Modimo ga a na mosadi wa kgonthe yo a ilego a dira bana le yena. Ke Mmopi wa diphedi tšohle. Batho ba bopilwe ba ena le bokgoni bja go ekiša dika tša Modimo. Ke ka baka leo motho wa pele yo Modimo a mmopilego, Adama, a bitšwago “morwa wa Modimo.” Ka mo go swanago, Jesu o bitšwa “Morwa wa Modimo” ka baka la gore o bopilwe a ena le dika tša go swana le tša Tatagwe.—Bala Luka 3:38; Johane 1:14, 49.

Modimo o bopile Jesu pele a ka bopa Adama. Ge e le gabotse, Modimo o bopile Jesu ke moka a mo diriša go bopa dilo tše dingwe ka moka, go akaretša le barongwa. Ke ka baka leo Beibele e bitšago Jesu “leitšibulo la tlholo yohle” ya Modimo.—Bala Bakolose 1:15, 16.

Pele a ka belegelwa Betlelehema, Jesu o ile a phela e le sebopiwa sa moya legodimong. Ge nako e fihla, Modimo o ile a fetišetša bophelo bja Jesu ka popelong ya Maria go tšwa legodimong e le gore a tle a belegwe e le motho.—Bala Luka 1:30-32; Johane 6:38; 8:23.

Ke ka baka la’ng Modimo a ile a dira gore Jesu a belegwe lefaseng e le motho? Jesu o ile a kgatha tema efe e kgethegilego? O ka hwetša dikarabo tša dipotšišo tšeo ka Beibeleng, gomme di tla oketša kwešišo le tebogo ya gago ka seo Modimo le Jesu ba go diretšego sona.