Na lehu le matla go feta Modimo? Ga go bjalo le gatee! Ke bjang lehu—goba “lenaba” le ge e le lefe—le ka bago matla go feta “Modimo Ramatlaohle”? (1 Bakorinthe 15:26; Ekisodo 6:3) Modimo o na le matla a go dirolla lehu a diriša tsogo, le gona o holofetša go dira sona seo lefaseng la gagwe le lefsa. * Kholofetšo yeo ke ya kgonthe gakaaka’ng? Morwa wa Modimo ka noši, Jesu, o re botša ka mantšu ao a ka tlatšago dipelo tša rena ka kholofelo.—Bala Mateo 22:31, 32.

Ge Jesu a be a bolela le Basadutsei bao ba bego ba sa dumele tsogong, o itše: “Ge e le mabapi le tsogo ya bahu, na ga se la ka la bala seo Modimo a ilego a le botša sona, a re: ‘Ke nna Modimo wa Aborahama, Modimo wa Isaka le Modimo wa Jakobo’? Ke Modimo wa ba phelago, e sego wa bahu.” Jesu mo o be a bolela ka poledišano yeo Modimo a bilego le yona le Moshe sehlareng seo se tukago mo e ka bago nywaga e 3 500 e fetilego. (Ekisodo 3:1-6) Go ya ka Jesu, mantšu ao Jehofa a a boditšego Moshe—“Ke nna Modimo wa Aborahama, Modimo wa Isaka le Modimo wa Jakobo”—a bontšha gore kholofetšo ya tsogo e tla phethagatšwa. Bjang?

Thoma ka go ela hloko boemo. Nakong ya ge Jehofa a be a bolela le Moshe, bapatriareka Aborahama, Isaka le Jakobo e be e le kgale ba hwile—Aborahama o be a ena le nywaga e 329 a hwile, Isaka e 224 gomme Jakobo a ena le e 197. Lega go le bjalo, Jehofa o ile a re “Ke nna”—e sego “Ke be ke le”—Modimo wa bona. Jehofa o ile a bolela ka bapatriareka bao ba bararo ba hwilego bjalo ka ge eka ba be ba sa phela. Ka baka la’ng?

Jesu o hlalositše gore: “Ke [Jehofa] Modimo wa ba phelago, e sego wa bahu.” Nagana go se nene ka seo se umakwago ke mantšu ao. Ge e ba tsogo e se gona, gona Aborahama, Isaka le Jakobo ba ka se sa boela bophelong. Ge e ba go le bjalo, Jehofa e tla ba Modimo wa bahu. Le gona, seo se be se tla bontšha gore lehu le matla go feta Jehofa—go le bjalo ka ge eka o be a se na matla a go lokolla bahlanka ba gagwe bao ba botegago ditlemong tša lehu.

Ka gona, re ka phetha ka gore’ng ka Aborahama, Isaka, Jakobo gotee le bahlanka ba botegago ba Jehofa bao ba hwilego? Jesu o boletše mantšu a a matla a rego: “Go yena bohle ba a phela.” (Luka 20:38) Ee, morero wa Jehofa wa go tsoša bahlanka ba gagwe ba botegago bao ba hwilego o tlo phethagala e le ka kgonthe moo e lego gore o nagana ka bona e le ba phelago. (Baroma 4:16, 17) Jehofa o tla boloka bao ka moka monaganong wa gagwe o sa lebalego go fihla nakong ya gagwe ya go ba tsošetša bophelong.

Na ga o kgahlwe ke kholofelo ya go kopana le moratiwa wa gago yo a hwilego? Ge e ba go le bjalo, gopola gore Jehofa o na le matla ka moka ao a nyakegago a go tsoša bahu. Ga go na seo se ka mo thibelago go phethagatša kholofetšo ya gagwe ya go tsoša bahu. Ke ka baka la’ng o sa ithute ka mo go oketšegilego ka dikholofetšo tša tsogo le Modimo yo a tlago go di phethagatša? Ga go pelaelo gore go dira bjalo go tla go batametša kgauswi le Jehofa, “Modimo wa ba phelago.”