O BE o tla ikwa bjang ge o be o ka latofatšwa ka bosenyi bjoo o sego wa bo dira? Le gona go thwe’ng ge e ba bosenyi bjoo bo be bo tlaiša batho ba bangwe kudu, go akaretša le batho ba bantši ba se nago molato? Ga go pelaelo gore o be o tla nyaka go hlatswa leina la gago! Na o a lemoga gore Jehofa o lebane le bothata bjo bo swanago? Lehono batho ba bantši ka phošo ba bea Modimo molato bakeng sa go hloka toka le tlaišego tšeo di tletšego lefaseng. Na Jehofa o tshwenyegile ka go hlatswa leina la gagwe? Ee, o tshwenyegile! Ela hloko seo se bolelwago pukung ya Hesekiele.—Bala Hesekiele 39:7.

Jehofa o re: “Le ka mohla nka se sa dumelela leina la ka le lekgethwa le gobošwa.” Ge batho ba mmona molato bakeng sa go hloka toka, ba goboša leina la gagwe. Bjang? Ka Beibeleng, “leina” gantši le bolela botumo. Puku e nngwe ya ditšhupetšo e re leina la Modimo le šupa go “seo se tsebjago ka yena—go ikutolla ga gagwe; gape le emela botumo bja gagwe le seriti sa gagwe.” Leina la Jehofa le akaretša botumo bja gagwe. Ke’ng seo se tsebjago ka Jehofa ge go tliwa tabeng ya go hloka toka? O hloile go hloka toka! Gape o kwela bohloko bao ba tlaišwago ke go hloka toka. * (Ekisodo 22:22-24) Ge batho ba re Modimo o ikarabela ka tšona dilo tšeo a di hloilego, ba senya botumo bja gagwe. Ka go re’alo ba “nyatša leina la [gagwe].”—Psalme 74:10.

Ela hloko gore Jehofa o diriša gabedi polelwana e rego “leina la ka le lekgethwa.” (Temana 7) Ka Beibeleng, leina la Jehofa le tswalanywa le mantšu “kgethwa” le “bokgethwa” ka makga a mantši. Lentšu “kgethwa” le fetišetša kgopolo ya go beelwa ka thoko; gape le bolela bohlweki le tshekego. Leina la Jehofa ke le lekgethwa ka gobane ke yo mokgethwa—o kgole kudu le selo le ge e le sefe se sebe le se sa hlwekago. Na o kgona go bona lebaka leo ka lona bao ba rego Jehofa o ikarabela ka bokgopo ba gobošago ‘leina la gagwe le lekgethwa’ o šoro ka gona?

Morero wa Jehofa wa go kgethagatša leina la gagwe a diriša Mmušo wa gagwe ke sehlogo se segolo sa Beibele. Sehlogo seo se gatelelwa ka pukung ya Hesekiele, yeo e dirišago leboelela mantšu a rego “ke moo ditšhaba di tlago go tseba gore ke nna Jehofa.” (Hesekiele 36:23; 37:28; 38:23; 39:7) Ela hloko gore ditšhaba di ka se kgethe go tseba goba go se tsebe gore ke Jehofa. Go e na le moo, ‘ke moo di tlago go tseba.’ Ka mantšu a mangwe, Jehofa o rerile go tlo gata mogato woo o tlago go gapeletša ditšhaba tša lefaseng go lemoga gore ke yena yoo a rego ke yena—Jehofa, Mmuši Morena yoo leina la gagwe le emelago dilo ka moka tše kgethwa, tše sekilego le tše hlwekilego.

Kholofetšo yeo e bolelwago gantši e rego “ke moo ditšhaba di tlago go tseba gore ke nna Jehofa” ke ditaba tše dibotse bakeng sa bao ba hlologetšwego go bona go hloka toka le tlaišego di fela. Kgauswinyane Jehofa o tla phethagatša kholofetšo yeo gomme a tloša kgobošo ka moka leineng la gagwe. O tla fediša bokgopo le bao ba bo dirago eupša a phološa bao ba lemogago le go hlompha leina la gagwe le seo le se emelago. (Diema 18:10) Na o tutueletšega go ithuta kamoo o ka batamelago kgauswi le Jehofa, Modimo yo mokgethwa, yoo a ‘ratago toka’?—Psalme 37:9-11, 28.