ESITERE o batamela sedulo sa bogoši ka go nanya, pelo ya gagwe e tula ka lebelo. Akanya gateetee go eba le setu kgorong e kgolo ya kgoši ya mošate wa Peresia wa Shushani, go homotše kudu moo Esitere a bego a kgona go kwa mešitwana ya gagwe le go gwaša ga diaparo tša gagwe tša bogoši. O be a swanetše go tsepamiša kgopolo gomme a se ke a šitišwa ke bobotse bja kgoro ya kgoši, dikokwane tše kgahlišago gotee le siling yeo e dirilwego ka dikota tšeo di betlilwego gabotse kudu tša metsedara tšeo di tšwago Libanoni yeo e lego kgole. O ile a dula a tsepamišeditše kgopolo ya gagwe go monna yo a dutšego sedulong sa bogoši, e lego monna yoo bophelo bja gagwe bo bego bo ithekgile ka yena.

Kgoši e mo tsepeletše ge a dutše a batamela, gomme e mo šupa ka molamo wa yona wa gauta. Yeo e be e le tiro e bonolo, eupša e ile ya phološa bophelo bja Esitere, ka gobane ka yona kgoši e be e mo lebalela molato wo a bego a sa tšwa go o dira—wa go tšwelela pele ga kgoši e se ya mo laletša. Ge a dutše a batamela sedulo sa bogoši, Esitere o otlolla letsogo la gagwe gomme o kgwatha hlogwana ya molamo ka tebogo.—Esitere 5:1, 2. *

Dilo ka moka tša Kgoši Ahasiwerosi di be di bontšha lehumo la gagwe le legolo le matla. Seaparo sa bogoši sa dikgoši tša Peresia tša mehleng yeo ruri se be se bitša tšhelete yeo e lekanago le diranta tše dimilione tše makgolo. Lega go le bjalo, Esitere o be a kgona go bona borutho ka mahlong a monna wa gagwe; monna wa gagwe o be a mo rata ka tsela e itšego. O itše: “Bothata ke eng, wena mohumagadi Esitere, le gona ke eng seo o nyakago go se kgopela? Anke o newe le ge e ka ba seripa sa mmušo!”—Esitere 5:3.

Esitere o be a šetše a bontšhitše tumelo le sebete ka tsela e makatšago; o be a tlile pele ga kgoši go tlo šireletša batho ba gabo leanong la go ba fediša ka moka. Go fihla ga bjale, o be a atlegile, eupša ditlhohlo tše dikgolo di letše ka pele. O be a swanetše go kgodiša kgoši ye ya go ikgantšha gore moeletši wa yona yo e mmotago kudu ke monna yo kgopo yoo a radiilego kgoši gore e ahlolele batho ba gabo Esitere lehu. O be a tla e kgodiša bjang, le gona re ka ithuta’ng tumelong ya gagwe?

Ka Bohlale o Ile a Kgetha “Nako ya go Bolela”

Na Esitere o be a swanetše go utollela kgoši mathata ka moka moo pele ga kgoro ya yona? Ge a be a ka dira bjalo o be a tla e theola seriti le go nea moeletši wa yona Hamani nako ya go lwantšha ditatofatšo tša gagwe. Bjale Esitere o ile a dira’ng? Nywagakgolo pejana, Kgoši Solomone yo bohlale o ile a budulelwa go ngwala gore: “Selo se sengwe le se sengwe se na le nako ya sona e beilwego, . . . nako ya go homola le nako ya go bolela.” (Mmoledi 3:1, 7) Re ka akanya ka tatago Esitere wa mogodiši, Morodekai yo a botegago, a ruta kgarebe ye melao e bjalo ya motheo ge a dutše a e godiša.  Esitere ka ntle le pelaelo o be a kwešiša bohlokwa bja go kgetha ka kelohloko “nako ya go bolela.”

Esitere o itše: “Ge e ba wena kgoši o bona e le mo gobotse, anke lehono wena kgoši o tle le Hamani monyanyeng wo ke go diretšego wona.” (Esitere 5:4) Kgoši e ile ya dumela gomme ya re go bitšwe Hamani. Na o kgona go bona bohlale bjoo Esitere a bo bontšhitšego ge a bolela? O ile a nea monna wa gagwe seriti gomme a dira gore go be le boemo bjo bokaone bja go mo utollela dilo tšeo a tshwenyegilego ka tšona.

Ga go pelaelo gore Esitere o ile a lokišeletša monyanya woo ka kelohloko, a katanela go dira dilo ka moka ka tsela yeo kgoši e tlago go di thabela. Monyanyeng woo go be go ena le beine e bose ya go dira gore boemo e be bjo bo thabišago. (Psalme 104:15) Ahasiwerosi o ile a thaba kudu a ba a šušumeletšega go botšiša Esitere gape gore o be a kgopela’ng. Na ye e be e le nako ya go bolela?

Esitere o be a sa nagane bjalo. Go ena le moo, o ile a laletša kgoši le Hamani gore ba tle monyanyeng wa bobedi, letšatšing le le latelago. (Esitere 5:7, 8) Ke ka baka la’ng a ile a diega go bolela? Gopola gore batho ba gabo Esitere ka moka ba be ba lebane le lehu go ya ka taelo ya kgoši. Ka ge ka moka ba be ba le kotsing, Esitere o be a swanetše go kgonthišega gore nako e be e le e loketšego. Ka gona o ile a leta, e le ge a bula sebaka se sengwe sa go bontšha monna wa gagwe kamoo a mo tšeelago godimo ka gona.

Go se fele pelo ke seka se se hwetšwago ka sewelo e bile se bohlokwa. Gaešita le ge a gateletšegile e bile a fagahletše go bolela seo a se nagannego, Esitere ka go se fele pelo o ile a letela nako e loketšego. Re ka ithuta mo gontši mohlaleng wa gagwe, ka gobane ka moka ga rena re ka ba re ile ra bona diphošo tšeo di swanetšego go phošollwa. Ge e ba re nyaka go kgodiša motho yo a nago le matla a taolo gore a lokiše bothata bjo itšego, re swanetše go ekiša Esitere gomme re se ke ra fela pelo. Diema 25:15 e re: “Molaodi o fenywa ke go se fele pelo, leleme le boleta le ka roba lerapo.” Ge e ba ka go se fele pelo re letela nako e swanetšego le go bolela ka boleta, go swana le Esitere, gaešita le kganetšo e thata bjalo ka lerapo e ka robega. Na Modimo wa Esitere e lego Jehofa, o ile a šegofatša go se fele pelo le bohlale bja gagwe?

Go se Fele Pelo go Ala Tsela Bakeng sa Toka

Go se fele pelo ga Esitere go ile gwa ala tsela bakeng sa tatelano e makatšago ya ditiragalo. Hamani o ile a tloga monyanyeng wa mathomo a thabile, “pelo ya gagwe e kwele bose” ka ge kgoši le mohumagadi ba mo amogetše ka tsela ye. Lega go le bjalo, ge Hamani a feta kgorong ya mošate o bona Morodekai, yena Mojuda yoo a sa dutšego a gana go mo nea tlhompho e kgethegilego. Mabaka a Morodekai a be a sa tswalane felo le go hloka  tlhompho eupša, go e na le moo, a be a tswalana le letswalo gotee le tswalano ya gagwe le Jehofa Modimo. Lega go le bjalo, Hamani o ile “a napa a befelela Morodekai.”—Esitere 5:9.

Ge Hamani a be a botša mosadi wa gagwe le bagwera ba gagwe ka se, ba ile ba mo kgothaletša gore a lokišeletše kota e telele, ya botelele bja dimithara tša ka godimo ga tše 22, le gore a kgopele kgoši gore e mo dumelele go fega Morodekai go yona. Hamani o ile a rata kgopolo yeo gomme gateetee a laela gore go dirwe kota yeo.—Esitere 5:12-14.

Go sa le bjalo, kgoši e ile ya ba le bošego bjo bo makatšago. Beibele e re botša gore “kgoši ya felelwa ke boroko,” ka gona ya dira gore bahlankedi ba e balele dipego tša ditaba tša Mmušo woo ka go hlaboša. Ditaba tšeo di be di akaretša pego ya maanomabe a go bolaya Ahasiwerosi. E ile ya gopola taba yeo; batho bao ba bego ba nyaka go e bolaya ba ile ba swarwa gomme ba bolawa. Lega go le bjalo, go thwe’ng ka monna yoo a bego a pepentšhitše maanomabe ao, e lego Morodekai? Gateetee ge e lemoga se, kgoši e ile ya botšiša gore Morodekai o ile a putswa bjang. Karabo e bile efe? Monna yoo ga se a ka a putswa ka selo.—Esitere 6:1-3.

E huduegile, kgoši e ile ya botšiša bahlankedi ba kgoro bao ba bego ba le gona gore ba e thuše go lokiša phošo ye. Hamani o be a le ka kgorong ya kgoši—go bonagala a be a tlile ka pela ka gobane o be a fagahletše go hwetša tumelelo ya kgoši ya go bolaya Morodekai. Eupša pele a ka dira kgopelo ya gagwe, kgoši e ile ya botšiša Hamani gore e be e swanetše go godiša bjang monna yo e nyakago go mo godiša. Hamani o ile a tšea gore kgoši e be e naganne ka yena. Ka gona Hamani o ile a kgetha kgodišo ya manobonobo a re: Apeša monna yoo diaparo tša kgoši, gomme mokgomana a mo sepediše Shushani ka pere ya kgoši, a rete monna yoo a goeletše e le gore a kwewe ke batho bohle. Akanya ka ponagalo ya sefahlego sa Hamani ge a be a ekwa gore monna yoo a swanetšego go godišwa e be e le Morodekai! Le gona ke mang yoo kgoši e ilego ya mo laela gore a rete Morodekai? Ke Hamani!—Esitere 6:4-10.

Hamani ka go kgokgona o ile a phetha seo go yena e bego e le modiro woo a bego a sa o rate ke moka a akgofela gae a gateletšegile. Mosadi wa gagwe le bagwera ba gagwe ba ile ba re phetogo ye ya ditiragalo e ka ba le ditlamorago tše sa kgahlišego; o be a tla palelwa ntweng ya gagwe kgahlanong le Morodekai wa Mojuda.—Esitere 6:12, 13.

Ka ge Esitere a be a sa fele pelo, go leta ga gagwe letšatši le lengwe gore a tle a botše kgoši seo a se kgopelago, Hamani o ile a fiwa nako ya go thea motheo wa go wa ga gagwe. Le gona na se ga se bontšhe gore Jehofa Modimo ke yena yo a dirilego gore kgoši e felelwe ke boroko? (Diema 21:1) Ga go makatše ge Lentšu la Modimo le re kgothaletša go bontšha “moya wa go leta.” (Mika 7:7) Ge re letela Modimo, re ka lemoga gore ditharollo tša gagwe tša mathata a rena di feta kgole tharollo le ge e le efe yeo re ka bago re e naganne.

O Ile a Bolela ka Sebete

Esitere ga se a ka a leka go se fele pelo ga kgoši gape; monyanyeng wa gagwe wa bobedi, o ile a swanelwa ke go bolela dilo tšohle. Eupša bjang? Go ba gona, kgoši e ile ya mo nea sebaka gomme ya mmotšiša gape gore o kgopela’ng. (Esitere 7:2) “Nako ya go bolela” ya Esitere e be e fihlile.

Re ka akanya ka Esitere a rapela Modimo wa gagwe ka setu pele a bolela mantšu a: “Ge e ba wena kgoši o nkgaugetše gomme o bona e le mo gobotse, gona ke kgopela gore o phološe moya wa ka le setšhaba sa gešo.” (Esitere 7:3) Ela hloko gore o ile a kgonthišetša kgoši gore o be a hlompha kahlolo ya yona mabapi le seo se bego se bonagala se lokile. Ruri Esitere o be a sa swane le Wasithi, mosadi wa kgoši wa nakong e fetilego, yoo a ilego a theola  monna wa gagwe seriti ka boomo! (Esitere 1:10-12) Go feta moo, Esitere ga se a ka a nyatša bošilo bja kgoši bja go bota Hamani. Go e na le moo, o ile a lopa kgoši gore e mo šireletše kotsing yeo e bego e tla mo amoga bophelo bja gagwe.

Kgopelo yeo ruri e ile ya kgoma kgoši le go e makatša. Ke mang yo a bego a ka leka go bea mohumagadi wa yona kotsing? Esitere o ile a tšwela pele ka gore: “Nna le setšhaba sa gešo re rekišitšwe gore re fedišwe, re bolawe re be re swielwe. Ge nkabe re be re rekišitšwe gore re fo ba makgoba a banna le bahlanka ba basadi, ke be ke tla homola. Eupša tlalelo ye ga se ya swanela ka ge seo se tla senyetša le wena kgoši.” (Esitere 7:4) Ela hloko gore Esitere o bolela bothata ka go lebanya, lega go le bjalo o ile a tlaleletša ka gore o be a tla homola ge nkabe kotsi e be e fo ba ya go dirwa makgoba. Lega go le bjalo, o be a ka se homole mabapi le polao ye ya molokwanarite ka ge e be e tla kgoma kgoši kudu.

Mohlala wa Esitere o re ruta kudu ka bokgoni bja go kgodiša. Ge e ba o ka swanelwa ke go pepentšha bothata bjo bogolo go moratiwa goba gaešita le go motho yo a nago le matla a magolo a taolo, o ka thušwa ke motswako wa go se fele pelo, tlhompho le go bolela ka go lebanya.—Diema 16:21, 23.

Ahasiwerosi o ile a botšiša gore: “Ke mang a nyakago go dira tšeo, le gona o kae motho yoo a betilego pelo a nyaka go dira tšeo?” Akanya ka Esitere a šupa ka monwana ge a bolela gore: “Monna yoo wa moganetši e bile e le lenaba ke Hamani yo yo mobe.” Tatofatšo yeo e ile ya fegwa lebakanyana. Hamani o ile a tšhoga o šoro. Bona ka leihlo la kgopolo ge sefahlego sa kgoši ye yeo e sa tsepamago se hwibila ge e lemoga gore moeletši wa yona yoo e mmotago o be a e radiile gore e saene taelo ya go bolaya mosadi wa yona yo a rategago! Kgoši e ile ya tšwa ka go akgofa gomme ya ya ka serapeng go yo theoša maswafo.—Esitere 7:5-7.

Hamani, ka ge a pepentšhitšwe bjalo ka lefšega la maanomabe, o ile a itahlela dinaong tša mohumagadi. Ge kgoši e boa ka phapošing gomme e bona Hamani a llela Esitere bolaong bja gagwe, e ile ya latofatša Hamani e ferekane ka gore o be a leka go kata mohumagadi ka ngwakong wa kgoši. Seo se be se bolela lehu go Hamani. O ile a tšewa a khurumeditšwe sefahlego. Yo mongwe wa bahlankedi ba kgoši o ile a botša kgoši ka kota e telele yeo Hamani a bego a e diretše go tlo fega Morodekai go yona. Gateetee Ahasiwerosi o ile a laela gore Hamani a fegwe koteng yeo.—Esitere 7:8-10.

Lefaseng la lehono le le hlokago toka, go bonolo go akanya gore re ka se tsoge re bone go dirwa dilo ka toka. Na o kile wa ikwa ka tsela yeo? Esitere ga se a ka a lahlegelwa ke kholofelo, ga se a ka a swayaswaya diphošo e bile ga se a ka a felelwa ke tumelo. Ge nako e fihla, o ile a bolela se se nepagetšego ka sebete e bile a bota gore Jehofa o tla dira seo se nyakegago. Anke re direng se se swanago! Jehofa ga se a ka a fetoga ga e sa le go tloga mehleng ya Esitere. O sa dutše a kgona go swara bakgopo le baradia melabeng ya bona, go fo swana le ge a dirile ka Hamani.—Psalme 7:11-16.

 O Ile a Direla Jehofa le Batho ba Gagwe ka go Hloka Boithati

Mafelelong, kgoši e ile ya tseba gore Morodekai ke mang—e se feela motho yo a ilego a mo šireletša ka potego leanong la go mmolaya eupša gape e le tatago Esitere wa mogodiši. Ahasiwerosi o ile a nea Morodekai maemo a Hamani a go ba tonakgolo. Kgoši e ile ya nea Esitere ntlo ya Hamani—go akaretša le mahumo a gagwe a mantši—gomme Esitere a bea Morodekai gore a e hlokomele.—Esitere 8:1, 2.

Ka ge bjale Esitere le Morodekai ba šireletšegile, na mohumagadi o be a ka iketla? O be a ka dira bjalo ge feela a be a ena le boithati. Lebakeng leo, taelo ya Hamani ya go bolaya Bajuda ka moka e be e romelwa dikarolong ka moka tša mmušo woo. Hamani o be a lahletše matengwa, goba Puri—mohuta wa go dirišana le meoya—gore a bone nako e loketšego ya go phethagatša tlhaselo ye e šoro. (Esitere 9:24-26) Go be go sa šetše dikgwedi gore letšatši leo le fihle, eupša le be le batamela ka lebelo. Na kotsi yeo e be e sa dutše e ka phengwa?

Esitere ka go hloka boithati o ile a bea bophelo bja gagwe kotsing gape, a tšwelela pele ga kgoši gape a se a laletšwa semmušo. Lebakeng le, o ile a llela batho ba gabo, a kgopela monna wa gagwe gore a fetole taelo yeo e šoro. Eupša melao yeo e beilwego leineng la kgoši ya Peresia e be e sa kgone go fetolwa. (Daniele 6:12, 15) Ka gona kgoši e ile ya nea Esitere le Morodekai matla a go ngwala melao e mefsa. Go ile gwa romelwa taelo ya bobedi, yeo e bego e nea Bajuda tshwanelo ya go itwela. Banamedi ba dipere ba ile ba kitimela karolong  e nngwe le e nngwe ya mmušo woo, ba išetša Bajuda ditaba tše tše dibotse. Ba bantši ba ile ba boela ba ba le kholofelo. (Esitere 8:3-16) Re ka akanya ka Bajuda ba mmušong woo o mogolo ka moka ba itlhama le go itokišeletša ntwa, e lego seo ba bego ba ka se tsoge ba kgonne go se dira ka ntle le taelo yeo. Lega go le bjalo, se bohlokwa kudu ke gore na “Jehofa wa madira” o be a tla ba le batho ba gagwe?—1 Samuele 17:45.

Ge letšatši leo le bego le beilwe le fihla, batho ba Modimo ba be ba itokišitše. Gaešita le bahlankedi ba bantši ba Peresia ba be ba le ka lehlakoreng la bona ga bjale, ka ge ditaba tša mabapi le tonakgolo e mpsha, Morodekai wa Mojuda, di ile tša fihla kgole le kgauswi. Jehofa o ile a nea batho ba gagwe phenyo e kgolo. Ka ntle le pelaelo o ile a kgonthišetša gore manaba a bona a fenywa ka mo go feletšego e le gore a se ke a buša a gobatša batho ba gagwe. *—Esitere 9:1-6.

Go feta moo, Morodekai o be a ka se hlokomele ntlo ya Hamani a šireletšegile mola barwa ba lesome ba monna yoo yo mobe ba sa phela. Le bona ba ile ba bolawa. (Esitere 9:7-10) Ka go re’alo go ile gwa phethagala boporofeta bja Beibele, ka gobane pejana Modimo o be a ile a bolela e sa le pele ka phedišo e feletšego ya Baamaleke, bao ba ilego ba ipontšha e le manaba a kgopo a batho ba gagwe. (Doiteronomio 25:17-19) Barwa ba Hamani e ka ba e be e le ba bangwe ba ba mafelelo ba setšhaba seo se bego se ahlotšwe.

Esitere o ile a swanelwa ke go rwala e sa le yo monyenyane boikarabelo bja gagwe bjo boima—bjo bjalo ka go nea ditaelo tša dintwa le dikahlolo. Seo se ka ba se be se se bonolo. Eupša thato ya Jehofa e be e le gore batho ba gagwe ba šireletšwe phedišong; setšhaba sa Isiraele se be se swanetše go tšweletša Mesia yo a holofeditšwego, mothopo o nnoši wa kholofelo bakeng sa batho ka moka! (Genesi 22:18) Bahlanka ba Modimo lehono ba thabela go tseba gore ge Mesia, Jesu, a be a etla lefaseng, o ile a thibela balatedi ba gagwe go tloga ka nako yeo gore ba se ke ba tšea karolo dintweng.—Mateo 26:52.

Lega go le bjalo, Bakriste ba tšea karolo ntweng ya moya; Sathane o tloga a fagahletše go fediša tumelo ya rena go Jehofa Modimo. (2 Bakorinthe 10:3, 4) A tšhegofatšo e kaakaang go ba le mohlala wa Esitere! Go swana le yena, anke re bontšheng tumelo ka go diriša ga rena bokgoni bja go kgodiša ka bohlale le ka go se fele pelo, ka sebete sa rena gotee le ka go ikemišetša ga rena go emela batho ba Modimo ka go hloka boithati.

[Mengwalo ya tlase]

[Lepokisi go letlakala 28]

Dipotšišo Mabapi le Esitere

Ke ka baka la’ng Morodekai a ile a dumelela Esitere a nyalwa ke moheitene yo a sa dumelego?

Ga go moo tšhišinyo ya diithuti e theilwego gona ya gore Morodekai e be e le motho yo a ikholago ka dibaka yoo a bego a nyaka gore Esitere a nyalwe ke kgoši ka gobane a be a nyaka botumo. Ka ge e be e le Mojuda yo a botegago, a ka ba a be a sa dumelelane le lenyalo leo. (Doiteronomio 7:3) Dikanegelo tša bogologolo tša Bajuda di bolela gore Morodekai o ile a leka go thibela lenyalo leo. Ga go bonagale eka yena goba Esitere, bao e bego e fo ba batho ba šele nageng yeo e bego e bušwa ke mmušanoši yoo a bego a lebelelwa bjalo ka modimo, ba be ba ka ba le boikgethelo gakaalo tabeng yeo. Ge nako e dutše e eya, go ile gwa bonagala gabotse gore Jehofa o ile a diriša lenyalo la Esitere go šireletša batho ba gagwe.—Esitere 4:14.

Ke ka baka la’ng puku ya Esitere e se na leina la Modimo la Jehofa?

Go bonagala Morodekai e be e le mongwadi yo a buduletšwego wa puku ye. Mohlomongwe puku ye mathomong e be e bolokilwe le dipego tša mmušo wa Peresia pele go ka boelwa le yona Jerusalema. Go dirišwa ga leina la Jehofa go be go ka šušumeletša barapedi ba medimo ya Peresia gore ba senye puku yeo. Go sa šetšwe seo, go bonagala gabotse gore Jehofa o ile a ba le karolo kanegelong yeo. Se se kgahlišago ke gore leina la Modimo le utilwe sengwalweng sa mathomong sa Seheberu ka tatelano ya ditlhaka, yeo go yona go bonagalago mafoko a be a rulagantšwe ka boomo e le gore ditlhaka tša mathomo le tša mafelelo tša mantšu ao a latelanago di bope leina la Modimo.—Esitere 1:20, mongwalo wa ka tlase wa Reference Bible.

Na puku ya Esitere ga se ya nepagala ka tša histori?

Baswayadiphošo ba re ga se ya nepagala. Lega go le bjalo, diithuti tše dingwe di bolela gore mongwadi wa puku ye o bontšhitše tsebo e kgolo ka mmušo wa Peresia, bokgabo gotee le meetlo ya wona. Ke therešo gore ga go bolelwe ka Mohumagadi Esitere ka dingwalweng tša lefase tšeo di sa lego gona, eupša go bonagala Esitere e se yena feela motho wa ka bogošing yoo go sego gwa bolelwa ka yena dipegong tša batho bohle. Se sengwe gape ke gore dipego tša lefase di bontšha gore monna yo a bitšwago Mardukâ, leina la Seperesia la Morodekai, o ile a ba mohlankedi kgorong ya Shushani nakong yeo e hlaloswago ka pukung ye.

[Lepokisi go letlakala 29]

Boporofeta bo a Phethagatšwa

Ge ba be ba lwela batho ba Modimo, Esitere le Morodekai ba ile ba phethagatša boporofeta bjo bongwe bja Beibele. Nywageng ya ka godimo ga e 1 200 pejana, Jehofa o ile a budulela mopatriareka Jakobo go bolela e sa le pele mabapi le yo mongwe wa barwa ba gagwe gore: “Benjamini o tla gagola bjalo ka phiri. Mesong o tla ja phoofolo yeo e swerwego, gomme mantšiboa o tla arola dithebola.” (Genesi 49:27) “Mesong” ya histori ya bogoši bja Isiraele, ditlogolo tša Benjamini di be di akaretša Kgoši Saulo le bahlabani ba bangwe ba matla ba batho ba Jehofa. ‘Mantšiboeng’ a histori ya bogoši, ka morago ga ge letšatši le sobeletše lešika la dikgoši tša Isiraele, Esitere le Morodekai, bao e bego e le ba moloko wa Benjamini, ba ile ba fenya manaba a Jehofa. Ka tsela e itšego, ba ile ba ba ba arola dithebola, ka gobane thoto e kgolo ya Hamani e ile ya ba ya bona.

[Seswantšho go letlakala 25]

Esitere ka boikokobetšo o ile a leboga kgaugelo ya kgoši

[Seswantšho go matlakala 26, 27]

Esitere ka sebete o ile a pepentšha bokgopo bja Hamani

[Seswantšho go matlakala 28, 29]

Esitere le Morodekai ba ile ba romela ditaelo go Bajuda ba lego Mmušong wa Peresia