Babadi ba Rena ba a Botšiša . . . 

Na Modimo o Bile le Mathomo?

▪ Beibele e araba ka gore Modimo ga se a ka a ba le mathomo. Modimo o be a le gona ka mehla. Le ge kgopolo ya go ba gona ka go sa felego ga Modimo e le thata go kwešišega, re ka se fo e gana e le feela ka gobane re ka se e kwešiše ka botlalo.

Na ruri go a kwagala gore re letele gore re tla kwešiša ditsela tša Modimo ka moka? Moapostola Paulo o boletše gore: “A bodiba bja mahumo a Modimo le bohlale le tsebo! Dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego gakaakang!” (Baroma 11:33) Menagano ya rena e ka se kgone go kwešiša go iša ga bohlale bja Modimo le tsebo ya gagwe go swana le ge ngwana a ka se kgone go kwešiša ditsela tšohle tša motswadi wa gagwe. Mantšu a a buduletšwego a Paulo, le ge a hlalosa dika tša moswana-noši tša Modimo e lego bohlale le kgaugelo, a šišinya gore go na le dika tše dingwe tša Jehofa Modimo le mediro ya gagwe yeo re ka se kgonego go e kwešiša. E nngwe ke kgopolo ya gore Modimo ga a na mathomo. Lega go le bjalo, re ka bota ka mo go feletšego seo Beibele e se rutago mabapi le Modimo. Jesu Kriste o boletše mabapi le dingwalwa tše kgethwa gore: “Lentšu la gago ke therešo.”—Johane 17:17.

Moše o boditše Jehofa ka thapelo gore: “[O] wa mehla e se naxo mathômô, e se naxo mafêlô.” (Psalme 90:2) Mo Moše o hlalosa gore Modimo ga a na mathomo le mafelelo. O sa tlo dula a le gona. Jehofa ke “Yo a phelago go iša mehleng ya neng le neng.” (Kutollo 4:10) Ka gona, go ba gona ga Modimo go iša mehleng ya ka mo go sa felego. Go ba gona ga gagwe go iša gape le mehleng e fetilego. Ka mantšu a mangwe, Modimo ga se a ka a bopša goba a dirwa gore a be gona. Go e na le moo, Modimo ke wa mehla e se nago mathomo.

Dikgopolo tše ithometšwego ga di kwešišwe ke bontši bja rena. Lega go le bjalo, ka dinako tše dingwe re swanetše go amogela dikgopolo tšeo go sego bonolo go di kwešiša, tše bjalo ka dipalo tša ka godimo ga boleng bja lefeela le tša ka tlase ga lefeela. Dipalo di ka balwa ka mo go sa felego, go sa šetšwe gore re balela pele goba re balela morago. Na re ka se diriše mohlala wo nywageng ya bophelo bja Mmopi?

Ka gona ke mo go swanetšego gore Modimo a nnoši ke yena yo a nago le sereto sa “Kgoši ya bosafelego.” (1 Timotheo 1:17) Anke o nagane: Jesu Kriste, barongwa ba dimiriate ba lego legodimong, le batho ba lego lefaseng ba na le mathomo ka gobane ba bopilwe. (Bakolose 1:15, 16) Ga go bjalo ka Modimo. Go gapeletša gore Modimo o swanetše go ba a bopilwe go tsoša dipotšišo tše sa felego tša gore ke mang yo a bopilego Mmopi. Aowa, Jehofa ke yena a nnoši “wa mehla e se naxo mathômô, e se naxo mafêlô.” (Psalme 90:2) Ka mantšu a mangwe, Jehofa o bile gona pele ga dinako.—Juda 25.

Lega go le bjalo, gopola gore kgopolo ya gore Modimo ga a na mathomo ga se e thata le e sa kwagalego. Go lebelela thapelo ya Moše ka šedi go utolla gore go ba gona ga Modimo ka mo go sa felego go gatelela kholofetšo e lerato ya bophelo bjo bo sa felego go rena. Go fapana le bophelo bjo bokopana bjoo re bo phelago lehono, Modimo o hlaloswa e le “’thšabêlô sa rena . . . melokong ya kxalelele le nankhono.” Bjalo ka Tate yo lerato, Jehofa o be a dutše a thekga batho ba gagwe, o sa ba thekga e bile o tla dula a ba thekga. Eka o ka homotšwa ke therešo ye yeo e kgahlišago!—Psalme 90:1.