Bofelo bja Ditiro tše mpe bo Kgonthišeditšwe!

MODIMO o re file Lentšu la gagwe le le buduletšwego, leo le hlalosago mabaka ao ka ona batho ba dirago dilo tše mpe. Le gona o re file tokologo ya boikgethelo le bokgoni bja go itshwara, tšeo di dirago gore re kgone go dira phetho ya go se dire dilo tše mpe. (Doiteronomio 30:15, 16, 19) Ka ge re hlamilwe ka tsela ye, re ka kgona go lemoga ditshekamelo le ge e le dife tše mpe gomme ra gata megato e nyakegago ya go lokiša. Mafelelong, go phema ga rena ditiro tše mpe go tla re tlišetša lethabo gotee le bao ba re dikologilego.—Psalme 1:1.

Lega go le bjalo, go sa šetšwe gore re katanela gakaaka’ng go phema go dira dilo tše mpe, lefase le tšwela pele le tlala ka ditiro tše mpe tšeo di dirwago ke batho ba bangwe. Beibele e eletša ka gore: “Tseba gore mehleng ya bofelo go tla ba le dinako tše di hlobaetšago tšeo go  lego thata go lebeletšana le tšona.” Ge e bontšha seo se dirago gore mehla e be ‘thata go lebeletšana le yona,’ e tšwela pele ka gore: “Batho e tla ba baithati, barati ba tšhelete, ba go ipona, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago maikwelo a borutho a tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogo-thata, ba tletšego boikgantšho, ba ratago maipshino go e-na le go rata Modimo, ba ba nago le sebopego sa boineelo go Modimo eupša ba latola matla a bjona; ba bjalo o ba furalele.”—2 Timotheo 3:1-5.

Mohlomongwe o lemogile polelwana e rego “mehleng ya bofelo” boporofeteng bjo bo tsopotšwego ka mo godimo. Polelwana yeo e bolela’ng go wena? Go ya ka kwešišo ya batho ba bantši, ge o re “mehleng ya bofelo” o šišinya gore go na le seo se fihlago mafelelong a sona. Selo seo e ka ba eng? Ela hloko seo Modimo a se holofetšago ka Lentšung la gagwe.

Ba kgopo ba tla fedišwa ka mo go feletšego.

“Xo se xokae e mobe ó tlo ba a ile; O tlo bôxa lešope, yêna à se xôna. Ba bolêta e tlo ba bôná beng ba naxa; ba tlo thaba ka botlalô bya moláô.”—PSALME 37:10, 11.

“Bohle ba ba mo rataxo ó ba hlôkômetše; ba babe bôná ó tlo ba fediša.”—PSALME 145:20.

Go ka se sa ba le kgatelelo.

“Ó tlo hlakodiša modiitšana xe a lla, le mohlaki xe a hlôka monamodi. Meôya ya bôná ó tlo e lokolla mohlakong, bošorong.” —PSALME 72:12, 14.

‘Tlholo ka boyona le yona e tlo lokollwa bokgobeng bja tshenyego gomme e be le tokologo ya letago ya bana ba Modimo.’ —BAROMA 8:21.

Dinyakwa tša batho tša nama di tla kgotsofatšwa.

“Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo.” —MIKA 4:4.

“Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.”—JESAYA 65:21, 22.

Toka e tla ata.

“Na Modimo a ka se ke a dira gore toka e dirwe bakeng sa bakgethwa ba gagwe bao ba goeletšago go yena mosegare le bošego . . . ? Ke a le botša, O tla dira gore toka e dirwe go bona ka bjako.”—LUKA 18:7, 8.

“Morêna ó rata tša tokô; baxauxêlwa ba xaxwe xa’ ba lahle; ó tlo ba lôtôla neng le neng.”—PSALME 37:28.

Boithati bo tla tšeelwa legato ke go loka.

“Ba ba axilexo mo xo lôna [lefase] ba ka rutwa tokô.”—JESAYA 26:9.

“Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” —2 PETRO 3:13.

Batho ba a Fetoga—Gaešita le Gona Bjale

Ka ntle le pelaelo, ka moka ga rena re ka thabišwa ke dikholofetšo tše bjalo. Eupša go na le kgonthišetšo efe ya gore di tla phethagala? Ge e le gabotse, gona bjale re na le bohlatse  bja gore dikholofetšo tša Modimo di tla phethagala. Bohlatse bjoo ke bofe? Ke taba ya gore batho ba dimilione lefaseng ka bophara lehono ba šetše ba kgonne go lahla dika tše bjalo ka boithati, boitshwaro bjo bo gobogilego goba mekgwa ya go rata bošoro, gomme ba ithuta go ba batho ba botegago, ba nago le khutšo le ba botho. Lehono, Dihlatse tša Jehofa, tšeo di fetago dimilione tše šupago, ke barwarre ba ditšhaba-tšhaba bao ba fenyago mapheko a semorafo, a selegae, a botšhaba, a dipolitiki le a tša boiphedišo, ao a bakilego lehloyo le legolo, bošoro le tšhollo ya madi historing ka moka. * Taba ya gore diphetogo tše bjalo di gona lehono e nea bohlatse bjo bo tiilego bja gore dikholofetšo tša Modimo di tla phethagala ka tekanyo e kgolo.

Lega go le bjalo, ke’ng seo se dirago gore go be le diphetogo tše bjalo? Karabo e hwetšwa go e nngwe ya dikholofetšo tša Beibele, yeo e boletšwego ke moporofeta Jesaya. O ngwadile gore:

“Phiri e tlo dula le kwanyana; nkwê e tlo hutama le putšanyana; namane le tau le pholo di tlo dula felô xotee, di xapye ke mošemanyana. . . . ’Me tau e fula bya’ng bo-ka kxomo. Ngwana e monyenyane ó tlo bapala moleteng wa marabê; wa xo thswa letswêlê ó tlo kxwathiša ’ihlô la mokopa ka seatla. Xo ka se hlwê xo dirwa dibe, xo ka se hlwê xo senywa mo xo fela dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:6-9.

Na boporofeta bjo bo fo ba bo bolela ka nako yeo diphoofolo di tlago go dula gotee ka kwano le batho? Aowa, bo bolela se se fetago seo. Ela hloko gore karolo ya mafelelo ya ditemana tše e bontšha seo se bakago phetogo e bjalo: “Xo tseba Morêna xo tlo tlala ’fase  lohle.” Na go tseba Modimo go fetoša boitshwaro bja diphoofolo? Ga go bjalo. Eupša go ka fetoša batho e bile go a ba fetoša! Boporofeta bjo bo bolela e sa le pele gore bao ba ka bago ba ile ba ba le ditshekamelo tša bophoofolo ba be ba tla fetoga gomme ba hlagolela semelo sa go swana le sa Jesu ka baka la go ithuta le go diriša seo Beibele e se rutago.

Ela hloko mohlala wa Pedro. * O be a nagana gore o be a lwela toka ge a be a tsenela mokgatlo wa botšhošetši. Ka morago ga go tlwaetšwa, o ile a laelwa gore a thuthupiše pomo lefelong leo go dulago maphodisa. Ge a be a sa itokišeletša go dira bjalo, o ile a swarwa. Pedro o ile a fetša dikgwedi tše 18 a le kgolegong, moo a ilego a tšwela pele ka modiro wa gagwe wa go leka go menola mmušo. Go dutše go le bjalo, mosadi wa Pedro o ile a thoma go ithuta Beibele le Dihlatse tša Jehofa. Ge a e-tšwa kgolegong, Pedro le yena o ile a thoma go ithuta Beibele, gomme seo a ithutilego sona ka Jehofa Modimo se ile sa mo tutueletša go dira diphetogo tše dikgolo boemong bja gagwe bja kgopolo le ponong ya gagwe ka bophelo. Pedro o re: “Ke leboga Jehofa gore ga se ka ka ka bolaya motho nywageng ya-ka ka moka ya ge ke be ke le motšhošetši. Ga bjale ke diriša tšhoša ya moya wa Modimo, e lego Beibele, go nea batho molaetša wa khutšo ya kgonthe le toka—ditaba tše dibotse tša Mmušo wa Modimo.” Pedro o ile a ba a etela  lefelo leo go dulago maphodisa leo a kilego a rulaganya go le fediša gore a bolele ka molaetša wa khutšo le lefase leo le se nago bošoro.

Tsela e matla yeo Lentšu la Modimo le kgomago batho ka yona e nea lebaka le legolo la go dumela kholofetšo ya Modimo ya gore phedišo ya ditiro ka moka tše mpe e kgonthišeditšwe. Ee, batho ba ka se sa hlwa ba dira dilo tše mpe go iša ka go sa felego eupša ba tla fetoga ba bakaone. Go se go ye kae Jehofa o tla tloša mothomi wa ditiro tše mpe, Sathane Diabolo, yoo a hlohleletšago ditaba tša lefase a sa bonagale. Beibele e re: “Lefase ka moka le rapaletše matleng a yo kgopo.” (1 Johane 5:19) Eupša o tla tlošwa kgaufsinyane. Go tla tlošwa gape le bao ka bohlogothata ba ganago go tlogela ditsela tša bona tše kgopo. E tla ba mo go kgahlišago go phela nakong yeo ye e šegofaditšwego!

Ke’ng seo motho a ka se dirago e le gore a kgonthišege ka bokamoso bjo bjalo? Gopola gore ke ‘go tseba Jehofa’ mo go tlišago diphetogo bathong lehono e bile go tla tliša diphetogo lefaseng ka bophara kgaufsinyane. Ka go hwetša tsebo e nepagetšego ya Beibele le go e diriša—go swana le Pedro—le wena o ka lebelela pele go pheleng lefaseng leo ‘toko e tla agago go lona.’ (2 Petro 3:13) Ka baka leo, re go kgothaletša gore o diriše sebaka seo se sa lego gona go hwetša tsebo ka Modimo le Jesu Kriste, ka gobane seo se ka bolela bophelo bjo bo sa felego go wena.—Johane 17:3.

[Mengwalo ya tlase]

[Ntlhakgolo go letlakala 9]

Le wena o ka lebelela pele go pheleng lefaseng leo ‘toko e tla agago go lona.’—2 PETRO 3:13