Na Modimo o na le Thulaganyo?

THULAGANYO e bonagala gohle tlholong ya Modimo. Ka mohlala, seo go thwego ke sele e bonolo ya komelo ke yeo e makatšago ka baka la tsela yeo e rulagantšwego ka yona. E na le dikarolo tše di nyakilego go lekana ka palo le tša sefofane se segolo sa Boeing 777. Lega go le bjalo, dikarolo ka moka di dutše madulong a tšona gomme di lekana thorwaneng ya bogolo bja di-micron * tše hlano feela. Ka go se swane le difofane tše dikgolo, disele tša komelo di kgona go ikatiša. A thulaganyo e makatšago gakaakang!—1 Bakorinthe 14:33.

Thulaganyo ga e bonale feela tlholong e bonagalago. Beibele e bontšha gore lefelo la moya le lona le rulagantšwe ka tsela e phagamego, ka go dumelelana le morero wa Mmopi. Ponong, moporofeta Daniele o bone sehlopha se segolo sa dibopiwa tšeo e lego barongwa se le kgorong ya Modimo ya legodimong ge a re: “Go [be go] na le ba milione (1 000 000) bao ba ilego ba tšwela pele ba mo hlankela, le ba dikete tše lesome (10 000) ga dikete tše lesome (10 000) bao ba ilego ba tšwela pele ba eme pele ga gagwe.” (Daniele 7:9, 10) Akanya ka thulaganyo yeo e swanetšego go ba gona gore barongwa ba ba bantši kudu—ba fetago dimilione tše lekgolo—ba arabele gomme ba dire seo Modimo a ba laelago gore ba se direle bahlanka ba gagwe bao ba lego mo lefaseng!—Psalme 91:11.

Gaešita le ge Mmopi, Jehofa Modimo, e le Morulaganyi yo a Phagamego, ga se yo a se nago taba goba yo a nyoretšwego go buša. Go e na le moo, ke Modimo yo borutho, yo a thabilego le yo a tshwenyegilego ka gore tlholo ya gagwe e phele gabotse. (1 Timotheo 1:11; 1 Petro 5:7) Se se bonagala tseleng yeo a ilego a dirišana ka yona le setšhaba sa gagwe sa bogologolo sa Isiraele le Bakriste ba lekgolong la pele la nywaga.

Isiraele ya Bogologolo—Setšhaba se se Bego se Rulagantšwe Gabotse

Jehofa Modimo o ile a diriša Moshe gore a rulaganye Baisiraele bakeng sa borapedi bja therešo. Ela hloko feela dithulaganyo tša go hloma mešaša nakong ya ge ba be ba dula lešokeng la Sinai. Ruri nkabe ditaba di ile tša šarakana ge nkabe malapa ka moka a be a ile a dumelelwa go hloma mešaša gohle moo a bego a nyaka go e hloma gona. Jehofa o ile a nea setšhaba ditaelo tše di lebanyago mabapi le gore moloko o mongwe le o mongwe o be o swanetše go hloma mešaša kae. (Numeri 2:1-34) Gape Molao wa Moshe o be o na le melao e lebanyago ya tša maphelo le bohlweki—ka mohlala, mabapi le go epelwa ga mantle a batho.—Doiteronomio 23:12, 13.

Ge Baisiraele ba be ba tsena Nageng ya Kholofetšo, e be e le setšhaba se se rulagantšwego ka ditsela tše dintši tše phagamego. Setšhaba se be se rulagantšwe ka meloko e 12 gomme o mongwe le o mongwe o be o abetšwe naga. Molao woo Jehofa a bego a o neile setšhaba a diriša Moshe o be o akaretša dikarolo ka moka tša bophelo bja batho—borapedi, lenyalo, lapa, thuto, kgwebo, dijo, temo, go hlokomela diphoofolo le tše dingwe. * Gaešita le ge melao e mengwe e be e le e lebanyago le yeo e hlalosago dintlha ka botlalo, ka moka ga yona e be e bontšha kamoo Jehofa a hlokomelago batho ba gagwe ka gona le go tlaleletša lethabong la bona. Baisiraele ba be ba amogelwa ke Jehofa ka mo go kgethegilego ge ba be ba dumelelana le dithulaganyo tše tše lerato.—Psalme 147:19, 20.

Gaešita le ge e le therešo gore Moshe e be e le moetapele yo a nago le bokgoni, fela go atlega goba go palelwa ga gagwe go be go se gwa ithekga  ka bokgoni bja gagwe bja go ba moetapele, eupša go be go ithekgile ka go botegela thulaganyo ya Modimo. Ka mohlala, Moshe o ile a kgetha bjang tsela yeo a bego a tla e tšea ya go phatša lešokeng? Jehofa o ile a ba hlahla ka thololo ya leru mosegare gomme bošego a ba hlahla ka thololo ya mollo. (Ekisodo 13:21, 22) Gaešita le ge Modimo a be a diriša batho, Jehofa ke yena a bego a rulaganya le go hlahla batho ba gagwe. Go bile bjalo le lekgolong la pele la nywaga.

Bakriste ba Pele ba be ba Rulagantšwe Gabotse

Ka baka la ge baapostola le barutiwa ba be ba dira boboledi ka phišego, go ile gwa hlongwa diphuthego tša Bokriste mafelong a mantši kua Asia le Yuropa lekgolong la pele la nywaga. Gaešita le ge diphuthego tše di be di gašane, e be e se dihlopha tše di lego lekatana tšeo di ikemetšego. Go e na le moo, di be di rulagantšwe gabotse gomme di holwa ke go etelelwa pele ka lerato ke baapostola. Ka mohlala, Tito o ile a abelwa ke moapostola Paulo gore a ye Kereta gore a “rulaganye dilo ka moka moo.” (Tito 1:5, The Jerusalem Bible) E bile Paulo o ile a ngwalela phuthego ya Korinthe a e botša gore bana ba bangwe babo bona ba be ba ena le “matla a go rulaganya” goba e be e le “barulaganyi.” (1 Bakorinthe 12:28, The New Testament in Modern Speech; The Bible in Contemporary Language) Eupša ke mang yo a bego a ikarabela ka thulaganyo e bjalo? Paulo o ile a bolela gore “Modimo o kopantše” goba o “rulagantše” phuthego.—1 Bakorinthe 12:24; The Riverside New Testament.

Balebeledi bao ba kgethilwego phuthegong ya Bokriste ba be ba sa buše badumedigotee le bona. Go e na le moo, e be e le “badirišanigotee” bao ba bego ba latela tlhahlo ya moya wa Modimo gomme ba be ba swanetše go ba “mehlala go mohlape.” (2 Bakorinthe 1:24; 1 Petro 5:2, 3) Jesu Kriste ke yena yo a hlankelago e le “hlogo ya phuthego,” e sego motho feela goba sehlopha sa banna bao ba sa phethagalago.—Baefeso 5:23.

Ge phuthego ya kua Korinthe e be e thoma go dira dilo ka tsela yeo e bego e fapane kudu le ya diphuthego tše dingwe, Paulo o ile a ngwala gore: “Na lentšu la Modimo le tlile le etšwa go lena goba na le fihlile go lena feela?” (1 Bakorinthe 14:36) Paulo o ile a diriša potšišo ye yeo e sa nyakego karabo go lokiša tsela ya bona ya go nagana le go ba thuša go kwešiša gore ba be ba sa swanela go itirela dilo ka go ikemela. Diphuthego di be di gola le go atlega ge di be di latela tlhahlo ya baapostola.—Ditiro 16:4, 5.

Pontšho ya Lerato la Modimo

Go thwe’ng ka lehono? Ba bangwe ba ka dikadika go ba karolo ya mokgatlo wa bodumedi. Lega go le bjalo, bohlatse bja Beibele bo bontšha gore Modimo o be a dutše a diriša mokgatlo wa gagwe ge a le gare a phethagatša morero wa gagwe. O ile a rulaganya barapedi ba gagwe Isiraeleng ya bogologolo, e bile o ile a rulaganya Bakriste ba pele borapeding bja bona.

Ka gona, na ga se mo go kwagalago go phetha ka gore Jehofa Modimo o sa dutše a hlahla batho ba gagwe go etša ge a be a ba hlahla nakong e fetilego? Ee, taba ya gore barapedi ba gagwe ke ba rulagantšwego le bao ba nago le botee ke pontšho ya gore o ba hlokomela ka lerato. Lehono, Jehofa o diriša mokgatlo wa gagwe go phethagatša morero wa gagwe bathong. Mokgatlo wa gagwe o ka hlaolwa bjang? Ela hloko dikarolo tše di latelago.

▪ Bakriste ba therešo ba rulagantšwe gore ba phethe modiro. (Mateo 24:14; 1 Timotheo 2:3, 4) Jesu o laetše balatedi ba gagwe gore ba bolele ditaba tše dibotse tša Mmušo ditšhabeng ka moka, e lego modiro woo o bego o ka se kgonege ge nkabe go be go se na mokgatlo wa ditšhabatšhaba. Ka mohlala, o ka kgona go fepa motho o tee gabonolo o nnoši, eupša ge e ba o swanelwa ke go fepa ba dikete gaešita le ba dimilione, gona o tla swanelwa ke go ba le sehlopha sa batho se se rulagantšwego gabotse seo se swarišanego. Tabeng ya go phethagatša thomo ya bona, Bakriste ba therešo ba hlankela “ka botee” goba “ba swarišane tirelong ya [Modimo].” (Tsefanya 3:9; Byington) Na modiro wo o dirwago ke ditšhaba tše dintši, ka maleme a mantši le ke meraforafo o be o ka kgonega ka ntle le mokgatlo o nago le botee le o dumelelanago? Karabo e molaleng.

▪ Bakriste ba therešo ba rulagantšwe gore ba thekgane le go kgothatšana. Motho yo a namelago thaba a nnoši a ka kgetha moo a nyakago go  namela gona gomme gwa se nyakege gore a hlokomele banamedi bao ba se nago phihlelo. Lega go le bjalo, ge e ba a ka welwa ke kotsi goba a tsena bothateng, o tla ba kotsing e šoro ka ge go ka se be le yo a ka mo thušago. Ruri go ipea lekatana ga go bohlale. (Diema 18:1) Bakriste ba swanetše go thušana le go thekgana gore ba kgone go phetha taelo ya Jesu. (Mateo 28:19, 20) Phuthego ya Bokriste e nea bohle thuto ya Beibele yeo e nyakegago kudu gotee le tlwaetšo le kgothatšo gore ba dule ba tšwela pele le gore ba se ke ba langwa. Motho o be a ka ya kae gore a yo rutwa ka ditsela tša Jehofa ge e ba go be go se na diboka tšeo di rulagantšwego tša Bokriste bakeng sa go rutwa le go rapela?—Baheberu 10:24, 25.

▪ Bakriste ba therešo ba rulagantšwe gore ba hlankele Modimo ka botee. Ka ge dinku tša Jesu di theetša lentšu la gagwe, e ba “mohlape o tee” ka tlase ga boetapele bja gagwe. (Johane 10:16) Ga se tša gašana dikerekeng le dihlopheng tšeo di ikemetšego; e bile ga se tša arogana dithutong tša tšona. Go e na le moo, ka moka di ‘bolela ka go dumelelana.’ (1 Bakorinthe 1:10) Go nyakega thulaganyo gore re dule ka botee gomme thulaganyo yona e nyaka gore dilo di rulaganywe gabotse. Borwarre bjo bo nago le botee ke bjona feela bjoo bo ka šegofatšwago ke Modimo.—Psalme 133:1, 3.

Lerato la kgonthe la go rata Modimo le go rata therešo ya Beibele le gogetše batho ba dimilione mokgatlong woo o fihlelelago dikarolo tše gotee le tše dingwe tša ka Beibeleng. Dihlatse tša Jehofa lefaseng ka bophara di katanela go dira thato ya Modimo e le sehlopha sa batho bao ba rulagantšwego le bao ba nago le botee. Di kgonthišeditšwe ka kholofetšo ye: “Ke tla dula gare ga bona ka sepela gare ga bona gomme ke tla ba Modimo wa bona, bona e tla ba batho ba ka.” (2 Bakorinthe 6:16) O ka thabela tšhegofatšo ye ge e ba o rapela Jehofa Modimo gotee le mokgatlo wa gagwe.

[Mengwalo ya tlase]

[Seswantšho go letlakala 13]

Mešaša ya Baisiraele e be e rulagantšwe gabotse

[Diswantšho go matlakala 14, 15]

Go nyakega thulaganyo gore go phethwe modiro wa ditšhabatšhaba wa boboledi

Bodiredi bja ntlo le ntlo

Tlhakodišo dikotsing tša tlhago

Dikopano

Go agwa ga mafelo a borapedi