Aborahama e be e le Mang?

KE BANNA ba sego kae bao ba bilego le tutuetšo e kgolo madumeding a lefase. Ka ge a hlompšha ke Bajuda, Mamoseleme gotee le ke Bakriste, Aborahama * o hlalositšwe e le “moanegwa yo bohlokwa ka Mangwalong” le “mohlala o bohlokwa wa tumelo.” Beibele e mmitša gore ke “tatago bohle bao ba nago le tumelo.”—Baroma 4:11.

Ke ka baka la’ng Aborahama a be a tšeelwa godimo gakaakaa? Sa pele, Aborahama ke yena feela yoo Beibele e mmitšago ka go lebanya gore ke mogwera wa Modimo—le gona e mmitša ka makga a mararo!—2 Dikoronika 20:7, mongwalo wa ka tlase wa Reference Bible; Jesaya 41:8; Jakobo 2:23.

Lega go le bjalo, Aborahama e be e le motho yo a tlwaelegile go swana le rena ka ditsela tše dingwe. O ile a lebeletšana le ditlhohlo tšeo le rena re lebeletšanago le tšona—le gona o ile a lebeletšana le tšona ka katlego. Na o ka rata go tseba gore o ile a dira seo bjang? Ela hloko seo Beibele e se utollago ka monna yo yo bohlokwa.

Setlogo sa Gagwe

Aborahama o belegwe ka ngwaga wa 2018 B.C.E., gomme o goletše nageng ya Uri. (Genesi 11:27-31) Uri e be e le motse o mogolo le o humilego. O be o tletše ka borapedi bja diswantšho. Go ka direga gore tatago Aborahama, Thera, o be a le gare ga bao ba bego ba rapela medimo e fapafapanego ya diswantšho. (Joshua 24:2) Lega go le bjalo, Aborahama o ile a kgetha go rapela Jehofa * a nnoši go e na le go rapela diswantšho tše sa phelego tša medimo e mengwe.

Ke’ng seo se tutueleditšego Aborahama go dira phetho yeo? Go ba gona, Aborahama o belegwe nywaga e 150 pele ga lehu la Sheme morwa wa Noa. A ka ba a ile a kgomega bjang ge e ba a ile a ba le tswalano le monna yo yoo a tšofetšego? Aborahama a ka ba a ile a ithuta ka go lebanya go tšwa go Sheme gore go be go le bjang go phologa Meetsefula a lefase ka bophara. A ka ba a ile a ithuta le ka bohlokwa bja go rapela Jehofa, Modimo yo a phološitšego Sheme le lapa la gabo Meetsefuleng ao.

Go sa šetšwe gore e bile ka Sheme goba ka ditsela tše dingwe, Aborahama o ile a arabela gabotse go seo a ithutilego sona mabapi le Modimo wa therešo. Ge Jehofa, “mohlahlobi wa dipelo,” a be a lekola Aborahama, o ile a bona selo se itšego se sebotse go monna yo—ke moka a mo thuša go se godiša.—Diema 17:3; 2 Dikoronika 16:9.

Bophelo bja Gagwe

Aborahama o phetše bophelo bja gagwe ka botlalo, e lego bophelo bjoo ka dinako tše dingwe bo bego bo ena le ditlhohlo eupša bo ena le morero. Ela hloko dilo tše mmalwa tšeo a ilego a lebeletšana le tšona.

▪ Ge Aborahama a be a dula Uri, Modimo o ile a mo laela gore a tloge nageng yeo a belegetšwego go yona gomme a lebe nageng yeo Yena a bego a tla mo laetša yona. Gaešita le ge Aborahama le Sara ba be ba sa tsebe ditaba ka botlalo—moo ba bego ba eya gona goba lebaka leo ka lona Modimo a bego a ba kgopela gore ba sepele—ba ile ba mo kwa. Mafelelong Aborahama le Sara ba ile ba dula ditenteng nageng ya Kanana, gomme ba phetše e le badiiledi bophelo bja bona ka moka.—Ditiro 7:2, 3; Baheberu 11:8, 9, 13.

▪ Ge Aborahama le Sara ba be ba sa dutše ba se na bana, Jehofa o ile a holofetša go dira Aborahama setšhaba se segolo. Jehofa o ile a oketša ka gore malapa ka moka a lefase a be a tla šegofatšwa ka Aborahama. (Genesi 11:30; 12:1-3) Jehofa ka morago o ile a kgonthišetša kholofetšo yeo. O ile a botša Aborahama gore peu ya gagwe e be e tla ata go swana le dinaledi tša magodimong.—Genesi 15:5, 6.

 ▪ Ge Aborahama a be a ena le nywaga e 99 gomme Sara a ena le e nyakilego go ba e 90, Jehofa o ile a holofetša gore ba be ba tla ba le morwa. Se se ile sa bonala se sa kgonege go ya ka pono ya motho, eupša go se go ye kae Aborahama le Sara ba ile ba ithuta gore ga “go na le seo se ka palelago Jehofa.” (Genesi 18:14) Ngwaga ka morago, ge Aborahama a ena le nywaga e 100, o ile a ba le morwa, yoo a ilego a mo reela leina la Isaka. (Genesi 17:21; 21:1-5) Modimo o ile a holofetša ka go lebanya gore ditšhegofatšo tše dikgolo di be di tla tlela batho ka Isaka.

▪ Nywaga e itšego ka morago, Jehofa o ile a kgopela Aborahama selo se itšego seo se sa tlwaelegago: O ile a kgopela Aborahama gore a dire sehlabelo ka morwa wa gagwe yo a mo ratago, Isaka, gaešita le ge lesogana le le be le se la nyala e bile le se na bana. * Gaešita le ge kgopolo ya go lahlegelwa ke morwa e swanetše go ba e ile ya mo kweša bohloko, Aborahama o ile a itokišeletša go kwa le go neela Isaka e le sehlabelo. Aborahama o ile a dumela ka go tia gore ge go be go nyakega, Modimo o be a tla tsoša Isaka, e le gore a phethagatše dikholofetšo tša Gagwe. (Baheberu 11:19) Motsotsong wa mafelelo ge Aborahama a be a tlo neela morwa wa gagwe, Modimo o ile a tsena ditaba gare, a phološa bophelo bja Isaka. O ile a reta Aborahama bakeng sa tsela yeo a ilego a bontšha go kwa ka yona. Ke moka Jehofa o ile a boeletša kholofetšo ya gagwe ya pejana go Aborahama.—Genesi 22:1-18.

▪ Aborahama o hwile a phetše nywaga e 175. Beibele e re: O ile “a hwa a tšofetše” gomme ya oketša ka gore “e le mokgalabje e bile a khoše bophelo.” (Genesi 25:7, 8) Ka go re’alo, Aborahama o ile a bona go phethagala ga kholofetšo e nngwe ya Modimo—ya gore, o be a tla phela galelele pele ga ge a ka hwa ka khutšo.—Genesi 15:15.

Seo a Gopolwago ka Sona

Aborahama ga se feela mohlala wa motho wa bodumedi goba wa histori wa mehleng ya bogologolo. Le lehono, o sa gopolwa ka mohlala wa gagwe o mobotse woo ka moka ga rena re ka o ekišago. (Baheberu 11:8-10, 17-19) Anke re hlahlobeng tše nne tša dika tše dibotse tšeo Aborahama a di bontšhitšego. Re tla thoma ka seka sa gagwe seo mohlomongwe a tsebjago kudu ka sona—tumelo.

[Mengwalo ya tlase]

[Lepokisi go letlakala 4]

Moanegwa yo Bohlokwa Kudu Historing ya Beibele

Dikgaolong tša yona tša pele tše lesome, puku ya Beibele ya Genesi e bega ka histori ya maphelo a banna ba tumelo, go akaretša Abele, Henoge le Noa. Lega go le bjalo, dikgaolo tša yona tše 15 tše latelago di bolela kudu ka bophelo bja monna o tee—Aborahama.

Go feta moo, Beibele e bolela la mathomo ka tše dingwe tša ditaba tša yona tše bohlokwa mabapi le Aborahama. Ka mohlala, kanegelong ya bophelo bja Aborahama re hwetša . . .

▪ go bolelwa la mathomo ka Modimo e le Kotse ya, goba Mošireletši wa, bahlanka ba gagwe.—Genesi 15:1; bona Doiteronomio 33:29; Psalme 115:9; Diema 30:5.

▪ go bolelwa la mathomo ka go ba le tumelo go Modimo.—Genesi 15:6.

▪ go bolelwa la mathomo ka lentšu moporofeta.—Genesi 20:7.

▪ go bolelwa la mathomo ka lerato la motswadi.—Genesi 22:2.