Ekišang Tumelo ya Bona

O Ile a Homotšwa ke Modimo wa Gagwe

ELIYA o ile a kitima puleng ge legodimo le dutše le swifala. O be a swanetše go sepela leeto le letelele pele a ka fihla Jeseriele, le gona e be e se sa le mošemanyana. Lega go le bjalo, o ile a kitima a sa khutše, ka gobane “seatla sa Jehofa” se be se ena le yena. O be a se a ka a ba le matla a lekanago le ao a bego a ena le ona. Taba ke gore o be a sa tšwa go feta dipere tše di pannwego tšeo di bego di goga karikana ya bogoši ya Kgoši Ahaba!—1 Dikgoši 18:46.

Ga bjale o be a šiile Kgoši Ahaba kudu gomme tsela e nabile pele ga gagwe. Akanya Eliya a fahlwa ke marothi a pula ge a dutše a kitima gomme a nagana ka letšatši leo le bego le tletše ditiragalo tše dintši bophelong bja gagwe. Ka ntle le pelaelo, e be e le phenyo e kgahlišago go Modimo wa Eliya, e lego Jehofa, le borapeding bja therešo. Ga bjale kua moragorago ga gagwe, Thaba ya Karamele e be e se sa bonala ka baka la go swifala ga ledimo, e lego moo Jehofa a bego a dirišitše Eliya go fenya borapedi bja Baali ka tsela e matla le ya mohlolo. Baporofeta ba makgolo ba Baali ba ile ba pepentšhwa e le baradia ba kgopo gomme ba fedišwa ka toka. Ke moka Eliya o ile a rapela Jehofa gore a fediše komelelo yeo e bego e wetše naga ka nywaga e meraro le seripa. Pula e ile ya na kudu! *—1 Dikgoši 18:18-45.

Ge Eliya a dutše a kitima moo puleng dikhilomithara tše 30 go ya Jeseriele, a ka ba a be a bona eka mafelelong phetogo ya kgonthe ya maemo e be e fihlile. Ahaba o be a swanetše go fetoga! Ka morago ga seo a bego a se bone, o be a swanetše go fo lahla borapedi bja Baali, a thibele mohumagadi wa gagwe, Isebele, le go kgaotša tlaišo ya bahlanka ba Jehofa.

Ge dilo di bonagala di sepela ka tsela yeo re ratago di sepela ka yona, ke ga tlhago gore dikholofelo tša rena di oketšege. Re ka akanya gore maemo a rena bophelong a tla tšwela pele a kaonefala, mohlomongwe ra nagana le gore mathata a rena a magolo a fedile. Ge e le gore Eliya o ile a nagana ka tsela yeo, ga go makatše ka gobane “e be e le motho yo a nago le maikwelo a swanago le a rena.” (Jakobo 5:17) Lega go le bjalo, ge e le gabotse mathata a Eliya a be a le kgole le go fela. Go ba gona, ka morago ga diiri tše sego kae Eliya o be a tla boifa kudu a ba a nyama kudu moo a bego a tla duma le go hwa. Go be go diregile’ng? Le gona Jehofa o ile a thuša bjang moporofeta wa gagwe go tsošološa tumelo ya gagwe le go ba le sebete gape? Anke re boneng.

Phetogo e sa Letelwago ya Ditiragalo

Ge Ahaba a fihla legaeng la gagwe la ka mošate kua Jeseriele, na o ile a bontšha gore e be e le motho yo a fetogilego le yo a kgahlegelago dilo tša moya kutšwanyana? Re bala gore: “Ahaba a botša Isebele tšohle tšeo Eliya a di dirilego le tšohle tša mabapi le kamoo a bolailego baporofeta ka moka ka tšhoša.” (1 Dikgoši 19:1) Ela hloko gore ge Ahaba a laodiša ditiragalo tša letšatšing leo o ile a se bolele ka Modimo wa Eliya, e lego Jehofa. Ka ge Ahaba e be e le motho wa nama, o ile a bona ditiragalo tša mohlolo tša letšatšing leo ka pono ya batho, e lego tšeo “Eliya a di dirilego.” Go molaleng gore o be a se a ithuta go hlompha Jehofa Modimo. Bjale Isebele yo a nago le moya wa go itefeletša o ile a arabela bjang?

 O ile a galefa! A tuka bogale, o ile a romela molaetša go Eliya a re: “Anke medimo e dire kamoo e ratago e be e oketše go seo, ge e ba gosasa ka yona nako ye ke tla ba ke se ka dira moya wa gago tše o di dirilego meoya ya bona!” (1 Dikgoši 19:2) Ye e be e le tšhošetšo e kotsi kudu ya lehu. Ge e le gabotse, Isebele o be a ikana gore yena o be a tla hwa ge go be go ka feta letšatši a se a dira gore Eliya a bolawe bakeng sa go lefeletša baporofeta ba gagwe ba Baali. Akanya Eliya a phafošwa borokong a le ka ntlwaneng e itšego ya bobotlana kua Jeseriele bošegong bjoo bja ledimo—e le feela gore a kwe ge motseta wa mohumagadi yoo a mmotša mantšu ao a boifišago. O ile a kgomega bjang?

O Ile a Fenywa ke Manyami le Poifo

Ge e ba Eliya a be a nagana gore ntwa kgahlanong le borapedi bja Baali e be e fedile, o ile a lemoga le semeetseng gore go be go se bjalo. Isebele o be a sa gomele morago. Baporofeta ba bantši ba botegago ba mehleng ya Eliya ba be ba šetše ba bolailwe ka taelo ya gagwe gomme ga bjale go be go bonagala go tla latela yena. Beibele e re botša gore: “Yena a tšhoga.” Na Eliya o ile a ba le sweswantšhokgopolo sa lehu le le boifišago leo Isebele a bego a mo rulaganyeditše lona? Ge e ba a ile a dula a nagana ka dikgopolo tšeo, ga go makatše ge a ile a felelwa ke sebete. Go sa šetšwe seo se diregilego, Eliya o ile “a tšhaba gore a phološe moya wa gagwe”—o ile a tšhabiša bophelo bja gagwe.—1 Dikgoši 18:4; 19:3.

Eliya e be e se yena feela motho yo a nago le tumelo yoo a ilego a fenywa ke poifo. Nywaga e mentši ka morago, moapostola Petro o ile a ba le bothata bjo bo swanago. Ka mohlala, ge Jesu a be a thuša Petro gore le yena a sepele godimo ga meetse, moapostola o ile a thoma go “lebelela ledimo.” Ke moka o ile a felelwa ke sebete gomme a thoma go nwelela. (Mateo 14:30) Ka go re’alo mohlala wa Petro le wa Eliya e re ruta thuto e bohlokwa. Ge e ba re nyaka go dula re ena le sebete, ga se ra swanela go tsepamiša menagano ya rena dikotsing tšeo di re tšhošago. Re swanetše go tsepamiša menagano ya rena Mothopong wa kholofelo ya rena le matla a rena.

“Go Lekane!”

Ka baka la go tšhoga, Eliya o ile a tšhabela thoko ya ka borwabodikela, mo e ka bago dikhilomithara tše 150 go ya Beresheba, e lego motse o lego kgauswi le mollwane wa ka borwa wa Juda. O ile a tlogela mohlokomedi wa gagwe moo gomme a phatša lešoka a nnoši. Pego e re o ile a sepela “leeto la letšatši,” ka gona re ka akanya ka yena a tloga ge letšatši le hlaba gomme go bonagala a sepetše a se a swara mphago. A gateletšegile e bile a sa tšhogile, o ile a katanela go phatša naga yeo e se nago tsela a tšhungwa ke letšatši leo le fišago tšhiritšhiri. Ge letšatši leo le hubala  ganyenyane-ganyenyane gomme le sobela, Eliya o ile a fela matla. A lapile, o ile a dula ka fase ga mohlopi, e lego selo sa kgauswi seo se bego se ka mo nea tšhireletšo moo leganateng.—1 Dikgoši 19:4.

Eliya o ile a rapela a tlaletšwe e le ruri. O ile a kgopela gore a hwe. O itše: “Ga ke phale borakgolokhukhu ba ka ka selo.” O be a tseba gore ka nako yeo borakgolokhukhu ba gagwe e be e fo ba lerole le marapo ka lebitleng, ba sa kgone go direla motho le ge e le ofe se sebotse. (Mmoledi 9:10) Eliya o ile a ikwa a se na mohola ka tsela yeo. Ga go makatše ge a ile a goeletša a re: “Go lekane!” Ke sa phelela’ng?

Na re swanetše go makatšwa ke gore motho wa Modimo o be a ka nyama kudu ka tsela ye? Ga se gore go bjalo. Banna le basadi ba mmalwa ba botegago bao ba begilwego ka Beibeleng ba hlaloswa ba be ba nyamile kudu moo ba ilego ba duma go hwa—ba bangwe ba bona ke Rebeka, Jakobo, Moshe le Jobo.—Genesi 25:22; 37:35; Numeri 11:13-15; Jobo 14:13.

Lehono, re phela “[dinakong] tše di hlobaetšago tšeo go lego thata go lebeletšana le tšona,” ka gona ga go makatše gore batho ba bantši, go akaretša le bahlanka ba botegago ba Modimo, ba ikhwetša ba nyamile ka dinako tše dingwe. (2 Timotheo 3:1) Ge ka letšatši le lengwe o ka ikhwetša o le boemong bjo bjalo bjo bja go ba tlalelong, latela mohlala wa Eliya: Tšhollela Modimo sa mafahleng. Go ba gona, Jehofa ke “Modimo wa khomotšo yohle.” (2 Bakorinthe 1:3) Na o ile a homotša Eliya?

Jehofa o Ile a Matlafatša Moporofeta wa Gagwe

O nagana gore Jehofa o ile a ikwa bjang ge a be a lebeletše a le legodimong gomme a bona moporofeta wa gagwe yo a rategago a robetše ka fase ga mohlare woo moo lešokeng gomme a kgopela go hwa? Ga go nyakege gore re hlwe re leka go nagana gore o ile a ikwa bjang. Ka morago ga gore Eliya a robale, Jehofa o ile a romela morongwa go yena. Morongwa o ile a tsoša Eliya ka go mo šikinya gabonolo gomme a re: “Tsoga o je.” Eliya o ile a dira bjalo, ka gobane morongwa o be a mo file dijo tše bonolo tša senkgwa se se sa tšwago go apewa se se ruthetšego le meetse. Na o ile a leboga morongwa yoo? Pego e bolela feela gore moporofeta o ile a ja le go nwa gomme a boela borokong. Na o be a nyamile kudu go ka bolela? Go sa šetšwe gore lebaka e be e le lefe, morongwa o ile a mo tsoša la bobedi, mohlomongwe ka masa. O ile a botša Eliya gape a re, “Tsoga o je,” gomme a oketša ka mantšu a ao a kgahlišago a re, “gobane leeto le o tlago go le tšea le tla go palela.”—1 Dikgoši 19:5-7.

Ka baka la temogo yeo a e filwego ke Modimo, morongwa o be a tseba moo Eliya a bego a lebile gona. O be a tseba le gore leeto leo e be e le le letelele kudu moo Eliya a bego a ka se kgone go le sepela ka matla a gagwe. Ruri ke mo go homotšago go hlankela Modimo yo a tsebago dipakane tša rena le mafokodi a rena go re feta! (Psalme 103:13, 14) Dijo tšeo di ile tša hola Eliya bjang?

Re bala gore: “A tsoga a ja a ba a nwa, gomme ka matla a seo a se jelego a sepela ka matšatši a masomenne le mašego a masomenne go ba go fihla thabeng ya Modimo wa therešo, e lego Horebe.” (1 Dikgoši 19:8) Eliya o ile a ikona dijo matšatši a 40 le mašego a 40, go swana le Moshe yo a dirilego bjalo mo e ka bago nywagakgolong e tshela pele ga gagwe le Jesu yo a ilego a dira bjalo mo e nyakilego go ba nywagakgolo e lesome ka morago ga gagwe. (Ekisodo 34:28; Luka 4:1, 2) Dijo tšeo ga se tša ka tša fediša mathata a gagwe, eupša di ile tša mo matlafatša ka tsela ya mohlolo. Nagana ka mokgalabje yoo a katana go phatša lešoka le le se nago tsela matšatši a latelanago, dibeke tše latelanago lebakeng la mo e ka bago kgwedi le seripa!

 Jehofa o matlafatša bahlanka ba gagwe le lehono, e sego ka dijo tša mohlolo tša nama, eupša ka tsela e bohlokwa le go feta. O nea bahlanka ba gagwe dijo tša moya. (Mateo 4:4) Go ithuta ka Modimo go tšwa Lentšung la gagwe le dikgatišong tšeo di theilwego ka kelohloko Beibeleng go re matlafatša moyeng. Go ja dijo tšeo tša moya go ka no se fediše mathata a rena, eupša go tla re thuša go kgotlelela seo se ka bago se sa kgotlelelege. E bile go lebiša “[bophelong] bjo bo sa felego.”—Johane 17:3.

Eliya o sepetše mo e nyakilego go ba dikhilomithara tše 320 go ba go fihlela a fihla Thabeng ya Horebe, moo Jehofa Modimo kgale pele ga moo a ilego a iponagatša go Moshe ka morongwa wa gagwe a le sehlareng sa meetlwa seo se tukago le moo ka morago Jehofa a ilego a dira kgwerano ya Molao le Isiraele. Eliya o ile a hwetša tšhireletšo ka leweng.

Kamoo Jehofa a Homoditšego Moporofeta wa Gagwe le go mo Matlafatša

Thabeng ya Horebe, “lentšu” la Jehofa—mo go bonagalago le ile la tlišwa ke motseta wa moya—le ile la mmotšiša potšišo e bonolo e rego: “O nyaka eng mo Eliya?” Potšišo ye e swanetše go ba e botšišitšwe ka botho, ka gobane Eliya o ile a e tšea e le taletšo ya gore a tšholle sa mafahleng a gagwe. Gomme o ile a dira bjalo! O itše: “Ke hufegile ka baka la Jehofa Modimo wa madira; ka gobane bana ba Isiraele ba tlogetše kgwerano ya gago, ba phušola dialetare tša gago ba ba ba bolaya baporofeta ba gago ka tšhoša, moo nna ke šetšego ke nnoši; ba nyaka moya wa ka gore ba o bolaye.” (1 Dikgoši 19:9, 10) Mantšu a Eliya a bontšha bonyenyane mabaka a mararo a go nyama ga gagwe.

La pele, Eliya o be a bona eka modiro wa gagwe o be a o diretše lefeela. Go sa šetšwe nywaga ya gagwe ya go dula a “hufegile” go hlankeleng Jehofa, a etiša pele leina le lekgethwa la Modimo le borapedi bja gagwe, Eliya o ile a bona eka maemo a be a mpefaletše pele. Batho ba be ba sa dutše ba se na tumelo e bile e le marabele, mola borapedi bja maaka bo dutše bo phatlalala. La bobedi, Eliya o be a bona a šetše a nnoši. O itše: “Nna ke [šetše] ke nnoši,” mo nkego e be e le yena motho a nnoši yo a bego a dutše a hlankela Jehofa setšhabeng. La boraro, Eliya o be a boifa. Ba bantši ba baporofetagotee le yena ba be ba šetše ba bolailwe gomme o be a kgodišegile gore go be go tla latela yena. Go ka ba go be go se bonolo go Eliya gore a utolle maikwelo ao, eupša ga se a ka a dumelela boikgantšho goba dihlong di mo thibela. Ka go tšhollela Modimo sa mafahleng a gagwe ka thapelo, o ile a beela batho ka moka ba botegago mohlala o mobotse.—Psalme 62:8.

Jehofa o ile a swaragana bjang le dipoifo tša Eliya le dilo tšeo a bego a tshwenyegile ka tšona? Morongwa o ile a botša Eliya gore a eme molomong wa lewa. O ile a dira bjalo gaešita le ge a be a sa tsebe seo se tlago go direga. Go ile gwa tsoga phefo e matla! E swanetše go ba e ile ya baka lešata le legolo ka gobane e be e le e matla kudu moo e ilego ya pharola dithaba le maswika a magolo. Akanya Eliya a leka go šira mahlo a gagwe a le gare a  kakatletše kobo ya gagwe ya boya ya go aparwa nageng ge e dutše e tšubutlwa ke phefo yeo. Ke moka o ile a swanelwa ke go katanela go itsepelela, ka gobane lefase ka bolona le ile la thoma go šikinyega—tšhišinyego ya lefase e ile ya ba gona lefelo leo! A se a hlwa a boela sekeng ke ge go feta mollo o mogolo, wa mo gapeletša gore a boele ka leweng e le go itšhireletša phišong e tlabolago.—1 Dikgoši 19:11, 12.

Boemong bjo bongwe le bjo bongwe, pego e re gopotša gore Jehofa o be a se gare ga dipontšho tše tša matla a tlhago. Eliya o be a tseba gore Jehofa e be e se modimo wa nonwane wa tlhago, yo bjalo ka Baali, yoo a bego a rapelwa ke barapedi ba gagwe ba forilwego ba re ke “Monamedi wa Maru,” goba monešapula. Jehofa ke Mothopo wa matla ka moka a magolo a tlhago, eupša gape ke yo mogolo kudu go feta selo le ge e le sefe seo a se dirilego. Gaešita le magodimo a bonagalago a ka se kgone go mo lekana! (1 Dikgoši 8:27) Lega go le bjalo, dilo tše ka moka di thušitše Eliya bjang? Gopola poifo ya gagwe. A thekgilwe ke Modimo yo a swanago le Jehofa, Yo a nago le matla ao ka moka a magolo, Eliya o be a se a swanela go tšhaba Ahaba le Isebele!—Psalme 118:6.

Ge mollo o se na go feta, go ile gwa ba le setu gomme Eliya a kwa “lentšu la tlasana.” Le ile la laletša Eliya gore a itlhalose gape gomme o ile a dira bjalo, a bolela dilo tšeo a tshwenyegilego ka tšona la bobedi. * Mohlomongwe seo se ile sa mo imolla ka mo go oketšegilego. Lega go le bjalo, ga go pelaelo gore Eliya o ile a homotšega kudu ge a ekwa seo a se boditšwego ke “lentšu [leo] la tlasana.” Jehofa o ile a kgonthišetša Eliya gore o be a le bohlokwa. Bjang? Modimo o ile a utolla morero wa gagwe wa nakong e tlago wa mabapi le ntwa kgahlanong le borapedi bja Baali kua Isiraele. Go molaleng gore modiro wa Eliya e be e se wa lefeela, ka gobane morero wa Modimo o be o tšwela pele go sa šetšwe kganetšo. Go feta moo, Eliya o be a sa dutše e le karolo ya morero woo, ka gobane Jehofa o ile a mmušetša modirong wa gagwe a swere tlhahlo e lebanyago.—1 Dikgoši 19:12-17.

Lega go le bjalo, go thwe’ng ka go ipona ga Eliya a šetše a nnoši? Jehofa o ile a dira dilo tše pedi mabapi le seo. Sa pele, o ile a botša Eliya gore a tlotše Elisha gore e be moporofeta yo a bego a tla mo hlatlama mafelelong. Lesogana le le be le tla sepela le Eliya gomme la mo thuša ka nywaga e mmalwa. Ruri khomotšo yeo e bile e šomago! Sa bobedi, Jehofa o ile a utolla ditaba tše tše di thabišago tše rego: “Ke šadišitše batho ba dikete tše šupago (7 000) mo Isiraeleng, e lego bao ba sa kago ba khunamela Baali le go mo atla.” (1 Dikgoši 19:18) Eliya o be a se noši le gatee. O swanetše go ba a ile a ruthela pelo ge a ekwa ka batho bao ba dikete ba botegago bao ba bego ba gana go hlankela Baali. Ba be ba nyaka gore Eliya a tšwele pele a hlankela ka potego e le gore a bee mohlala wa go botegela Jehofa a sa šišinyege dinakong tšeo tša leswiswi. Eliya o swanetše go ba a ile a kgomega kudu ge a ekwa mantšu ao a bego a bolelwa ke motseta wa Jehofa, e lego “lentšu la tlasana” la Modimo wa gagwe.

Go swana le Eliya, re ka makatšwa ke matla a magolo a tlhago ao a bonagalago tlholong, e bile re swanetše go makala. Tlholo e bonagatša gabotse matla a Mmopi. (Baroma 1:20) Jehofa o sa dutše a rata go diriša matla a gagwe a sa lekanywego go thuša bahlanka ba gagwe ba botegago. (2 Dikoronika 16:9) Lega go le bjalo, Modimo o bolela le rena ka botlalo ka Lentšu la gagwe, e lego Beibele. (Jesaya 30:21) Ka tsela e itšego, Beibele e bjalo ka “lentšu la tlasana,” leo ka lona Jehofa a re hlahlago lehono, a re phošollago, a re kgothatšago le go re kgonthišetša gore o a re rata.

Na Eliya o ile a amogela khomotšo yeo Jehofa a mo filego yona Thabeng ya Horebe? Ga go pelaelo gore o ile a e amogela! Go se go ye kae o ile a boela modirong wa gagwe, e sa le moporofeta yo sebete le yo a botegago yoo a ilego a lwantšhana le bokgopo bja borapedi bja maaka. Ge e ba le rena ka mo go swanago re amogela mantšu a buduletšwego a Modimo ka pelo ka moka, e lego “khomotšo e tšwago Mangwalong,” re tla kgona go ekiša tumelo ya Eliya.—Baroma 15:4.

[Mengwalo ya tlase]

[Seswantšho go letlakala 19]

Jehofa o ile a šegofatša Eliya kudu, ge dilo di be di mo sepelela gabotse le ge di be di mo sepelela gampe

[Seswantšho go letlakala 20]

A gateletšegile kudu, Eliya o ile a tšhollela Jehofa sa mafahleng

[Seswantšho go letlakala 21]

Jehofa o ile a diriša matla a gagwe a magolo go homotša Eliya le go mo kgothatša