Na o ka Dumela Mehlolo Yeo e Begilwego ka Beibeleng?

GE O be o ka anegelwa taba e itšego e makatšago, na go botega ga motho yoo a go botšago yona go be go ka se laole ge e ba o dumela taba yeo goba o sa e dumele? Potego e bjalo e be e ka se akaretše feela tsela yeo motho a anegilego taba ka yona eupša e be e tla akaretša le go tsebja ga gagwe ka go ba yo a botegago. Go ba gona, ge e ba a ena le nywaga e mentši a go botša therešo e bile a se a ka a go botša maaka ka boomo le ka mohla, o tla ba le lebaka le le kwagalago la go dumela seo a go boditšego sona ga bjale.

Go bjalo le ka mehlolo yeo e begilwego ka Beibeleng. Ga go le o tee wa rena yoo a bego a phela nakong ya ge ditiragalo tšeo di be di direga. Eupša re ka kgona go lemoga ge e ba ditaba tša ka Beibeleng di ka botwa—ge e ba e le therešo. Bjang? Tše ke dintlha tšeo di tlaleletšago tabeng ya go botega ga mehlolo yeo e begilwego ka Beibeleng.

Mehlolo e mentši e be e direlwa mafelong a batho bohle. Ka dinako tše dingwe, e be e bonwa ke batho ba dikete, goba ba dimilione. (Ekisodo 14:21-31; 19:16-19) E be e sa direlwe ka sephiring, moo e sa bonwego ke batho bohle.

Mehlolo yeo e be e sa raragana. Go be go se na didirišwa tše kgethegilego goba tša mabaibai, e bile go se na mabone ao a dirišetšwago go hlalefetša batho. Mehlolo e mentši yeo e begilwego ka Beibele e be e dirwa bakeng sa go arabela maemong a sa letelwago le dikgopelong tša batho. (Mareka 5:25-29; Luka 7:11-16) Maemong a bjalo ditiragalo tšeo di be di ka se lokišeletšwe ke motho yo a dirago mehlolo.

Morero wa bao ba bego ba dira mehlolo e be e se go ikhweletša botumo, letago le mahumo. Go e na le moo, morero wa bona e be e le go tagafatša Modimo. (Johane 11:1-4, 15, 40) Batho ba be ba sa dumelelwe go dira maiteko le ge e le afe a go ikhweletša lehumo ka matla ao a go dira mehlolo.—2 Dikgoši 5:15, 16, 20, 25-27; Ditiro 8:18-23.

Mehlolo e fapafapanego yeo e begilwego ka Beibeleng e bontšha gore e be e ka se be feela mediro ya batho. Ka mohlala, lewatle le phefo di ile tša homotšwa, meetse a fetošwa beine, pula ya emišwa ya ba ya nešwa, balwetši ba ile ba fodišwa gomme difofu tša dirwa gore di bone. Mehlolo yeo ka moka le e mengwe e mentši e bontšha gore go swanetše go ba go dirišitšwe matla a phagametšego a motho ao a ka kgonago go tutuetša dilo ka moka.—1 Dikgoši 17:1-7; 18:41-45; Mateo 8:24-27; Luka 17:11-19; Johane 2:1-11; 9:1-7.

Baganetši bao ba bonego mehlolo yeo ga se ba ka ba ganetša gore e ile ya direga. Ka morago ga gore Jesu a tsoše mogwera wa gagwe Latsaro,  manaba a Jesu a bodumedi ga se a ka a gana gore Latsaro o be a ile a hwa. A be a ka ganetša seo bjang? Latsaro o be a feditše matšatši a mane a hwile. (Johane 11:45-48; 12:9-11) Gaešita le nywagakgolo ka morago ga lehu la Jesu, bangwadi ba Talmud ya Sejuda ba be ba sa dutše ba bolela gore Jesu o be a ena le matla a go dira mehlolo. Ba be ba fo belaela mothopo wa matla ao. Ka mo go swanago, ge barutiwa ba Jesu ba be ba tlišwa pele ga lekgotla la Bajuda, ga se ba ka ba botšišwa gore “Na le ile la dira mehlolo?” Eupša ba ile ba botšišwa gore: “Le dirile se ka matla afe goba ka leina la mang?”—Ditiro 4:1-13.

Bjale, na o ka dumela seo Beibele e se bolelago ka mehlolo? Go tšwa go seo re sa tšwago go se ahlaahla, go molaleng gore dipego tša Beibele tša mabapi le mehlolo di na le maswao a go ka botwa. Go na le mabaka a mangwe a go bota dipego tše tša Beibele. Ka mohlala, ge Beibele e anega tiragalo e itšego, gantši e re botša ka nako, lefelo le maina a batho bao ba bego ba akaretšwa. Gaešita le baswayadiphošo ba Beibele ba be ba dutše ba makatšwa ke go nepagala ga dintlha ka botlalo tša histori tšeo di hwetšwago ka Beibeleng. Diporofeto tše makgolo tša Beibele di phethagetše ka botlalo. Go oketša moo, Beibele e hupere keletšo e ntši mabapi le kamoo batho ba ka bago le ditswalano tše thabišago—keletšo yeo e thušitšego batho ba nywaga ka moka le ba maemo a sa swanego. Ge go tliwa tabeng ya ditswalano tša batho, keletšo e hwetšwago ka Beibeleng ke ya moswananoši.

Ge e ba o se wa hlwa o kgolwa Beibele ka mo go feletšego, o re’ng o sa iphe nako ya go e hlahloba ka kelohloko? Ge o dutše o e tseba, o tla e bota le go feta. (Johane 17:17) O tla lemoga gore o ka kgolwa seo e se bolelago ka mehlolo yeo e diregilego nakong e fetilego. Ge o šetše o dumela dipego tšeo, o tla ba le lebaka le le kwagalago la go kgolwa seo Beibele e rego se tlo direga kgauswinyane.

[Seswantšho go letlakala 7]

Baganetši ba Jesu ga se ba ka ba gana gore Latsaro o be a ile a hwa