Sylvia, yo a šomago kgwebong ya tlhokomelo ya tša maphelo, o re: “Ke tsene kholetšheng le ba bantši bao ba bego ba ipolela gore ke batho ba bodumedi. Lega go le bjalo, ba be ba hlalefetša ditlhahlobong e bile ba diriša dihlaretagi tšeo di sego molaong. Bodumedi bo be bo sa kgome maphelo a bona.”

Monna yo a bitšwago Lionel o re: “Bašomigotee le nna ba bolela maaka e bile ba a letša ba bolela gore ba a babja mola ba sa babje e le ka kgonthe. Ba na le bodumedi eupša ga ba bo diriše—bo fo swana le fenitšhara ya go kgabiša.”

Bodumedi ga bo tutuetše maphelo a batho ba bantši kudu tabeng ya boitshwaro. Ba bantši ke bao “ba bonagalago eka ke barapedi ba Modimo” eupša ba “latola matla a borapedi bjoo.” (2 Timotheo 3:5) Baetapele ba bona ba bodumedi ga se ba bea mohlala o mobotse, le baruti ga se ba nea mehlape ya bona keletšo e nyakegago ya Mangwalo ya go phela ka boitshwaro. Ga go makatše ge ba bantši ba dumela gore Modimo ga a kgahlwe ke tsela yeo ba phelago ka yona.

Beibele e bontšha gore Modimo o na le maikwelo le gore o na le taba kudu le boitshwaro bja rena. Nakong ya ge Baisiraele ba bogologolo ba be ba rabela go Modimo, “[ba be] ba mo kweša bohloko.” (Psalme 78:40) Lega go le bjalo, go ba le “lethabo le legolo legodimong” ge motho a fetoša ka go tšwa pelong boitshwaro bja gagwe bjo bo fošagetšego. (Luka 15:7) Ge motho a thoma go lemoga dika tše dibotse tša Tatago rena wa legodimong, lerato leo a ratago Modimo ka lona le a gola, la mo tutuetša gore a rate seo Modimo a se ratago gomme a hloye seo Modimo a se hloilego.—Amose 5:15.

Kuranta ya Deseret News ya Salt Lake City, Utah, U.S.A e re Dihlatse tša Jehofa di “thuša batho go kaonefatša ditswalano tša lapa, gore ba thuše ba bangwe le go ba badudi bao ba botegago.” Kuranta ye e okeditše ka gore: “Ditho tša gona di latela melao ya motheo e phagamego ya boitshwaro. Di dumela gore go kgoga, go nwa kudu, go diriša dihlaretagi gampe, go petšha, boitshwaro bjo bo gobogilego bja thobalano le bosodoma (thobalano magareng ga batho ba bong bjo bo swanago) ke mekgwa yeo e gobatšago moyeng.”

Go ithuta ka semelo sa Modimo go thuša Dihlatse bjang? Sylvia, yo go boletšwego ka yena pejana, o re: “Go hlalefetša go atile kgwebong ya tša maphelo. Go be go tla ba bonolo go bo dira. Eupša go kwešiša kamoo Jehofa * a ikwago ka gona ka bjona go nthuša go dira seo se nepagetšego. Ke thabile e bile ke na le khutšo ya monagano.” Sylvia o kgodišegile gore go phela ka go dumelelana le ditumelo tša gagwe tša bodumedi go kaonefaditše bophelo bja gagwe.