Poledišano le Moagišani—Na Batho Bohle ba Lokilego ba ya Legodimong?

DIHLATSE TŠA JEHOFA di thabela go ahlaahla Beibele le baagišani ba tšona. Na go na le taba e itšego ya Beibele yeo e lego kgale o ipotšiša yona? Na o ipotšiša dipotšišo mabapi le ditumelo goba ditiro le ge e le dife tša bodumedi tša Dihlatse tša Jehofa? Ge e ba go le bjalo, o se ke wa dikadika go bolela ka taba yeo nakong e tlago ge o kopana le Hlatse. E tla thabela go boledišana le wena ka ditaba tše bjalo.

Se se latelago ke mohuta wa poledišano yeo Dihlatse tša Jehofa di ka bago le yona le moagišani. A re tšeeng gore Hlatse yeo e bitšwago Marcus e etetše legaeng la monna yo a bitšwago Robert.

Bao ba Yago Legodimong ba ya go Dira Eng Moo?

Marcus: Ge o lebeletše bokamoso, na o nagana gore mohlomongwe maemo a tla kaonefala, a befela sa ruri, goba a dula a sa fetoge?

Robert: Ke nagana gore dilo di tla kaonefala. Ke lebeletše pele go ya legodimong gore ke be le Morena.

Marcus: Yeo ke kholofelo e botse. Beibele e bolela gantši mabapi le kamoo legodimo le lego ka gona le ka tokelo ya go ya moo. Na o kile wa ipotšiša gore bao ba yago legodimong ba ya go dira’ng moo?

Robert: Re yo ba le Modimo le go mo tumiša ka mo go sa felego.

Marcus: Yeo ruri e tloga e le tebelelo e kgahlišago. Se se kgahlišago ke gore Beibele ga e bolele feela ka ditokelo tšeo bao ba yago legodimong ba tlago go ba le tšona eupša e bolela gape le ka boikarabelo bjo bohlokwa bjoo ba tlago go ba le bjona.

Robert: Ke boikarabelo bofe bjoo?

Marcus: Ke boikarabelo bjoo bo boletšwego mo go Kutollo 5:10. Temana yeo e re: “[Jesu] o ba dirile gore e be mmušo le baperisita ba Modimo wa rena gomme ba tla buša e le dikgoši godimo ga lefase.” Robert, na o lemogile gore ke boikarabelo bofe bjoo bao ba yago legodimong ba tlago go ba le bjona?

Robert: Temana ye e re ba tla buša e le dikgoši godimo ga lefase.

Marcus: Na yeo ga se kgopolo e kgahlišago?

Ba tla Buša Bomang?

Marcus: Na o be o ka se dumele gore ge e ba bao ba yago legodimong ba tla buša e le dikgoši, go swanetše go ba le batho bao ba ba bušago? Go feta moo, go thuša’ng go ba le pušo yeo e se nago balata ba yona?

Robert: Ke kwa ntlha ya gago.

Marcus: Ka gona, potšišo e bohlokwa ke gore, Ba tla buša bomang?

Robert: Ke tšea gore re tla buša batho ba lego lefaseng bao ba sešogo ba ehwa le go ya legodimong.

Marcus: Seo se ka bonagala se kwagala—ge e ba batho ka moka ba lokilego ba eya legodimong. Eupša go na le kgonagalo e nngwe yeo re  swanetšego go e ela hloko. Na go ka direga gore batho ba bangwe—batho ba bangwe bao ba lokilego—ba se ye legodimong?

Robert: Ga se ka ka ka gahlana le Mokriste le ge e le ofe yo a dumelago seo.

Marcus: Ke rotoša potšišo ye ka baka la seo re se balago go Psalme 37:29. Ke kgopela gore o bale temana ye.

Robert: Go lokile. E re: “Baloki bona e tla ba beng ba lefase, ba tla dula mo go lona ka mo go sa felego.”

Marcus: Ke a leboga. Na o hlokometše gore batho ba bantši ba lokilego ba tla phela kae?

Robert: Temana ye e re ba tla dula lefaseng.

Marcus: O nepile—e bile e sego ka nakwana. Ela hloko gore temana ye e re: “Ba tla dula mo go lona ka mo go sa felego.”

Robert: Mohlomongwe seo se fo ba se bolela gore go tla dula go ena le batho ba lokilego mo lefaseng. Ge re ehwa le go ya legodimong, re tšeelwa legato ke batho ba bangwe ba lokilego bao ba belegwago.

Marcus: Ba bantši mohlomongwe ba ka hlalosa temana ye ka tsela yeo. Eupša na go ka direga gore temana ye e bolela selo se sengwe seo se fapanego ka mo go feletšego? Na e ka ba e bolela gore batho ba lokilego ba tla phela lefaseng ka mo go sa felego?

Robert: Ke nagana gore ga ke go kwešiše gabotse.

Lefase la Paradeise la Nakong e Tlago

Marcus: Go ba gona, ela hloko seo karolo e nngwe ya Beibele e se bolelago mabapi le bophelo lefaseng nakong e tlago. Anke re bale Kutollo 21:4. Ge e bolela ka batho bao ba tlago go phela nakong e tlago, temana ye e re: “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Na ye ga se tebelelo e kgahlišago?

Robert: Ke yona. Eupša ke nagana gore e hlalosa kamoo bophelo bo tlago go ba ka gona legodimong.

Marcus: Go ba gona, ke therešo gore bao ba yago legodimong ba tla hwetša ditšhegofatšo tše swanago. Eupša ke kgopela gore o lebelele temana yeo gape. E re go tla direga’ng ka lehu?

Robert: E re “lehu le ka se hlwe le sa ba gona.”

Marcus: O nepile. Ga bjale, ke kgodišegile gore o a dumela gore go ka se fedišwe selo seo se sa kago sa ba gona.

Robert: Go bjalo.

Marcus: Eupša ga se gwa ka gwa ba le lehu legodimong, na gago bjalo? Ke mo lefaseng feela moo batho ba hwago.

Robert: Hmm. Ke tla swanelwa ke go nagana ka taba yeo.

Marcus: Robert, ga bjale o a bona gore Beibele e ruta gore batho ba bangwe ba lokilego ba tla ya legodimong eupša ba bangwe ba bantši ba tla phela mo mo lefaseng. Ge e le gabotse, ke kgodišegile gore o kile wa kwa mantšu a a tumilego a rego: “Go lehlogonolo ba boleta, gobane ba tlo tšea lefase e be kabelo ya bona.”—Mateo 5:5, PK.

Robert: Ee, ke ile ka kwa temana ye e balwa gantši kerekeng.

Marcus: Ge e ba ba boleta ba eja bohwa bja lefase, na seo ga se bolele gore batho ba tla phela mo lefaseng? Bao ba phelago lefaseng ba tla hwetša ditšhegofatšo tšeo go boletšwego ka tšona e sa le pele mo go Kutollo. Ba tla bona ge lefase la rena le fetogela sa ruri ka gobane Modimo o tla fediša selo le ge e le sefe se sebe—gaešita le lehu.

Robert: Ke a bona gore o lebile kae, eupša ga ke kgolwe gore temana e tee goba tše pedi tša Beibele di hlatsela ntlha ya gago.

Marcus: Ga go bjalo le gatee. Ge e le gabotse, go na le mangwalo a mmalwa ao a bolelago mabapi le kamoo bophelo bo tlago go ba ka gona mo lefaseng nakong e tlago. Ge e ba o na le nako, mohlomongwe nka go bontšha e nngwe ya ditemana tšeo ke di ratago.

Robert: Ee, ke na le metsotswana.

“Yo Kgopo o tla be a se sa le Gona”

Marcus: Pejana re badile temana 29 ya Psalme 37. A re boele morago go psalme yeo. Ga bjale, re  tla bala ditemana 10 le 11. Ke kgopela gore o bale ditemana tšeo.

Robert: Go lokile. “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”

Marcus: Ke a leboga. Ge o lebelela temana 11, e re “ba boleta,” goba batho ba lokilego, ba tla phela kae?

Robert: E re e tla ba “beng ba lefase.” Lega go le bjalo, ke nagana gore temana ye e šoma gona bjale; go oketša moo, batho ba lokilego ba dula lefaseng.

Marcus: Seo ke therešo. Lega go le bjalo, ela hloko gore temana ye gape e re batho ba lokilego ba tla thabela “go ata ga khutšo.” Ga re bone khutšo e atile lefaseng lehono, na ga go bjalo?

Robert: Aowa, ga e gona.

Marcus: Ka gona, kholofetšo ye e tla phethagatšwa bjang? Mohlomongwe nka go direla papišo ye: Akanya o ena le moago wo o o hirišago. Bahiri ba bangwe ba itshwere gabotse—ba hlokomela diphapoši tša bona le go leka go phedišana le baagišani. E bile o thabela go ba hirišetša moago. Bahiri ba bangwe ke ba babe; ba senya moago gomme ba thatafaletša baagišani ba bona bophelo. Bjale, ke’ng seo o bego o tla se dira ge bahiri bao ba babe ba gana go fetola mekgwa ya bona?

Robert: Ke be ke tla ba raka.

Marcus: Seo ke sona seo Modimo a tlago go se dira ka batho ba babe bao ba re dikologilego lehono. Lebelela temana 10 gape. E re: “Yo kgopo o tla be a se sa le gona.” Ka mantšu a mangwe, go ka thwe Modimo o tla raka batho bao ba tshwenyago ba bangwe. Ke moka batho ba lokilego ba tla thabela bophelo lefaseng ka khutšo. Ke a lemoga gore kgopolo ye ya gore batho ba lokilego ba tla phela ka mo go sa felego mo lefaseng e ka ba e fapane le seo o se rutilwego nakong e fetilego.

Robert: Ee, ga se ka ka ka rutwa taba yeo kerekeng ya rena.

Marcus: Bjalo ka ge o boletše peleng, ga se gwa lekana go ahlaahla temana e tee goba tše pedi ka taba ye. Ruri, go nyakega gore re hlahlobe seo Beibele ka moka e se bolelago mabapi le bokamoso bja batho ba lokilego. Eupša go ya ka mangwalo ao re a badilego lehono, na o nagana gore go a kgonega gore batho ba bangwe ba lokilego ba tla ya legodimong, mola ba bangwe ba bantši ba lokilego ba tla phela mo lefaseng ka mo go sa felego?

Robert: Ga ke kgodišege gabotse. Eupša ke tla swanelwa ke go dumela gore go bonagala go le bjalo go ya ka mangwalo ao o a badilego. Ke tla swanelwa ke go naganišiša ka se kutšwanyana.

Marcus: Ge o dutše o naganišiša ka mo go oketšegilego ka taba ye, go ka ba le dipotšišo tše dingwe tšeo o ka naganago ka tšona. Ka mohlala, go thwe’ng ka batho ba lokilego bao ba phetšego pele ga rena? Na ba ile legodimong ka moka ga bona? Ge e ba go se bjalo, ba kae gona bjale?

Robert: Dipotšišo tšeo di a kgahliša.

Marcus: Mohlomongwe nka go direla dilo tše pedi. Sa pele, e re ke ngwale mangwalo a mmalwa ao a bolelago ka taba ye. * Sa bobedi, nka rata go boa gape gomme ke ahlaahle mangwalo ao le wena ka morago ga gore o hwetše nako ya go a bala le go naganišiša ka ona. Na o nagana gore go tla kgonega?

Robert: Ee, go tla kgonega. Ke a leboga.

[Mongwalo wa ka tlase]