Batamela Kgauswi le Modimo

Ge Batšofadi e Eba ba Bafsa Gape

KE MANG go rena yo a ratago ditlamorago tša botšofadi—letlalo le le šošobanego, go se sa bona gabotse, go se sa kwa le maoto a palelwago ke go tsepama? O ka ipotšiša gore: ‘Ke ka baka la’ng Modimo a ka re bopa re ena le bokgoni bja go thabela matla a bofsa feela gore re feleletše ka go boifa ditlamorago tša botšofadi?’ Ditaba tše dibotse ke gore se ga se seo Modimo a bego a re reretše sona. Go e na le moo, ka lerato o rerile go re lokolla botšofading! Ela hloko mantšu ao a boditšwego mopatriareka Jobo, ao a hwetšwago go Jobo 33:24, 25.

Ela hloko boemo bja Jobo, e lego monna yo a botegago yoo a bego a ratwa ke Jehofa. Sathane o ile a belaela potego ya Jobo ka go bolela gore o be a hlankela Modimo ka mabaka a boithati, Jobo a sa tsebe. Jehofa, a bota Jobo e bile a tseba gore O na le matla a go dirolla tshenyo, o ile a dumelela Sathane a leka Jobo. Ke moka Sathane o ile “a otla Jobo ka dišo tše šoro go tloga kgatong ya lenao go ya phogong.” (Jobo 2:7) Nama ya Jobo e ile ya tlala diboko gomme letlalo la gagwe la ba le magogo, la ntshofala ke moka la eboga. (Jobo 7:5; 30:17, 30) Na o ka akanya ka bohloko bjo a bego a bo kwa? Lega go le bjalo, Jobo o ile a tšwela pele a botega, a re: “Ke tla ba ka hwa ke se ka lahla potego ya ka!”—Jobo 27:5.

Lega go le bjalo, Jobo o ile a dira phošo e kgolo. Ge a be a nagana gore o be a le kgauswi le go hwa, o ile a tshwenyega kudu ka go ikgodiša, “a [bolela] gore moya wa gagwe o lokile go feta Modimo.” (Jobo 32:2) Elihu e lego mmoleledi wa Modimo o ile a kgalemela Jobo. Eupša Elihu o ile a botša Jobo molaetša o kgahlišago o tšwago go Modimo, o rego: “O se mo [Jobo] lese a theogela lebitleng! Ke hweditše topollo! Gona anke nama ya gagwe e be e nanana go feta bofseng; a a boele mehleng ya matla a bofseng bja gagwe.” (Jobo 33:24, 25) Mantšu ao a swanetše go ba a ile a tlatša Jobo ka kholofelo. O be a se a swanela go tšwela pele a tlaišega go fihlela lehung la gagwe. Ge Jobo a be a ka itshola, Modimo o be a tla thabela go amogela topollo bakeng sa gagwe gomme a mo lokolla masetlapelong a gagwe. *

Jobo ile a amogela phošollo ka boikokobetšo gomme a itshola. (Jobo 42:6) Go molaleng gore Jehofa o ile a amogela topollo ya Jobo, a e dumelela go bipa phošo ya gagwe le go bula tsela bakeng sa gore Modimo a mmušetše sekeng le go mo putsa. Jehofa o ile “a šegofatša tša mafelelo a Jobo go feta tša mathomong a gagwe.” (Jobo 42:12-17) Akanya ka go imologa ga Jobo ge, gare ga ditšhegofatšo tše dingwe, bolwetši bja gagwe bjo bo šišimišago bo fola gomme nama ya gagwe mafelelong e eba “e nanana go feta bofseng”!

Topollo yeo Modimo a e amogetšego bakeng sa Jobo e be e ena le mohola o lekanyeditšwego, ka gobane monna yoo o ile a tšwela pele a sa phethagala gomme mafelelong a hwa. Re na le topollo e kaone kudu yeo e ka re holago. Jehofa ka lerato o ile a gafa Morwa wa gagwe, Jesu, e le topollo ya rena. (Mateo 20:28; Johane 3:16) Bohle bao ba dumelago topollong yeo ba na le tebelelo ya go phela ka mo go sa felego lefaseng la paradeise. Lefaseng leo le lefsa le le sa tlago, Modimo o tla lokolla batho botšofading. O reng o sa ithute ka mo go oketšegilego mabapi le kamoo o ka phelago go fihlela ge o tlo bona nako ya ge batšofadi ba tla be ba bona ‘nama ya bona e eba e nanana go feta bofseng’?

Mmalo wa Beibele o šišintšwego bakeng sa April:

▪ Jobo 16-37

[Mongwalo wa tlase]