Na Tšhelete ke Mothopo wa Lethabo la Kgonthe?

SONIA o belegetšwe Sepania. Ge e be e sa le ngwana, o be a e-ya le mmagwe dibokeng tša Dihlatse tša Jehofa. Eupša ge a šetše a gotše, o ile a hudugela London, Engelane, gomme a feleletša a hweditše mošomo intasetering ya tša ditšhelete.

Sonia o be a rata mošomo wa gagwe. O be a gola tšhelete e ntši gomme a direla batho dipeeletšo tše dikgolo. O be a thabela mošomo wa gagwe gomme a o kgona. Sonia o be a šoma diiri tše 18 ka letšatši gomme mašego a mangwe o be a robala diiri tše pedi goba tše tharo. O be a phelela mošomo wa gagwe. Ke moka, bophelo bja gagwe bo ile bja fetoga o šoro ka ponyo ya leihlo. Sonia o ile a hwa lehlakore gabohloko—mohlomongwe ka baka la bophelo bja gagwe bjo bo gateletšago. O be a e-na le nywaga e 30 feela.

Sonia o ile a golofala lehlakore gomme dingaka di be di sa kgonthišege gore o be a tla kgona go bolela gape. Gatee-tee mmagwe o ile a ya Engelane go yo mo hlokomela. Ge Sonia a be a thoma go sepela gape, mmagwe o ile a mmotša gore, “Ke ya dibokeng tša phuthego gomme o swanetše go ya le nna ka gobane nka se go tlogele o nnoši.” Sonia o ile a dumela go sepela le yena. Mafelelo e bile afe?

Sonia o gopola ka gore: “Se sengwe le sengwe seo ke bego ke se kwa se be se kwagala e le therešo. Se be se kgahliša kudu. Ke ile ka amogela ka lethabo go ithuta Beibele le yo mongwe wa ba bantši bao ba ilego ba ntumediša ge ke be ke ile Holong ya Mmušo ka lekga la pele. Bagwera ba-ka ba nakong e fetilego ba ile ba kgaotša go nketela, eupša bagwera ba-ka ba bafsa e be e le ba borutho le ba nago le tlhokomelo.”

Ganyenyane-ganyenyane, Sonia o ile a kgona go bolela gape, gomme a dira le tšwelopele ya moya ka go akgofa. Ka nako ya ka tlase ga ngwaga, o ile a kolobetšwa. Ba bantši ba bagwera ba gagwe ba bafsa ba be ba le bodireding bja Bokriste bja nako e tletšego gomme o ile a bona kamoo ba bego ba thabile ka gona. Sonia o ile a nagana ka gore: ‘Le nna ke nyaka go swana le bona. Ke nyaka go nea Jehofa sohle seo nka se kgonago!’ Ga bjale Sonia o bodireding bja nakong e tletšego.

Sonia o ithutile’ng go tšwa phihlelong ya gagwe? “Gaešita le ge ke be gola tšhelete e ntši, kgateletšego le go boifa go lahlegelwa ke mošomo di dirile gore ke tshwenyege e bile ke se thabe. Lebakeng le ke lemoga gore selo se bohlokwa kudu bophelong ke go ba le tswalano e botse le Tate wa legodimong, Jehofa. Ga bjale ke thabile e le ka kgonthe.”

Moapostola Paulo o ngwadile gore: “Lerato la tšhelete ke modu wa mehuta ka moka ya dilo tše di gobatšago, gomme ka go phegelela lerato le, ba bangwe ba ile ba arošwa tumelong gomme ba itlhabile gohle ka mahloko a mantši.” (1 Timotheo 6:10) Sonia a ka hlatsela therešo ya mantšu a.