Lethabo la go Nea
“Go na le lethabo le legolo go neeng go feta go amogeleng.”—DITIRO 20:35.
Lebaka la ba bangwe la go keteka Keresemose.
Bjalo ka ge Jesu a boletše, go nea go thabiša bobedi monei le monewa. Ge ba phegelela go hwetša lethabo leo, ba bantši ba lebelela go fana dimpho e le se sengwe sa dilo tše dikgolo nakong ya Keresemose. Ka mohlala, nyakišišo e nngwe e hweditše gore gaešita le bothateng bja ngwagola bja tša boiphedišo, kua Ireland go be go letetšwe gore lapa le lengwe le le lengwe le diriše tšhelete ya ka godimo ga di-euro tše 500 (mo e ka bago R5 500) go reka dimpho tša Keresemose.
Ke ka baka la eng e le tlhohlo?
Ba bantši ba nagana gore go fana dimpho ka Keresemose go baka kgateletšego e kgolo, e sego lethabo le legolo. Bjang? Bareki ba bantši ba ikwa ba gapeletšega go reka dimpho tšeo ba se nago tšhelete ya go di reka. Le gona ka ge batho ba bantši ba reka dimpho ka nako e tee, mašaba le methaladi e metelele di dira gore batho ba bantši ba befedišwe ke go reka.
Ke melao efe ya motheo ya Beibele yeo e ka thušago?
Jesu o itše: “Tlwaelang go fa.” * (Luka 6:38) Ga se a ka a re go fanwe dimpho ka nako e itšego feela mo ngwageng ge go letetšwe gore batho ba dire bjalo. Jesu o kgothaleditše balatedi ba gagwe gore go fana dimpho e be tlwaelo ya bona, goba tsela ya bona ya bophelo.
“Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” (2 Bakorinthe 9:7) Go ya ka puku e nngwe ya go hlalosa Beibele, kgwekgwe ya keletšo ya Paulo ke gore “ga go seo le ka mohla se swanetšego go newa ‘ka go gapeletšwa,’ ka maikwelo a gore yo mongwe o gapeletšwa go nea.” Go ba “monei yo a neago ka go hlalala” go ra gore ga se gwa swanela go ba le maikwelo a go ikwa o gapeletšega go nea motho yo a itšego selo se itšego ka nako e itšego—tsela yeo go fana dimpho ka Keresemose go lego ka gona.
“Ge e ba motho a ikemišeditše go nea, gona mpho e amogelega ka mo go kgethegilego go ya ka seo a nago le sona, e sego go ya ka seo a se nago sona.” (2 Bakorinthe 8:12) Modimo ga a nyake gore Bakriste ba tsene dikolotong e le gore ba reke dimpho tše di bitšago. Go e na le moo, ge motho a nea “go ya ka seo a nago le sona,” dimpho tša gagwe ga se feela tša go ithola kgwara eupša di “amogelelga ka mo go kgethegilego.” Seo se tloga se fapane kudu le molaetša wa babapatši ba nakong ya maikhutšo wa gore “reka gona bjale, gomme o lefe ka morago”!
^ ser. 8 Diphetolelo tše dingwe tša Beibele di fo re: “Neang.” Lega go le bjalo, Segerikeng sa mathomo, lediri la lentšu leo le umaka tiro e tšwelago pele. Bakeng sa go fetišetša moelelo o feletšego wa lentšu leo Jesu a le dirišitšego, Phetolelo ya Lefase le Lefsa e le fetoletše ka gore “tlwaelang go fa.”
