“Kganetšo Yeo e Swanetšego go Hlompšha”

NAKONG ya pušo ya gagwe e sehlogo bjalo ka tonakgolo ya Jeremane, Adolf Hitler o ile a amogela mangwalo a dikete tše masome. Ka 1945, ka morago ga gore Marussia a thope tikologo e dikologilego Berlin, a mantši a mangwalo a a ile a išwa Moscow le go bolokwa moo. Radifilosofi Henrik Eberle o hlahlobile mangwalo a bjalo a dikete ao a lego mafelong a go bolokela dipego a Moscow e le gore a bone gore ke bomang bao ba bego ba ngwaletše Hitler le gona ka baka la eng. Eberle o ile a ngwala diphetho tša gagwe ka pukung e nago le sehlogo se se rego Briefe an Hitler (Mangwalo a Ngwaletšwego Hitler).

Ngaka Eberle o re: “Barutiši le barutwana, baitlami ba basadi le baruti, batho ba hlokago mešomo le borakgwebo ba maemo a godimo, balaodi le mašole a tlwaelegilego a šoro—ka moka ga bona ba ile ba ngwalela Hitler. Ba bangwe ba be ba mo godiša e le Mesia yo a tswetšwego gape; ba bangwe ba mmona e le yo kgopo.” Na Hitler o ile a amogela mangwalo a go ipelaetša a tšwago go bahlankedi ba dikereke a mabapi le ditiro tše sehlogo tšeo di bego di dirwa ke Masošalise a Setšhaba, goba Manazi? O ile a a amogela, eupša mangwalo a bjalo a be a se kae.

Lega go le bjalo, mafelong a go bolokela dipego a Moscow, Eberle o ile a hwetša faele yeo e nago le mangwalo a mmalwa ao Dihlatse tša Jehofa di a ngwaletšego Hitler go tšwa dikarolong tše di fapafapanego tša Jeremane, di ipelaetša kgahlanong le boitshwaro bja Manazi. Ge e le gabotse, Dihlatse tše di tšwago dinageng tše e ka bago tše 50 di be di ngwaletše Hitler mangwalo a e ka bago a 20 000 le dithelekramo di ipelaetša ka go swarwa gampe ga Dihlatse tša Jehofa. Dihlatse tše dikete di ile tša golegwa gomme tše makgolo a mmalwa tša bolawa goba tša hwa ka baka la go swarwa gampe ke Manazi. Ngaka Eberle o phetha ka gore: “Ge go lebelelwa bahlaselwa ba dimilione ba pušo e sehlogo ya Nazi, palo ye [ya bahlaselwa ba Dihlatse] e bonagala e le e nyenyane. Eupša lega go le bjalo e nea bohlatse bja kganetšo yeo e swanetšego go hlompšha ya go ganetša [pušo ya Nazi] ka botee le ka go se kwanantšhe.”