Mehlolo Yeo e Lego Kgauswi le go Direga

GE E ba mmui a be a ka laelwa gore a go bue ka tsela e raraganego, o be o tla ikwa bjang ge o be o ka kwa gore mmui yoo o be a se a ka a bua motho ka tsela yeo? Ga go pelaelo gore o be o tla tshwenyega. Eupša go thwe’ng ge e ba, ka lehlakoreng le lengwe, o be o ka kwa gore ngaka yeo ke mmui yo a di gogago pele lefapheng la gagwe le gore o be a buile batho ba makgolo ka katlego ka tsela yeo a tlago go go bua ka yona? Na o be o ka se ikwe o kgolwa gore a ka go thuša?

Go ka thwe lefase leo re phelago go lona lehono le nyaka go buiwa ka tsela yeo ye e raraganego. Ka Lentšu la gagwe, Beibele, Jehofa Modimo o holofeditše gore o tla tsošološa Paradeise mo lefaseng. (2 Petro 3:13) Eupša gore seo se direge, bokgopo bo swanetše go fedišwa ka mo go feletšego pele. (Psalme 37:9-11; Diema 2:21, 22) Maemo ka moka a sa kgahlišego ao re a bonago a swanetše go fedišwa pele paradeise e ka tsošološwa. Ge e le gabotse go nyakega mohlolo gore seo se direge!—Kutollo 21:4, 5.

Dihlatse tša Jehofa di dumela gore diphetogo tšeo tše dikgolo di tlo direga kgauswinyane. Ka baka la’ng? Ka gobane mehlolo yeo Jehofa Modimo a šetšego a e dirile e hlatsela gore o na le matla a go phetha dikholofetšo tša gagwe. Bapiša mehlolo e tshela feela yeo e begilwego ka Beibeleng le dikholofetšo tšeo e di bolelago ka bokamoso.

 Eka o ka tšwela pele o ithuta mabapi le seo Beibele e se holofetšago ka bokamoso bja rena. Ge tumelo ya gago e dutše e gola, kholofelo ya gago le yona e tla gola—kholofelo ya go phela nakong ya ge o tla be o holwa ka go lebanya ke mehlolo yeo Jehofa a tla bego a e dira.

 [Lepokisi/Diswantšho go matlakala 9, 10]

MOHLOLO:

JESU O ILE A FEPA BA DIKETE KA DINKGWA LE DIHLAPI TŠE SEGO KAE.—MATEO 14:13-21; MAREKA 8:1-9; JOHANE 6:1-14.

KHOLOFETŠO:

“Lefase lona le tla tšweletša dienywa tša lona; Modimo, e lego Modimo wa rena, o tla re šegofatša.”—PSALME 67:6.

SEO E SE BOLELAGO GO RENA:

GA GO SA NA LE YOO LE KA MOHLA A TLAGO GO BOLAWA KE TLALA.

MOHLOLO:

JESU O ILE A DIRA GORE DIFOFU DI BONE.—MATEO 9:27-31; MAREKA 8:22-26.

KHOLOFETŠO:

“Mahlo a difofu a tla buduloga.”—JESAYA 35:5.

SEO E SE BOLELAGO GO RENA:

DIFOFU KA MOKA DI TLA BONA.

MOHLOLO:

JESU O ILE A FODIŠA DIGOLE.—MATEO 11:5, 6; JOHANE 5:3-9.

KHOLOFETŠO:

“Sehlotša se tlo taboga bjalo ka kgama.”—JESAYA 35:6.

SEO E SE BOLELAGO GO RENA:

MAGOLE KA MOKA A TLO FODIŠWA.

MOHLOLO:

JESU O ILE A FODIŠA MALWETŠI A MEHUTAHUTA.—MAREKA 1:32-34; LUKA 4:40.

KHOLOFETŠO:

“Ga go na modudi yo a tla rego: ‘Ke a babja.’”—JESAYA 33:24.

SEO E SE BOLELAGO GO RENA:

MALWETŠI KA MOKA A FOKODIŠAGO A TLA FEDIŠWA. RE TLA BA LE BOEMO BJO BO PHETHAGETŠEGO BJA TŠA MAPHELO.

MOHLOLO:

JESU O ILE A LAOLA DILO TŠA TLHAGO.—MATEO 8:23-27; LUKA 8:22-25.

KHOLOFETŠO:

“Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se itapišetše lefeela.”—JESAYA 65:21, 23.

“O tla ba kgole le kgatelelo—ka gobane o ka se boife selo—gomme o tla ba kgole le selo le ge e le sefe seo se tšhošago, ka gobane se ka se go batamele.”—JESAYA 54:14.

SEO E SE BOLELAGO GO RENA:

GO KA SE SA BA LE DIKOTSI TŠA TLHAGO.

MOHLOLO:

JESU O ILE A TSOŠA BAHU.—MATEO 9:18-26; LUKA 7:11-17.

KHOLOFETŠO:

“Bohle bao ba lego mabitleng ba [tla] kwa lentšu la gagwe . . . ba tšwa.”—JOHANE 5:28, 29.

“Lewatle la ntšha bahu ba lego go lona, lehu le Bodulabahu tša ntšha bahu ba lego go tšona.”—KUTOLLO 20:13.

SEO E SE BOLELAGO GO RENA:

BARATIWA BA RENA BA HWILEGO BA TLA TSOŠWA.