Na Modimo o a re Otla?
Moetapele yo mongwe wa dipolitiki wa Mojapane ka morago ga gore naga yeo e hlaselwe ke tšhišinyego ya lefase ya bogolo bja 9,0 le tsunami ka March 2011, o boletše gore: “Ke nagana [gore] ke ‘tembatsu’ (kotlo e tšwago go Modimo), gaešita le ge ke kwela bahlaselwa ba dikotsi tšeo bohloko.”
Ge batho ba fetago 220 000 ba be ba ehwa tšhišinyegong ya lefase yeo e hlasetšego Haiti ka January 2010, moruti yo mongwe yo a tumilego wa thelebišeneng o boletše gore ke ka gobane ba ile “ba dira kgwerano le diabolo” gomme ba swanetše go “boela go modimo.”
Ge batho ba 79 ba be ba ehwa ka go gatakelwa mpherefereng wa go tšhaba kua Manila, Philippines, moruti yo mongwe wa Katholika o boletše gore: “Modimo o nyaka go tsoša matswalo a rena a hwilego le a retetšego.” Kuranta ya moo e begile gore “masomepedi-tee lekgolong ya batho e dumela gore Modimo o bonagatša kgalefo ya gagwe a diriša go kgerega ga mobu, madimo le dikotsi tše dingwe” tšeo di hlaselago naga.
TUMELO ya gore Modimo o baka dikotsi go otla batho ba babe ga se e mpsha. Ka 1755, ka morago ga gore batho ba 60 000 ba bolawe ke tšhišinyego ya lefase, mollo le tsunami tšeo di hlasetšego Lisbon, Portugal, radifilosofi yo a tumilego Voltaire o botšišitše gore: “Na go ile gwa hwetšwa bobe bjo bogolo kua Lisbon yeo e welego go feta kua Paris, moo go tletšego maipshino?” Ge e le gabotse, batho ba dimilione ba be ba dutše ba ipotšiša ge e ba Modimo a diriša dikotsi tša tlhago go otla batho. Dinageng tše dintši dikotsi tše bjalo ge e le gabotse di bitšwa gore ke ditiro tša Modimo.
Ka baka la tše ka moka, re ka ipotšiša gore: Na ruri Modimo o be a dutše a diriša dikotsi tša tlhago go otla batho? Na lefula la morago bjale la ditiragalo tše kotsi ke kotlo e tšwago go Modimo?
Ba akgofetše go bea Modimo molato, ba bangwe ba šupa go dipego tša Beibele tšeo go tšona Modimo a ilego a tliša phedišo a diriša dilo tša tlhago. (Genesi 7:17-22; 18:20; 19:24, 25; Numeri 16:31-35) Lega go le bjalo, tlhahlobo ya dipego tše tša Beibele e bontšha gore tiragalong e nngwe le e nngwe go na le dintlha tše tharo tše kgolo tšeo di dirago gore di fapane le dikotsi tša tlhago. Ya pele, go bile le temošo pele. Ya bobedi, ka go se swane le dikotsi tša lehono tša tlhago, tšeo di bolayago batho ba ba lokilego le ba babe, phedišo e tšwago go Modimo e be e hlaola. Go ile gwa fedišwa batho ba kgopo feela bao ba bego ba sa ikemišetša go fetoga goba bao ba bego ba gana go theetša ditemošo. Ya boraro, Modimo o ile a bula tsela ya gore batho ba se nago molato ba phologe.—Genesi 7:1, 23; 19:15-17; Numeri 16:23-27.
Ga go na bohlatse bjo bo bontšhago gore Modimo o bakile dikotsi tše dintši tšeo di bolailego batho ba dimilione lehono. Ka gona, ke’ng seo se dirago gore dikotsi tše bjalo di bonagale di oketšega? Re ka lebeletšana le tšona bjang? Na go tla ka gwa ba le nako yeo ka yona dikotsi di ka se sa hlwago di eba gona? O tla hwetša dikarabo dihlogong tše di latelago.
You May Also Like
MOROKAMI
Dikotsi tša Tlhago—Ke ka Baka la Eng e le tše Dintši Gakaakaa?
Jesu o boletše e sa le pele ka go ata ga dikotsi. Seo se bolela’ng go rena lehono?
