Ditsela tša go Hwetša Lethabo la Lapa
Go Godiša Bana Gore ba be le Boikarabelo
George: * “Mantšiboeng a mangwe le a mangwe go be go direga selo se swanago. Michael, morwa wa-ka wa nywaga e mene, o ile a tlogela dibapadišwa tša gagwe di phatlaletše ka ntlong. Ke ile ka leka go dira gore a di phuthe pele a e-ya malaong. Eupša Michael o be a ferekana o šoro, a goeletša le go itshwara ka mo go sa swanelago. Ka dinako tše dingwe ke be ke ferekana kudu moo ke bego ke mo omanya, eupša se se be se fo dira gore bobedi bja rena re ikwe re se ra thaba. Ke be ke nyaka gore nako ya go ya malaong e be e thabišago. Ka gona, ke ile ka tlogela go leka go mmotša gore a di phuthe gomme ka fo di phutha.”
Emily: “Bothata bo thomile ge morwedi wa-ka wa nywaga e 13, Jenny, a thatafalelwa ke go kwešiša seo morutiši a bego a se nyaka bakeng sa mošomo wa sekolong. Jenny o ile a fetša iri a lla ge a boa gae a e-tšwa sekolong. Ke ile ka mo kgothaletša gore a kgopele thušo sekolong, eupša Jenny o ile a bolela gore morutiši wa gagwe o be a se botho, ka go rialo, o be a se na sebete sa go bolela le yena. Ke ile ka lekega go ya sekolong gomme ka ya go omanya morutiši. Ke be ke nagana gore ga go na motho yo a nago le tshwanelo ya go tshwenya morwedi wa-ka!”
NA O ikwa ka tsela yeo George le Emily ba ikwago ka yona? Go swana le batswadi bao, batho ba bantši ba thatafalelwa ke go bona ngwana a katana le bothata goba a se a thaba. Ke ga tlhago gore batswadi ba leke go šireletša bana ba bona. Lega go le bjalo, maemo ao a hlalositšwego ka mo godimo ge e le gabotse a be a nea batswadi bao sebaka sa go ruta bana ba bona thuto e bohlokwa ya go ba le boikarabelo. Ke therešo gore seo ngwana yo a nago le nywaga e 4 le seo ngwana yo a nago le nywaga e 13 ba ka ithutago sona se tla fapana.
Lega go le bjalo, therešo ke gore o ka se kgone go dula o šireletša ngwana wa gago mathateng a bophelo. Mafelelong, ngwana o tla tlogela tatagwe le mmagwe gomme “o tla rwala morwalo wa gagwe” wa boikarabelo. (Bagalatia 6:5; Genesi 2:24) Go dira gore bana ba kgone go itlhokomela, batswadi ba swanetše go lebiša tlhokomelo pakaneng ya go ba ruta go ba batho ba bagolo ba se nago boithati, ba nago le tlhokomelo le boikarabelo. Go dira bjalo ga go bonolo!
Se se kgahlišago ke gore batswadi ba na le mohlala woo ba ka o ekišago wa Jesu le tsela yeo a ilego a dirišana le barutiwa ba gagwe ka yona. Jesu e be e se motswadi. Eupša pakane ya gagwe ya go kgetha le go tlwaetša barutiwa ba gagwe e be e le go ba thuša go tšwetša pele modiro woo, gaešita le ge a be a se gona. (Mateo 28:19, 20) Seo Jesu a ilego a se dira se swana le pakane yeo motswadi yo mongwe le yo mongwe a holofetšego go e fihlelela ka go godiša bana gore ba be le boikarabelo. Ela hloko dibopego tše tharo tša mohlala woo Jesu a o beetšego batswadi.
‘Beela Bana ba Gago Mohlala’
Bofelong bja bophelo bja gagwe, Jesu o ile a botša barutiwa ba gagwe gore: “Ke le beetše mohlala gore go etša ge ke dirile go lena, le lena le dire bjalo.” (Johane 13:15) Ka mo go swanago, batswadi ba swanetše go hlalosa le go bontšha ka mohlala seo ge e le gabotse go ba le boikarabelo e lego sona.
Ipotšiše gore: ‘Na ke dula ke bolela ka go hlokomela boikarabelo bja-ka ka tsela e nepagetšego? Na ke bolela ka kgotsofalo yeo ke e hwetšago ge ke šomela ba bangwe ka thata? Goba gantši ke a ngongorega e bile ke ipapetša le bao go bonagalago ba phela ka boiketlo?’
Ke therešo gore ga go na motho yo a phethagetšego. Ka dinako tše dingwe, ka moka ga rena re ka ikwa re imetšwe. Eupša go ka direga gore mohlala wa gago ke tsela e matla kudu ya go thuša bana ba gago go bona bohlokwa bja go itshwara ka tsela e bontšhago boikarabelo.
LEKA MOKGWA WO: Ge e ba go kgonega, ka dinako tše dingwe o ka ya le ngwana wa gago mošomong wa boiphedišo gomme o mmontšhe seo o se dirago bakeng sa go hlokomela lapa ka tša ditšhelete. Thuša motho yo a nyakago thušo o e-na le ngwana wa gago. Ka morago ga moo, bolela le yena ka lethabo leo o le hweditšego ge o phetha boikarabelo bjoo.—Ditiro 20:35.
E-ba le Ditebelelo tše Leka-lekanego
Jesu o ile a lemoga gore go be tla tšea nako pele barutiwa ba gagwe ba ka kgona go thomološa mediro le boikarabelo bjoo a bego a letetše gore ba bo phethe. O kile a ba botša gore: “Ke sa na le dilo tše dintši tšeo nka le botšago tšona, eupša ga le kgone go di rwala ga bjale.” (Johane 16:12) Jesu ga se a kgopela barutiwa ba gagwe e sa le semeetseng gore ba dire selo le ge e le sefe ba nnoši. Go e na le moo, o ile a fetša nako e ntši a ba ruta dilo tše dintši. Ke feela ge a be a nagana gore ba be ba ka kgona go dira modiro wo moo Jesu a ilego a romela barutiwa ba gagwe ba nnoši.
Ka mo go swanago, ke mo go sa kwagalego gore batswadi ba lebelele gore bana ba phethe boikarabelo bja batho ba bagolo pele ga nako. Lega go le bjalo, ge bana ba dutše ba gola, batswadi ba swanetše go dira phetho ya gore ke dilo dife le mešomo efe yeo e ba swanetšego. Ka mohlala, batswadi ba swanetše go ruta bana ba bona go ba ba ikarabelago ge go tliwa bohlweking bja motho ka noši, go hlwekiša phapoši ya bona, go swara nako le go diriša tšhelete ka bohlale. Ge ngwana a thoma go tsena sekolo, batswadi ba swanetše go letela gore ngwana a lebelele mošomo wa gagwe wa sekolong e le boikarabelo bjo bo bohlokwa bjoo ngwana a swanetšego go bo phetha.
Go nyakega gore batswadi ba dire se fetago go abela bana ba bona boikarabelo. Le gona ba swanetše go thekga maiteko a ngwana a gore a atlege. George, tate yo go boletšwego ka yena pejana, o ile a lemoga gore lebaka le lengwe leo le bego le dira gore Michael a ferekane ge a bea dibapadišwa tša gagwe lefelong la tšona ke gore e be e le modiro o bonagalago e le o mogolo. George o re: “Go e na le go fo omanya Michael gore a tope dibapadišwa tša gagwe, ke ile ka leka go mo ruta tsela ya kamoo a ka dirago modiro woo.”
Ke’ng seo ka go lebanya a ilego a se dira? George o re: “Sa mathomo, ke ile ka bea nako yeo ka yona a swanetšego go phutha dibapadišwa bošego bjo bongwe le bjo bongwe. Ke moka ke ile ka šoma gotee le Michael, ka dira karolo e nngwe ya phapoši. Modiro woo ke ile ka o dira papadi, gaešita le go o dira phadišano go bona yoo a ka fetšago pele. Go se go ye kae, modiro wo e ile ya ba karolo ya seo re se dirago ka mehla nakong ya go ya malaong. Ke ile ka holofetša Michael gore ge e ba a ka dira mošomo wo ka go akgofa, ke be ke tla mmalela kanegelo e nngwe ge a e-ya malaong. Eupša ge e ba a se a o dira ka nako e beilwego, nako ya go mmalela kanegelo e be e tla fokotšwa.”
LEKA MOKGWA WO: Hlahloba seo go ka letelwago gore ngwana yo mongwe le yo mongwe wa gago a se dire seo se tla tlaleletšago go direng gore dilo ka lapeng la gago di sepele ka thelelo. Ipotšiše, ‘Na go na le dilo tšeo ke sa dutšego ke di direla bana ba-ka tšeo ba ka itirela tšona?’ Ge e ba go le bjalo, šoma le bana ba gago go fihlela o kgonthišega gore ba ka kgona go phetha mošomo woo ka bobona. Bontšha gabotse gore go tla ba le ditla-morago, e ka ba tše dibotse goba tše mpe, go ithekgile ka gore bana ba phetha modiro wo ba o abetšwego gabotse gakaaka’ng. Ke moka, o ka phethagatša ditla-morago goba wa ba putsa.
Nea Ditaelo tše Lebanyago
Jesu, go fo swana le morutiši yo mongwe le yo mongwe yo botse, o be a tseba gore tsela e kaone kudu ya go ithuta ke ka go dira. Ka mohlala, ge Jesu a be a nagana gore e be e le nako e swanetšego, o ile a roma barutiwa gagwe “ka babedi ka babedi gore ba mo ete pele ba tsene motseng o mongwe le o mongwe le lefelong le lengwe le le lengwe leo a bego a tla tla go lona.” (Luka 10:1) Lega go le bjalo, ga se a ba tlogela ntle le thušo. Pele a ka ba roma, o ile a ba nea ditaelo tše lebanyago. (Luka 10:2-12) Ge barutiwa ba boa e bile ba bega ka katlego ya bona, Jesu o ile a ba reta le go ba kgothatša. (Luka 10:17-24) O bontšhitše kgodišego ya gagwe bokgoning bja bona gotee le go bontšha kamogelo ya gagwe.
Ge bana ba gago ba lebeletšane le boikarabelo bjo bo hlohlago, o arabela bjang? Na o nyaka go šireletša bana ba gago dilong tšeo ba di boifago, tšeo di ka ba tlišetšago manyami le go palelwa? Selo sa pele seo o ka ikwago o nyaka go se dira ke go phološa ngwana wa gago goba go rwala morwalo woo ka noši.
Eupša ela hloko: Nako le nako ge o kitimela go phološa bana ba gago ka tsela e itšego, o nyaka gore ba ithute eng? Na o bontšha gore o a ba bota le go ba le tumelo bokgoning bja bona? Goba na o ba botša gore o sa dutše o nagana gore ke masea a sa kgonego selo, ao a swanetšego go ithekga ka wena bakeng sa selo se sengwe le se sengwe?
Ka mohlala, Emily, yo go boletšwego ka yena pejana, o ile a lebeletšana bjang le bothata bja morwedi wa gagwe? Go e na le go tsena-tsena ditaba gare, o ile a phetha ka go dumelela Jenny gore a boledišane le morutiši yoo ka go lebanya. Ba le gotee, Emily le Jenny ba ile ba ngwala lelokelelo la dipotšišo tšeo Jenny a swanetšego go ya le tšona sekolong. Ke moka ba ile ba ahla-ahla taba ya gore o swanetše go boledišana le morutiši neng. Ba ile ba ba ba dira pontšho ya kamoo poledišano e ka bago ka gona. Emily o re: “Jenny o ile a ba le sebete sa go boledišana le morutiši wa gagwe gomme morutiši o ile a mo reta bakeng sa go gata ga gagwe mogato wa pele. Jenny o be a tloga a thabela seo a se dirilego—le nna ke be ke ikgantšha ka yena.”
LEKA MOKGWA WO: Ngwala tlhohlo yeo ga bjale ngwana wa gago a lebeletšanego le yona. Kgaufsi le tlhohlo yeo, ngwala seo o ka se dirago bakeng sa go thuša ngwana wa gago go lebeletšana le tlhohlo yeo ntle le go mo phološa. Dira pontšho le ngwana wa gago ya megato yeo e nyakegago gore a fenye tlhohlo yeo. Bontšha gore o kgodišegile gore ngwana wa gago o na le bokgoni.
Ge e ba o dula o šireletša bana ba gago mathateng, ge e le gabotse o ka šitiša bokgoni bja bona bja go lebeletšana le ditlhohlo tša bophelo. Go e na le moo, matlafatša bana ba gago ka go ba godišetša gore ba amogele boikarabelo. Ka go dira bjalo o tla be o ba nea mpho e bohlokwa kudu.
^ ser. 3 Maina a fetotšwe.
IPOTŠIŠE GORE . . .
Na ke na le ditebelelo tše di kwagalago ka bana ba-ka?
Na ke a ba botša le go ba bontšha seo ba swanetšego go se dira gore ba atlege?
Ke ile ka reta le go kgothatša ngwana wa-ka neng la mafelelo?
You May Also Like
PHAFOGA!
Bohlokwa bja Mešongwana ya ka Gae
Na o dikadika go nea bana ba gago mešongwana ya ka gae? Ge e ba go le bjalo, ela hloko kamoo go thuša ka mešongwana ya ka gae go ka ba rutago go ba le boikarabelo le go dira gore ba thabe.
PHAFOGA!
Go Godiša Bana ba Botho Lefaseng le Nago le Moya wa Nna Pele
Ela hloko dikarolo tše tharo tšeo go tšona o ka thušago bana ba gago go phema go ba le moya wa nna pele.
LENYALO LE LAPA
Ruta Ngwana wa Gago go Phegelela
Ge o bona ngwana wa gago a thatafalelwa ke go dira mošomo o itšego, na o kitimela go mo thuša? Goba na o ka mo ruta go fenya mathata?
PHAFOGA!
Go Ruta Bana Boikokobetšo
Ruta ngwana wa gago go ba le boikokobetšo ntle le go mo dira gore a ikwe a inyatša.