Na o be o Tseba?

Motlwae wa go budutša e be e le eng gomme ke bomang bao ba bego ba holwa ke wona?

▪ Molao wa Moshe o be o thibela balemi go buna dibjalo ka moka tšeo di tšweleditšwego. Go e na le moo, bao ba bego ba buna mabele ba be ba sa swanela go buna mathoko a mašemo ka moka. Bao ba bego ba fula diterebe ba be ba sa swanela go topa tšeo di gašanego goba go boela go yo fula tšeo di bego di se tša butšwa peleng. Gomme bao ba bego ba hlohlora mohlware ba be ba swanetše go tlogela dienywa tšeo di sa kago tša wa. (Lefitiko 19:9, 10; Doiteronomio 24:19-21) Badiidi, ditšhiwana, bahlologadi le bafaladi ba be ba ka budutša—goba go topa—mašaledi a puno.

Molao wo wa mabapi le go budutša o be o hola setšhaba ka moka sa Isiraele. O be o kgothaletša mong wa tšhemo go ba le seatla se se bulegilego, go se timane, gaešita le go ithekga ka ditšhegofatšo tša Jehofa. Go bao ba bego ba budutša, o be o kgothaletša go šoma ka thata, ka ge go budutša e be e le mošomo o boima. (Ruthe 2:2-17) Go budutša go be go dira gore badiidi ba se ke ba bolawa ke tlala goba go fetoga morwalo setšhabeng. Gape go be go dira gore ba se theolwe seriti ke go kgopela goba go ithekga ka tša go fiwa.

Ke ka baka la’ng Solomone a ile a reka dikota go tšwa kgole kua Libanoni bakeng sa go aga tempele ya Jerusalema?

▪ Pego e lego go 1 Dikgoši 5:1-10 e hlalosa kwano yeo e dirilwego magareng ga Solomone le Hirama, kgoši ya Tiro. Go ya ka kwano yeo, dingata tša dikota tša motsedara le mejunipere di be di tla tlišwa Isiraele ka sekepe go tšwa Libanoni gomme tša dirišetšwa go aga tempele.

Motsedara e be e le kota e bohlokwa bakeng sa kgwebo kua Bohlabela bja Magareng bja bogologolo. Kua Egipita le Mesopotamia, dikota tše di be di dirišwa ka mehla bakeng sa go dira dikokwane le go manega maboto a ditempele le mešate. Dipego tše di bolokilwego tša mmušo, mengwalo yeo e ngwadilwego ka bokgwari le mengwalokgwaro di hlatsela go rekwa mo go sa kgaotšego ga motsedara ke metse ya go ipuša ya ka borwa bja Mesopotamia, ka dinako tše dingwe e le dithebola goba dibego. Kua Egipita di be di dirišetšwa go aga dikepe, mapokisi a bahu le dilo tše dingwe tša poloko tša ka mošate.

Metsedara ya Libanoni e be e tsebja ka mo go kgethegilego ka go kgwahla ga yona, botse bja yona le go nkga bose ga dikota tša yona, re se sa bolela ka go se hlaselwe ga yona ke dinkhukhwane. Ka gona, Solomone o be a diriša didirišwa tša maemo a godimo go aga tempele. Lehono, mašaledi a dithokgwa tša metsedara yeo e kilego ya apeša dithaba tša Libanoni ke a manyenyane ka palo e bile a lekatana.

[Seswantšho go letlakala 15]

Go romelwa ga motsedara wa Libanoni, thušo ya Baasiria go tšwa mošate wa Saragone

[Mothopo]

Erich Lessing/Art Resource, NY