo sa hwelelego,” e lego tokelo e sa bapišwego le selo ya go buša le Kriste legodimong. (1 Pet. 1:3, 4) E le gore batho ba ba amogele bohwa bjoo, go nyakega gore ba “tswalwe gape.” (Joh. 3:1-3) Go thwe’ng ka bohwa bja “dinku tše dingwe” tše dimilione tša Jesu tšeo di šomago gotee le balatedi ba gagwe ba tloditšwego modirong wa go bolela ditaba tše dibotse tša Mmušo wa Modimo? (Joh. 10:16) Dinku tše dingwe di tla amogela bohwa bjoo Adama le Efa bao ba dirilego sebe ba sa bo amogelago le ka mohla, e lego bophelo  bjo bo sa felego lefaseng la paradeise moo go se nago tlaišego, lehu goba manyami. (Kut. 21:1-4) Ke ka baka leo Jesu a bego a ka holofetša modiradibe yo a hwilego le yena gore: “Ruri ke go botša lehono, o tla ba le nna Paradeiseng.”—Luka 23:43.

4. Ke ditšhegofatšo dife tšeo re šetšego re di thabela gona bjale?

⁴ Gaešita le gona bjale, re thabela dibopego tše itšego tša bohwa bja rena. Ka ge re na le tumelo go “topollo yeo e lefilwego ke Kriste Jesu,” re na le khutšo ya ka gare le tswalano ya kgauswi le Modimo. (Baroma 3:23-5) Re kwešiša gabotse dikholofetšo tše di kgahlišago tšeo di lego ka Lentšung la Modimo. Go oketša moo, re thabišwa kudu ke go ba karolo ya borwarre bjo bo nago le lerato bja lefase ka bophara. Le gona e tloga e le tokelo e kgolo go ba yo mongwe wa Dihlatse tša Jehofa. Ke ka baka leo re tšeelago godimo bohwa bja rena!

5. Ke eng seo Sathane a ilego a leka go se dira batho ba Modimo, gomme ke eng seo se ka re thušago go lwantšha ditiro tša gagwe tša bohwirihwiri re tiile?

⁵ Lega go le bjalo, e le gore re dule re kgomaretše bohwa bja rena, re swanetše go phafogela maano a Sathane. Ke kgale Sathane a leka go tutueletša batho ba Modimo gore ba dire diphetho tšeo di tla feleletšago ka gore ba lahlegelwe ke bohwa bja bona. (Num. 25:1-3, 9) Ka ge Sathane a lemoga gore o kgauswi le go fedišwa, o dira sohle seo a ka se kgonago gore a re timetše. (Bala Kutollo 12:12, 17.) Ge e ba re tla tšwela pele re “lwantšha ditiro tša bohwirihwiri tša Diabolo [re] tiile,” re swanetše go dula re tšeela godimo bohwa bja rena. (Baef. 6:11) Mo tabeng ye, mohlala wa temošo wa Esau morwa wa mopatriareka Isaka o re ruta dithuto tšeo re swanetšego go di tsenya dipelong tša rena.

6, 7. Esau e be e le mang, gomme o be a letilwe ke bohwa bofe?

⁶ Mo e ka bago nywaga e 4 000 e fetilego, Isaka le Rebeka ba ile ba ba le bana ba babedi ba mafahla, e lego Esau le Jakobo. Ge mafahla ao a dutše a gola, a ile a ba le dimelo tše di fapanego gomme a rata mediro e sa swanego. “Esau [e ile] ya ba monna wa go tseba go tsoma, monna wa go phela nageng,” eupša “Jakobo yena ya ba monna wa go se be le bosodi, wa go dula ditenteng.” (Gen. 25:27) Mofetoledi wa Beibele e lego Robert Alter, o re: “Lentšu la Seheberu leo le fetoletšwego e le ‘go se be le bosodi,’ le tšweletša kgopolo ya go botega goba gaešita le go hloka molato.”

⁷ Ge Esau le Jakobo ba be ba na le nywaga e 15, rakgolo wa bona Aborahama o ile a hwa, eupša kholofetšo yeo Jehofa a bego a e dirile go Aborahama ga se ya ka ya hwelela. Ka morago, Jehofa o ile a e bušeletša go Isaka, a bontšha gore ditšhaba ka moka tša lefase di be di tla šegofatšwa ka peu ya Aborahama. (Bala Genesi 26:3-5.) Kholofetšo yeo e ile ya utolla gore Mesia, e lego “peu” e botegago yeo go boletšwego ka yona go Genesi 3:15, o be a tla tšwelela go bana ba Aborahama. Ka ge Esau e be e le morwa wa Isaka wa leitšibulo, o be a na le tshwanelo ya molao ya go phethagatša kholofetšo yeo. Ruri Esau o be a letilwe ke bohwa bjo bo kgahlišago! Na o ile a bo tšeela godimo?

8, 9. (a) Esau o ile a dira phetho efe ka bohwa bja gagwe? (b) Ke eng seo Esau a ilego a se lemoga ka phetho ya gagwe nywaga ka morago, gomme o ile a arabela bjang?

⁸ Ka letšatši le lengwe ge Esau a be a etšwa nageng, o ile a hwetša Jakobo “a apeile sejo sa dihlodi.” Esau a napa a re go yena: “Hle nnee bohwibidu bjoo kapejana ke je—bohwibidu bjo bo lego moo, ka gobane ke lapile!” Jakobo o ile a fetola Esau ka gore: “Thoma pele ka go nthekišetša tshwanelo ya gago ya go ba leitšibulo!” Esau o ile a dira phetho efe? Se se makatšago ke gore o ile a mo araba a re: “Tshwanelo ya go ba leitšibulo e tla nkhola ka eng?” Ee, Esau o ile a kgetha sejo sa dihlodi go e na le tshwanelo ya go ba leitšibulo! E le gore a kgonthišetše gore o tšea tshwanelo ya go ba leitšibulo ka molao, Jakobo o ile a phegelela Esau ka go mmotša gore: “Nkenele pele!” Esau o ile a lahla tshwanelo ya gagwe ya go ba leitšibulo ntle le go dikadika. Ka morago ga moo, “Jakobo a nea Esau senkgwa le sejo sa dihlodi, yena a ja a ba a nwa. Ke moka a emelela a tloga. Ke  kamoo Esau a nyaditšego tshwanelo ya go ba leitšibulo ka gona.”—Gen. 25:29-34.

⁹ Nywaga ka morago ga moo, ge Isaka a be a nagana gore o kgauswi le go hwa, Rebeka o ile a dira ditokišetšo tša go kgonthišetša gore Jakobo o amogela tshwanelo ya go ba leitšibulo yeo Esau a bego a e lahlile. Ge Esau a lemoga ka morago ga ge nako e šetše e ile gore o dirile phetho ya bošilo, o ile a kgopela Isaka a wele ka matolo gore: “Tate, ntšhegofatše, le nna ntšhegofatše hle! . . . Na ga se wa ntšhadišetša tšhegofatšo?” Ge Isaka a mmotša gore o be a ka se fetoše tšhegofatšo yeo a bego a šetše a šegofaditše Jakobo ka yona, “Esau [o ile] a hlaboša lentšu a ba a phula sello.”—Gen. 27:30-38.

10. Jehofa o ile a lebelela bjang Esau le Jakobo, gona ka baka la’ng?

¹⁰ Ke semelo sefe sa Esau seo se tsebjago kudu ka Mangwalong? O ile a bontšha gore go kgotsofatša dikganyogo tša gagwe tša nama go be go le bohlokwa kudu go yena go feta go amogela ditšhegofatšo tša nakong e tlago tšeo di bego di tla tšwelela bohweng bja gagwe. Esau ga se a ka a tšeela godimo tshwanelo ya gagwe ya go ba leitšibulo e bile go molaleng gore o be a sa rate Modimo ka pelo ka moka. Go oketša moo, Esau o ile a hlokomologa ditlamorago tšeo boitshwaro bja gagwe bo bego bo tla ba le tšona baneng ba gagwe. Eupša, Jakobo yena o be a tšeela godimo bohwa bja gagwe. Ka mohlala, Jakobo o ile a latela taelo ya batswadi ba gagwe tabeng ya go kgetha mosadi. (Gen. 27:46–28:3) Ka ge Jakobo a ile a dira kgetho yeo e nyakago gore a se fele pelo e bile a ikgafe, o ile a feleletša e le rakgolokhukhu wa Mesia. Modimo o ile a lebelela bjang Esau le Jakobo? Jehofa o ile a bolela ka moporofeta Maleaki gore: “Nna ke ratile Jakobo, Esau yena ke mo hloile”—Mal. 1:2, 3.

11. (a) Ke ka baka la’ng mohlala wa Esau o hola rena Bakriste lehono? (b) Ke ka baka la’ng Paulo a ile a tswalanya tiro ya Esau le bootswa?

¹¹ Na seo Beibele e se bolelago ka Esau se hola Bakriste lehono? Ruri go bjalo. Moapostola Paulo o lemošitše badumedigotee le yena gore ba hlokomele gore gare ga bona “go se ke gwa ba le seotswa le ge e le motho yo a sa lebogego dilo tše kgethwa, go swana le Esau yo a gafilego ditshwanelo tša gagwe tša go ba leitšibulo ka go di ananya ka sejo setee.” (Baheb. 12:16) Temošo yeo e sa dutše e šoma go Bakriste lehono. Re swanetše go dula re tšeela godimo dilo tša moya e le gore re se fenywe ke dikganyogo tša nama gomme ra lahlegelwa ke bohwa bja rena bja moya. Eupša ke ka baka la’ng Paulo a ile a tswalanya tiro ye ya Esau le bootswa? Ke ka gobane go kganyoga dilo tša nama ka tsela yeo Esau a dirilego ka yona go oketša kgonagalo ya gore motho a lahle dilo tše kgethwa e le feela gore a thabele maipshino a gobogilego, a bjalo ka go dira bootswa.

12. (a) Sathane o bea bjang meleko tseleng ya rena? (b) Nea mehlala ya Mangwalo yeo e ka re thušago ge re lebane le diphetho tše boima.

¹² Ga go pelaelo gore ka ge re le bahlanka  ba Jehofa ga re ipakele mathata ka go ipea maemong ao a lekago ao a ka lebišago boitshwarong bjo bo gobogilego bja tša botona le botshadi. Go e na le moo, re rapelela gore Jehofa Modimo a se re dumelele go wela molekong ge motho yo mongwe a re leka gore re se Mo kwe. (Mat. 6:13) Eupša Sathane o tšwela pele a leka go re wiša moyeng ge re dutše re katanela go dula re botega lefaseng le leo le gobogilego. (Baef. 6:12) Ka ge Diabolo e le modimo wa tshepedišo ye e kgopo ya dilo, o tseba kamoo a ka dirišago gampe dikganyogo tša rena tše sa phethagalago ka gore a bee tseleng ya rena meleko yeo e tlwaelegilego bathong ba sa phethagalago. (1 Bakor. 10:8, 13) Ka mohlala, nagana o le boemong bjoo o ka kgotsofatšago ka tsela e gobogilego kganyogo e itšego ya nama. O tla dira eng boemong bjoo? Na o tla swana le Esau gomme wa re: ‘Dira kapejana! Nnee!’ Goba na o tla ganetša teko yeo gomme wa tšhaba boemong bjoo go swana le morwa wa Jakobo e lego Josefa, yo a ilego a lekwa ke mosadi wa Potifara?—Bala Genesi 39:10-12.

13. (a) Ke ka tsela efe lehono ba bangwe ba ilego ba itshwara bjalo ka Josefa eupša ba bangwe ba itshwara bjalo ka Esau? (b) Mehlala ya bao ba itshwarago bjalo ka Esau e re gopotša ka selo sefe seo re swanetšego go se dira?

¹³ Bana babo rena ba bantši le dikgaetšedi ba ile ba ba maemong ao ba ilego ba swanelwa ke go kgetha go itshwara go swana le Esau goba Josefa. Ba bantši ba ile ba dira diphetho tše bohlale gomme ba thabiša pelo ya Jehofa. (Die. 27:11) Lega go le bjalo, ba bangwe ba badumedigotee le rena ge ba be ba lebane le moleko ba ile ba kgetha go itshwara bjalo ka Esau, ba bea bohwa bja bona bja moya kotsing. Ge e le gabotse, batho ba bantši bao ba tšwelelago pele ga dikomiti tša boahlodi le bao ba kgaolwago ngwaga le ngwaga ke ka baka la ge ba ile ba itshwara ka tsela e gobogilego ka tša botona le botshadi. Ruri go tloga go le bohlokwa gore re lokišetše dipelo tša rena gona bjale—nako e telele pele ga ge re ka ikhwetša re le maemong ao a lekago potego ya rena! (Ps. 78:8) Go na le megato e mebedi yeo re ka e gatago yeo e tla re thušago go itšhireletša ge re lekwa le go re thuša go dira diphetho tše bohlale nakong yeo.

14. Ke dipotšišo dife tšeo ge e ba re naganišiša ka tšona di tla re thušago gore ‘re hlaswe se kgopo’ gomme re “kgomarele go se sebotse”?

¹⁴ Mogato wa pele o akaretša go naganišiša ka ditlamorago tša boitshwaro bja rena. Tekanyo yeo re tšeelago godimo bohwa bja rena bja moya e ithekgile kudu ka tekanyo yeo re ratago Jehofa ka yona, e lego yena Yo a re neilego bohwa bjoo. Ge e le gabotse, ge e ba re rata motho, ga nke re nyaka go mo kweša bohloko. Go e na le moo, re lwela gore a dule a re amogela. Ka ge seo se le bjalo, re dira gabotse ge re ipha nako ya go naganišiša ka ditlamorago tšeo di tlago go wela rena le ba bangwe ge e ba re ineela dikganyogong tše sa hlwekago tša nama. Re swanetše go ipotšiša gore: ‘Boitshwaro bja ka bja boithati bo tla kgoma bjang tswalano ya ka le Jehofa? Boitshwaro bja ka bjo bo fošagetšego bo tla kgoma bjang lapa la ka? Bo tla kgoma bjang bana bešo le dikgaetšedi ka phuthegong? Na ke tla kgopiša ba bangwe?’ (Bafil. 1:10) Re ka ba ra ipotšiša le gore: ‘Na metsotswana e sego kae yeo ke tlago go thabela boitshwaro bjo bo gobogilego ka yona e tloga e lekana le bohloko bjoo phetho ya ka e tlago go bo tliša? Na ke tloga ke nyaka go feleletša ke swana le Esau, ke phula sello gabohloko ka morago ga ge ke lemogile seo ke se dirilego?’ (Baheb. 12:17) Go naganišiša ga rena ka dipotšišo tše bjalo go tla re thuša gore ‘re hlaswe se kgopo’ gomme re “kgomarele go se sebotse.” (Baroma 12:9) Lerato leo re ratago Jehofa ka lona le tla re thuša kudu gore re kgomarele bohwa bja rena.—Ps. 73:28.

15. Ke eng seo se tla matlafatšago maikemišetšo a rena a go lwantšha dilo tšeo di ka beago bomoya bja rena kotsing?

¹⁵ Mogato wa bobedi o akaretša go matlafatša boikemišetšo bja rena bja go dula re botega. Jehofa o re diretše ditokišetšo tše dintši tša gore  re matlafatše maikemišetšo a rena a go lwantšha dilo tša lefase tšeo di ka beago bomoya bja rena kotsing. Ditokišetšo tša gagwe di akaretša go ithuta Beibele, diboka tša Bokriste, bodiredi bja tšhemo le thapelo. (1 Bakor. 15:58) Ka mehla ge re tšhollela dipelo tša rena go Jehofa ka thapelo e bile re tšea karolo ka botlalo bodireding bja Bokriste, go ba bjalo ka ge eka re matlafatša boikemišetšo bja rena bja go fenya meleko. (Bala 1 Timotheo 6:12, 19.) Go fihla bokgoleng bjo itšego, matla ao re bago le ona gore re itšhireletše a ithekgile ka maiteko ao re a dirago. (Bagal. 6:7) Seo se bontšhitšwe gabotse kgaolong ya bobedi ya puku ya Diema.

16, 17. Re ka hwetša bjang bokgoni bja go dira diphetho tše bohlale?

¹⁶ Diema kgaolo 2 e re kgothaletša gore re hwetše bohlale le tlhaologanyo. Dimpho tšeo di re thuša gore re kgone go kgetha magareng ga se se nepagetšego le se se fošagetšego, magareng ga boitayo le boithati. Eupša go atlega ga rena go dira seo go ithekgile ka go ikemišetša ga rena go dira boiteko. Beibele e gatelela therešo yeo e bohlokwa ka go bolela gore: “Morwa wa ka, ge o ka amogela mantšu a ka gomme wa lota ditaelo tša ka, e le gore o sekegele bohlale tsebe le gore pelo ya gago e rate temogo; le gona ge o ka goeletša kwešišo gomme wa hlabošetša temogo lentšu la gago, ge o ka tsoma bohlale bjalo ka silifera gomme wa bo tsoma bjalo ka matlotlo a utilwego, gona o tla lemoga go boifa Jehofa gomme wa ba le tsebo ka ga Modimo. Jehofa o nea bohlale; tsebo le temogo di tšwa molomong wa gagwe.”—Die. 2:1-6.

¹⁷ Ka gona, go molaleng gore go atlega ga rena gore re be le bokgoni bja go dira diphetho tše bohlale go ithekgile ka gore re fihlelele dinyakwa tšeo go boletšwego ka tšona pukung ya Diema. Re ka fenya meleko ge re ka dumelela mantšu a Jehofa a bopa motho yo re lego yena ka gare, ge re ka rapelela tlhahlo ya Modimo re sa kgaotše le ge re ka dula re tsoma tsebo ya Modimo bjalo ka mahumo a utilwego.

18. Ke eng seo o ikemišeditšego go tšwela pele o se dira, gona ka baka la’ng?

¹⁸ Jehofa o nea tsebo, kwešišo, temogo le bohlale go bohle bao ba dirago boiteko bja go nyaka dimpho tše. Ge re fetša nako e ntši re di nyaka e bile re di diriša, ke gona moo re tla batamelago kgauswi kudu le Yo a re neago tšona, Jehofa. Le gona, tswalano ya rena ya kgauswi le Jehofa Modimo e tla re šireletša ge re lebeletšane le meleko. Go batamela ga rena kgauswi le Jehofa le go mmoifa go tla re šireletša gore re se wele bobeng. (Ps. 25:14; Jak. 4:8) Eka segwera seo re nago le sona le Jehofa gotee le go diriša ga rena bohlale bja gagwe di ka re šušumeletša gore ka moka ga rena re tšwele pele re dira diphetho tšeo di tlago go thabiša pelo ya Jehofa gomme ra šireletša bohwa bja rena.