Ithute Lentšung la Modimo

Re ka Kgetha Bagwera ba Babotse Bjang?

Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Ke ka baka la’ng re swanetše go kgetha bagwera ka kelohloko?

Batho ba bantši ba rata go amogelwa ke ba bangwe. Kganyogo ye gantši e dira gore re ekiše batho bao ba re dikologilego. Ka gona bagwera ba rena ba na le tutuetšo e kgolo ditshekamelong tša dipelo tša rena. Ka baka leo, bagwera bao re ba kgethago ba ka tutuetša semelo sa rena.—Bala Diema 4:23; 13:20.

Mongwadi yo a buduletšwego wa Beibele e lego Dafida o ile a kgetha bagwera ba gagwe ka bohlale. O ile a gwerana le bao ba bego ba mo thuša go dula a botega bjalo ka mohlanka wa Modimo. (Psalme 26:4, 5, 11, 12) Ka mohlala, Dafida o ile a thabela go ba mogwera wa Jonathane ka gobane Jonathane o be a mo kgothaletša go bota Jehofa.—Bala 1 Samuele 23:16-18.

2. O ka ba mogwera wa Modimo bjang?

Gaešita le ge Jehofa e le Ramatlaohle, re ka kgona go ba bagwera ba gagwe. Ka mohlala, Aborahama o ile a ba mogwera wa Modimo. Aborahama o be a bota Jehofa e bile a mo kwa, ka gona Jehofa o ile a mo tšea e le mogwera wa gagwe. (Genesi 22:2, 9-12; Jakobo 2:21-23) Ge e ba re bota Jehofa e bile re dira seo a rego re se dire, le rena re ka ba bagwera ba Modimo.—Bala Psalme 15:1, 2.

  3. Bagwera ba babotse ba ka go hola bjang?

Bagwera ba kgonthe ba a botega e bile ba go thuša go dira se se nepagetšego. (Diema 17:17; 18:24) Ka mohlala, gaešita le ge Jonathane a ka ba a be a feta Dafida ka nywaga e 30 gomme e be e le yena yoo a bego a swanetše go dula sedulong sa bogoši sa Isiraele, o ile a thekga Dafida ka potego ka ge e be e le yena yoo a bego a kgethilwe ke Modimo gore e be kgoši. Bagwera ba kgonthe gape ba na le sebete sa go go phošolla ge ba bona o dira dilo ka tsela e sego bohlale. (Psalme 141:5) Bagwera bao ba ratago Modimo ba tla go thuša go ba le mekgwa e mebotse.—Bala 1 Bakorinthe 15:33.

O ka kopana le batho bao ba ratago se se nepagetšego go swana le wena Holong ya Mmušo ya Dihlatse tša Jehofa. Moo o tla hwetša bagwera bao ba tlago go go kgothatša ge o dira maiteko a go kgahla Modimo.—Bala Baheberu 10:24, 25.

Lega go le bjalo, bagwera bao ba ratago Modimo le bona ka dinako tše dingwe ba ka re nyamiša. O se ke wa kgopišwa gabonolo ke diphošo tša bona. (Mmoledi 7:9, 20-22) Gopola gore ga go na mogwera yo a phethagetšego le gore bagwera bao ba ratago Modimo ba bohlokwa go rena. Lentšu la Modimo le re kgothaletša go hlokomologa mafokodi a Bakristegotee le rena.—Bala Bakolose 3:13.

4. Go thwe’ng ge e ba bao o rego ke bagwera ba go ganetša?

Batho ba bantši ba hwetša gore ge ba thoma go amogela thušo ya go kwešiša Lentšu la Modimo, bagwera ba bona ba kgale ba a ba ganetša. Mohlomongwe bagwera bao ga ba kwešiše keletšo e šomago goba kholofelo ya kgonthe yeo o e hweditšego ka Beibeleng. Mohlomongwe o ka ba thuša.—Bala Bakolose 4:6.

Mabakeng a mangwe, bao o rego ke bagwera ba ka kwera ditaba tše dibotse tšeo di hwetšwago ka Lentšung la Modimo. (2 Petro 3:3, 4) Ba bangwe ba ka go kwera ge o dira maiteko a go dira se se nepagetšego. (1 Petro 4:4) Ge seo se ka go diragalela, o ka swanelwa ke go kgetha magareng ga go ba mogwera wa bona le go ba mogwera wa Modimo. Ge o ka kgetha go ba mogwera wa Modimo, o tla ba o kgethile mogwera yo a ba phalago bohle.—Bala Jakobo 4:4, 8.

Bakeng sa tsebišo e oketšegilego, bona dikgaolo 12 le 19 tša puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.