Boikokobetšo bo akaretša go se be le makoko goba boikgantšho. Motho yo a ikokobeditšego ga a ipone a phagametše batho ba bangwe. Motho le ge e le ofe yo a sa phethagalago yoo a ikokobeditšego o swanetše gore a be le boipoetšo, e lego, go lemoga gore o na le mafokodi.

Moshe ga se a ka a dumelela matla a bolaodi a mo tsena hlogong. Gantši, ge motho a hwetša matlanyana a bolaodi, boikokobetšo bja gagwe—goba go hloka boikokobetšo—bo bonagala ka pela. Mongwadi wa lekgolong la bo-19 la nywaga Robert G. Ingersoll o beile taba ka tsela ye: “Batho ba bantši ba kgona go kgotlelela mathata. Eupša ge e ba o nyaka go tseba gabotse gore motho ke mang, mo fe matla a bolaodi.” Tabeng yeo, Moshe o beile mohlala o mobotse kudu wa boikokobetšo. Bjang?

Moshe o ile a hwetša matla a magolo a bolaodi, ka gobane Jehofa o ile a mo laela gore a etelele Baisiraele pele. Lega go le bjalo, matla ao a bolaodi ga se a ka a dira gore Moshe a ikgantšhe. Ka mohlala, ela hloko boipoetšo bjo a ilego a bo bontšha ge a be a swaragana le potšišo e thata ya mabapi le tshwanelo ya go hwetša bohwa. (Numeri 27:1-11) Potšišo yeo e be e le boima, ka ge phetho ya yona e be e tla kgoma ditaba tša molao tša nakong e tlago.

Moshe o be a tla arabela bjang? Na o be a tla bolela gore bjalo ka moetapele wa Isiraele, o be a swanelega go dira phetho tabeng yeo? Na o be a tla ithekga ka bokgoni bja gagwe, maitemogelo a gagwe, goba tsebo ya gagwe e tseneletšego ka dikgopolo tša Jehofa?

Mohlomongwe motho yo a ikgantšhago o be a ka dira bjalo. Eupša e sego Moshe. Pego ya Beibele e re botša gore: “Moshe a iša taba [yeo] pele ga Jehofa.” (Numeri 27:5) Nagana feela! Gaešita le ka morago ga nywaga e ka bago e 40 a etelela setšhaba sa Isiraele pele, Moshe ga se a ka a ithekga ka yena eupša o ile a ithekga ka Jehofa. Mo re bona gabotse gore Moshe o be a ena le boikokobetšo bjo bogolo.

Moshe o be a sa nagane gore e be e le yena feela yo a swanetšego go ba le matla a bolaodi. O ile a thaba ge Jehofa a be a dumelela Baisiraele ba bangwe gore le bona e be baporofeta. (Numeri 11:24-29) Ge ratswalagwe a be a šišinya gore a arolele ba bangwe mošomo o mongwe wa gagwe, Moshe ka boikokobetšo o ile a diriša tšhišinyo yeo. (Ekisodo 18:13-24) Go ya mafelelong a bophelo bja gagwe, gaešita le ge a be a sa tiile mmeleng, Moshe o ile a kgopela Jehofa gore a kgethe mohlatlami wa gagwe. Ge Jehofa a be a kgetha Joshua, Moshe o ile a thekga lesogana le ka pelo ka moka, le go kgothaletša batho go latela Joshua ge a ba eta pele a ba iša Nageng ya Kholofetšo. (Numeri 27:15-18; Doiteronomio 31:3-6; 34:7) Therešo ke gore, Moshe o be a lebelela go etelela Baisiraele pele borapeding e le tokelo. Eupša ga se a ka a etiša bolaodi bja gagwe pele ga boiketlo bja ba bangwe.

Ga re nyake go dumelela matla a bolaodi, goba bokgoni bja tlhago bo re tsena hlogong. Gopola: Gore Jehofa a kgone go re diriša, boikokobetšo bja rena bo swanetše go dula bo feta bokgoni bja rena. (1 Samuele 15:17) Ge re ena le boikokobetšo e le ka kgonthe, re tla katanela go diriša keletšo e bohlale ya Beibele e rego: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago.”—Diema 3:5, 6.

Mohlala wa Moshe gape o re ruta gore re se ke ra etiša maemo goba matla a bolaodi pele bophelong.

Na re holwa ke go ekiša mohlala wa Moshe wa boikokobetšo? Ee, go a re hola! Ge re hlagolela boikokobetšo bja kgonthe, re nolofaletša batho ba ba re dikologilego bophelo, le go dira gore ba re rate. Se bohlokwa le go feta, re dira gore re ratwe ke Jehofa Modimo, yoo le yena a bonagatšago seka se se sebotse. (Psalme 18:35) “Modimo o lwa le baikgogomoši, eupša o bontšha baikokobetši botho bja gagwe bjo bogolo.” (1 Petro 5:5) A lebaka le le šušumetšago gakaakaang la go ekiša boikokobetšo bja Moshe!