Batamela Kgaufsi le Modimo

Mophethagatši wa Dikholofetšo

Jošua 23:14

NA O thatafalelwa ke go bota batho ba bangwe? Ka manyami, re phela lefaseng leo go lona potego e senywago ka mehla. Ge e ba o kile wa kwešwa bohloko ke motho yoo o bego o mmota—mohlomongwe ka baka la maaka goba dikholofetšo tše sa phethagatšwego—potego ya gago e ka ba e sentšwe. Lega go le bjalo, go na le motho yo mongwe yoo o ka mmotago yoo le ka mohla a ka se go nyamišego. Diema 3:5 e re nea kgothatšo e rego: “Bô’ta [Jehofa] ka pelo ka moka.” Ke ka baka la’ng Jehofa a swanelwa ke potego e bjalo? Go araba potšišo yeo, a re hlahlobeng mantšu a Jošua—monna yoo a bego a bota Jehofa ka mo go feletšego—ao a begilwego go Jošua 23:14.

Ela hloko boemo. Jošua, mohlatlami wa Moše e le moetapele wa Isiraele, o obelela nywaga e 110. Nakong ya bophelo bja gagwe bjo botelele, o ile a bona ka noši ditiro tše dintši tše matla tšeo Jehofa a di diretšego Isiraele, go akaretša le phološo ya mohlolo ya go phatša Lewatle le le Hwibidu nywageng e 60 pele ga moo. Ga bjale, ge a dutše a nagana ka bophelo bja gagwe, Jošua o kgobokanya “baxolo ba [Isiraele], le balaodi ba bôná, le baahlodi ba bôná.” (Jošua 23:2) Mantšu ao a a bolelago ga bjale ga a utolle feela bohlale bjo bo tlago le nywaga eupša gape a utolla le dikgopolo tše tseneletšego tša pelo e tletšego tumelo.

Jošua o hlalosa ka gore: “Nna byale ke tloxa ka tsela ya bohle ba lefase.” Polelwana e rego “tsela ya bohle ba lefase” ke seka-polelo seo se bolelago lehu. Ge e le gabotse, Jošua o bolela gore, “Ga ke sa le kgole le go hwa.” Ka ge a tseba gore o kgaufsi le go hwa, ka ntle le pelaelo Jošua o ile a fetša diiri tše dintši a nnoši a naganišiša ka bophelo bja gagwe. Ke mantšu afe a mafelelo ao a tlago go laela barapedi-gotee le yena ka ona?

Jošua o tšwela pele ka gore: “[Ga se gwa] ka xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše; xa xo na le setee se se hlokexilexo.” A ke mantšu a monna yoo a botago Modimo ka mo go feletšego. Ka baka la’ng? A nagana ka sohle seo a kilego a se bona, Jošua o tseba gore Jehofa o phethagatša dikholofetšo tša Gagwe—o dira bjalo ka mehla. * Morero wa mantšu ao o molaleng: Jošua o nyaka gore Baisiraele-gotee le yena ba be le tumelo e feletšego ya gore dikholofetšo tša Jehofa tša mabapi le bokamoso bja bona le tšona di be di tla phethagala.

Ge e hlalosa Jošua 23:14, puku e nngwe e hlalosago mantšu a Beibele e re: “Gopola ka boporofeta bjo bongwe le bjo bongwe bja ka Beibeleng; ke moka o nyakišiše dihistoring tša lefase; gomme o botšiše ka sephedi se sengwe le se sengwe go lona, bakeng sa go hwetša tiragalo e tee ya Modimo ya go se dumelelane le goba ya go lebala kholofetšo.” Ge e ba go dira tlhahlobo e bjalo go be go kgonega, re be re tla fihlelela phetho e swanago le ya Jošua—dikholofetšo tša Jehofa ka mehla di a phethagala.—1 Dikxoši 8:56; Jesaya 55:10, 11.

Beibele e hupere pego ya dikholofetšo tša Modimo tšeo di phethagetšego, go akaretša le tšeo di phethagalago gona bjale. Gape e hupere dikholofetšo tše kgahlišago tša Jehofa tša mabapi le bokamoso bja rena. * O re’ng o sa hlahlobe pego yeo ka bowena? Thuto ya Beibele e ka go kgodiša gore o swanetše go bota Mophethagatši wa dikholofetšo.

[Mengwalo ya tlase]