Babadi ba Rena ba a Botšiša . . .

Ke ka Baka La’ng Sathane a ile a Kgetha go Diriša Noga go Bolela le Efa?

▪ O ka dumela gore bjalo ka ge go boletšwe go letlakala 8, Sathane ke yena yoo a bego bolela le Efa a diriša noga. Se ke seo ge e le gabotse se rutwago ke Beibele. Lega go le bjalo, o ka ipotšiša gore, ‘Ke ka baka la’ng motho yo matla wa moya a ka diriša noga go swana le motho yoo a nago le bokgoni ge a dira gore popi e bonagale eka e a bolela?’

Beibele e hlalosa makatika a Sathane e le “ditiro tša bohwirihwiri” gomme tiragalo ye e thuša go hlatsela seo. (Baefeso 6:11) Seo re se balago mabapi le Edene ga se nonwane ya mabapi le phoofolo e kgonago go bolela; ke mohlala o boifišago wa leano le bohlale leo morero wa lona e lego go aroša batho go Modimo. Ka tsela efe?

Sathane o ile a kgetha mohlaselwa wa gagwe ka kelohloko. Efa e be e le yo monyenyane go dibopiwa tšohle tše bohlale legohleng. A ikhola ka go hloka maitemogelo ga gagwe, Sathane o ile a loga leano gomme a mo leka. Ka go utama ka noga, e lego sephedi se se lego šedi kudu, Sathane ka bohlale o ile a uta maikemišetšo a gagwe a magolo le a go rata maemo. (Genesi 3:1) Gape, ela hloko seo a se fihleletšego ka go dira gore noga e bonale eka e a bolela.

Sa pele, Sathane o ile a gapa kgahlego ya Efa le go dula a e swere. O be a tseba gore dinoga ga di kgone go bolela; monna wa gagwe o be a file diphoofolo ka moka maina, go akaretša le ye, gomme a ka ba a dirile bjalo ka morago ga go di hlahloba ka kelohloko. (Genesi 2:19) Ga go pelaelo gore Efa le yena o kile a hlokomela sephedi se se se lego šedi. Ka go rialo, leano la Sathane le ile la hlohleletša go nyaka go tseba ga Efa; la dira gore a lebiše tlhokomelo selong se tee tšhemong ka moka seo a bego a se ileditšwe. Sa bobedi, ge e ba noga e be e lekeletše lekaleng la mohlare woo o bego o ileditšwe, Efa o be a ka fihlelela phetho efe? Na o be a ka se bee mabaka ka gore sephedi se se se nyatšegago le se sa kgonego go bolela se ile sa ja dienywa tša wona gomme ka morago sa kgona go bolela? Ge e ba dienywa tša wona di be di ka direla phoofolo selo se bjalo, go thwe’ng ka yena? Re ka se kgone go tseba seo Efa a ilego a se nagana goba ge e ba noga e ile ya kgema seenywa seo, eupša re a tseba gore ge noga e botša Efa gore o tla “swana le Modimo” ge a ka ja seenywa seo, o be a ikemišeditše go dumela maaka ao.

Kgetho ya Sathane ya mantšu le yona e utolotše mo gontši. O ile a bjala dipelaelo ka monaganong wa Efa, a umaka gore Modimo o be a mo kona selo se itšego se sebotse le go mo gana le tokologo go sa nyakege. Go atlega ga leano la Sathane go be go ithekgile ka gore kgahlego ya Efa ya boithati e fete lerato la gagwe la go rata Modimo yoo a mo filego dilo ka moka tšeo a bego a ena le tšona. (Genesi 3:4, 5) Ka manyami, leano la Sathane le ile la šoma; Efa le Adama ga se ba ka ba hlagolela ka dipelong tša bona mohuta wa lerato la go rata Jehofa le tebogo ya go mo leboga tšeo ba bego ba swanetše go ba ba ena le tšona. Na Sathane ga a kgothaletše moya o bjalo wa boithati le wa go bea mabaka lehono?

Lega go le bjalo, go thwe’ng ka maikemišetšo a Sathane? O be a tsoma eng? Kua Edene, o ile a leka go uta seo a lego sona le maikemišetšo a gagwe. Eupša ge nako e dutše e eya, o ile a ikutolla. Ge a be a leka Jesu, o be a tloga a tseba gore go ikuta go be go ka se mo hole ka selo. Ka baka leo, o ile a kgothaletša Jesu ka go lebanya gore: ‘Wela fase o nthapele gatee.’ (Mateo 4:9) Go molaleng gore ke kgale Sathane a šušumetšwa ke lehufa bakeng sa borapedi bjo bo lebišwago go Jehofa Modimo. O tla dira sohle seo a ka se kgonago go thibela batho go rapela Modimo goba go dira gore ba mo rapele ka tsela e sa amogelegego. O nyaka go dira gore re se sa botegela Modimo.

Beibele e utolla ka mo go kwagalago gore Sathane o loga maano a bolayago ge a phegelela maikemišetšo a gagwe. Se se thabišago ke gore ga se ra swanela go forwa go swana le Efa, “gobane re tseba maano a gagwe.”—2 Bakorinthe 2:11.