Batamela Kgaufsi le Modimo

O Tseba “Dipelo tša Bana ba Batho”

2 KORONIKA 6:29, 30 (NW)

KE MANG go rena yo a sa kago a ikwa a gateletšwe ke ditlhohlo le mathata a bophelo? Ka dinako tše dingwe, go ka bonagala eka ga go na motho yoo a kwešišago e le ka kgonthe mathata ao re lebeletšanego le wona goba bohloko bjoo re bo kwago. Lega go le bjalo, go na le motho yo a kwešišago maikwelo a rena ka botlalo—Jehofa Modimo. Re ka hwetša khomotšo mantšung a Solomone ao a hwetšwago go 2 Koronika 6:29, 30, NW.

Solomone o a rapela ge go kgakolwa tempele kua Jerusalema ka 1026 B.C.E. Thapelong ya gagwe, yeo mohlomongwe e tšerego metsotso e lesome, Solomone o reta Jehofa bjalo ka Modimo yo a botegago, Mophethi wa dikholofetšo le Mokwi wa dithapelo.—1 Dikxoši 8:23-53; 2 Koronika 6:14-42.

Solomone o lopa Modimo gore a theetše topo ya barapedi ba gagwe. (Temana 29, NW) Gaešita le ge Solomone a bolela ka matshwenyego a mantši (temana 28), o lemoga gore morapedi yo mongwe le yo mongwe o tseba “mohlako wa gagwe” le go kwa “bohloko bja gagwe.” Motho yo mongwe a ka hlokofatšwa ke selo se sengwe mola yo mongwe a ka ba le kgateletšego e fapanego ya maikwelo a ka gare.

Go sa šetšwe gore boemo ke bofe, ga go nyakege gore bao ba boifago Modimo ba rwale merwalo ya bona ba le noši. Thapelong ya gagwe, Solomone o be a gopotše ka morapedi yo mongwe yoo a ilego a tutueletšega go ‘phurolla diatla tša gagwe,’ ge a batamela Jehofa ka thapelo e tšwago pelong. * Mohlomongwe Solomone o gopola gore tatagwe Dafida, ge a be a gateletšegile kudu, o ile a re: “Lahlêla Morêna morwalô wa xaxo.”—Psalme 55:4, 22.

Jehofa o tla arabela bjang ditopo tše tšwago pelong tša go nyaka thušo? Solomone o lopa Jehofa ka gore: “Anke wena o kwe o le magodimong, gona moo o dulago gona, o ba lebalele o be o direle yo mongwe le yo mongwe go ya kamoo go swanetšego ditsela tša gagwe.” (Temana 30, NW) Solomone o a tseba gore “Mokwi wa dithapêlô” o tshwenyega ka barapedi ba gagwe e le motho ka o tee ka o tee e sego feela e le sehlopha. (Psalm 65:2) Jehofa o nea thušo yeo e nyakegago, go akaretša le go lebalela modiradibe yo a boelago go yena ka pelo ka moka.—2 Koronika 6:36-39.

Ke ka baka la’ng Solomone a kgodišegile gore Jehofa o tla araba ditopo tša morapedi yo a sokologago? Ge a tšwela pele le thapelo ya gagwe, Solomone o hlalosa gore: “Ka gobane [Jehofa] o tseba pelo ya gagwe (gobane ke wena feela o tsebago dipelo tša bana ba batho).” Jehofa o lemoga mohlako le bohloko bjoo morapedi yo mongwe le yo mongwe yo a botegago a ka bago a e-na le bjona ka pelong ya gagwe gomme O tshwenyega ka dikgateletšego tša gagwe.—Psalme 37:4.

Re ka hwetša khomotšo go tšwa thapelong ya Solomone. Batho ba ka no se kwešiše maikwelo a rena ka botlalo—‘mohlako wa rena’ le ‘bohloko bja rena.’ (Diema 14:10) Eupša Jehofa o tseba dipelo tša rena e bile o na le taba le rena. Ge re tšhollela dipelo tša rena go yena ka thapelo, go rwala merwalo ya rena go tla ba bonolo. Beibele e re: “[Lahlelang] dipelaelo tša lena ka moka go yena, gobane o a le hlokomela.”—1 Petro 5:7.

[Mongwalo wa tlase]