Na o ka Tseba Modimo ka Leina?
Go laletšwa go tlo dumediša le go bitša motho yo bohlokwa ka leina ke tokelo e kgolo. Gantši batho ba hlomphegago ba bitšwa ka direto tšeo di bontšhago maemo a bona, tše bjalo ka “Mna. Mopresidente,” “Mong’a-ka,” goba “Mohlomphegi.” Ka gona ge e ba motho yo a nago le maemo a phagamego a go botša gore, “Mpitše ka leina, hle,” ka ntle le pelaelo o tla ikwa o godišitšwe.
MODIMO wa therešo o re botša ka Lentšung la gagwe le le ngwadilwego, Beibele, gore: “Ke Nna Jehofa, ke lona leina la-ka.” (Jesaya 42:8, PK) Gaešita le ge a e-na le direto tše dintši, tše bjalo ka “Mmopi,” “Ra-matla-ohle,” le “Mmuši Morena,” ka mehla o bontšhitše go hlompha bahlanka ba gagwe ba botegago ka go ba dumelela go diriša leina la gagwe.
Ka mohlala, moporofeta Moše o kile a lopa Modimo ka mantšu a rego: “Aowa hle Jehofa.” (Ekisodo 4:10, NW) Nakong ya ge go kgakolwa tempele ya Jerusalema, Kgoši Solomone o ile a thoma thapelo ya gagwe ka mantšu a rego: “Wena Jehofa.” (1 Dikxoši 8:22, 23, NW) Le gona ge moporofeta Jesaya a be a bolela le Modimo legatong la setšhaba sa Isiraele, o itše: “Wene, Jehofa, o Tata wešo.” (Jesaya 63:16, PK) Go molaleng gore Tatago rena wa legodimong o re laletša gore re mmitše ka leina.
Le ge go bitša Jehofa ka leina go le bohlokwa, ruri go mo tseba ka leina feela ga go a lekana. Mabapi le motho yo a mo ratago le go mmota, Jehofa o holofetša gore: “Ke tlo mo khutiša xobane ó tseba ’ina la-ka.” (Psalme 91:14) Go molaleng gore go tseba leina la Modimo go swanetše go ba go akaretša go gontši, ka ge e le selo se bohlokwa bakeng sa go amogela tšhireletšo ya Modimo. Gona, ke’ng seo o swanetšego go se dira gore o tsebe Jehofa ka leina?