Michelle: Lehono ke fa batho ka moka ba tikologong ye pampišana ye. E na le sehlogo se se rego, Na o ka Rata go Tseba Therešo? Kopi ya gago še.

Sophia: Na e bolela ka bodumedi?

Michelle: Ee. Ela hloko dipotšišo tše tshela tše di lego letlakaleng la ka ntle. Ke efe ya dipotšišo tše—

Sophia: Ema gona moo. Go bolela le nna e fo ba go itshenyetša nako.

Michelle: Gore’ng o re’alo?

Sophia: Therešo ke gore ga ke nape ke kgodišegile gore ke dumela go Modimo.

Michelle: Ke a go kwa, ke leboga ge o nntšheditše sa mafahleng. Anke ke botšiše, Na ka mehla o be o dutše o ikwa ka tsela yeo?

Sophia: Aowa, ke gotše ke tsena kereke. Eupša ke kgale ke tlogetše go ya.

Michelle: Ke a bona. Go ba gona, anke ke itsebiše. Leina la ka ke Michelle.

Sophia: Nna ke Sophia.

Michelle: Ke thabela go go tseba, Sophia.

Sophia: Le nna ke thabela go go tseba.

Michelle: Sophia, ga se ka tlela go go gapeletša gore o dumele seo ke se dumelago. Lega go le bjalo, go na le seo ke nyakago go se tseba. Na go na le selo se itšego seo se go dirilego gore o belaele go ba gona ga Modimo?

Sophia: Ee. Mma o ile a ba kotsing ya koloi nywageng e 17 e fetilego.

Michelle: Ke maswabi kudu go kwa seo. Na o ile a gobala?

Sophia: Ee, o ile a golofala go tloga nakong yeo.

Michelle: Seo ruri se a nyamiša. O swanetše go ba o nyamile kudu.

Sophia: Ee, ke nyamile. Ke ka baka leo ke ipotšišago gore, Ge e ba Modimo a le gona, go tla bjang gore a dumelele se se direga? Go tla bjang gore Modimo a dumelele re tlaišega ka tsela ye?

Michelle: Maikwelo a gago le dipotšišo tša gago di a kwagala. Ge re tlaišega, e fo ba ga tlhago go ipotšiša lebaka. Ge e le gabotse, gaešita le banna le basadi ba botegago ba mehleng ya Beibele ba ile ba ipotšiša ka seo!

Sophia: Ruri?

Michelle: Ee. Na o ka thabela gore ke go bontšhe mohlala o tšwago ka Beibeleng?

Sophia: Nka thabela seo.

Michelle: Ela hloko seo moporofeta Habakuku yo a botegago a ilego a se botšiša Modimo, seo se ngwadilwego go Habakuku, kgaolo 1, ditemana 2 le 3, tšeo di rego: “Jehofa, ke tla llela thušo go wena go fihlela neng gomme o sa nkwe? Ke tla kgopela tlhakodišo bošorong go fihlela neng gomme o sa ntlhakodiše? Ke ka baka la’ng o ntesa ke bona tše di kwešago bohloko?” Na o kwa dipotšišo tše di swana le tšeo o bego o di botšiša?

Sophia: Di a swana.

Michelle: Modimo ga se a ka a omanya Habakuku ge a botšiša dipotšišo tšeo, le gona ga se a ka a botša Habakuku gore o be a tloga a nyaka tumelo e oketšegilego.

Sophia: Seo se a makatša.

Michelle: Beibele e ruta gore Modimo o bona tlaišego ya rena gomme o tshwenyegile ka yona.

Sophia: O ra go re’ng?

Michelle: E re ke go bontšhe mohlala wa se go Ekisodo 3:7. Ke kgopela o bale temana yeo.

Sophia: Go lokile. E re: “Jehofa a oketša ka gore:  ‘Ruri ke bone mohlako wa batho ba ka bao ba lego Egipita, e bile ke kwele sello sa bona sa ge ba llišwa ke bao ba ba gapeletšago go šoma; gobane ke tseba mahloko a bona gabotse.’”

Michelle: Ke a leboga. Go ya ka lengwalo le, na Modimo o a bona ge batho ba gagwe ba tlaišega?

Sophia: Ee, go bonagala bjalo.

Michelle: Le gona ga a fo lemoga feela seo se diregago. Lebelela gape karolo ya mafelelo ya temana yeo. Modimo o itše: “Ke tseba mahloko a bona gabotse.” Na mantšu ao a kwagala a ka bolelwa ke Modimo yo a sego borutho goba yo a se nago bogwera?

Sophia: Aowa, ga go kgonege.

Michelle: Ee, Modimo ga a bone feela mathata a rena eupša o a nyama ge re le mathateng.

Sophia: Seo ke therešo.

Michelle: Re dutše re nagana ka seo, a re bale ka tiragalo e nngwe yeo go yona batho ba Modimo ba bego ba tlaišega. E begilwe go Jesaya 63:9. Karolo ya mathomo ya temana yeo e re: “Tlalelong ka moka ya bona le yena o be a tlalelwa.” Go ya ka se, na re be re ka se re Modimo o kgongwa ke go tlaišega ga batho ba gagwe?

Sophia: Ee, re ka re’alo.

Michelle: Sophia, therešo ke gore Modimo o tshwenyegile kudu ka rena, le gona o hloile go bona re tlaišega. Ge re ekwa bohloko, le yena o kwa bohloko.

Michelle: Pele ke sepela, go na le taba e nngwe yeo ke bego ke rata go bolela le wena ka yona.

Sophia: Go lokile.

Michelle: Ela hloko seo Beibele e re rutago sona ka matla a Modimo. Lengwalo leo ke nyakago gore re le bale ke la Jeremia 10:12. Ke kgopela o le bale.

Sophia: Go lokile. Le re: “Ke yena Modiri wa lefase ka matla a gagwe, Yo ka bohlale bja gagwe a theago ka go tia naga e enywago le Yo ka kwešišo ya gagwe a phurolotšego magodimo.”

Michelle: Ke a leboga. A re naganišiše ka temana ye ganyenyane. Na go be go sa nyakege gore Modimo a be le matla a magolo gore a kgone go dira legohle le legolo le dilo ka moka tšeo di lego go lona?

Sophia: Gona go bjalo.

Michelle: Bjale bona, ge e ba Modimo a na le matla a go bopa dilo ka moka tšeo di re dikologilego, gona na se ga se re gore o na le matla a go laola dibopiwa tša gagwe?

Sophia: Go bjalo.

Michelle: Nagana gape ka mmago. Ke ka baka la’ng o tshwenyega ge a tlaišega?

Sophia: Ka gobane ke a mo rata. Ke mma.

Michelle: Le gona ge e ba o be o na le matla a go mo fodiša lehono, na o be o ka se dire seo?

Sophia: Ke be ke tla dira bjalo.

Michelle: Nagana gore seo se bolela eng. Beibele e ruta gore Modimo o bona mathata a rena, o re kwela bohloko, le gona o na le matla a magolo kudu. Ka gona, na o kgona go bona gore go nyakega boitshwaro bjo bokaakang gore Modimo a se ke a tsena ditaba gare gomme a fediše tlaišego ya rena kapejana?

Sophia: Ke be ke sa e bone bjalo.

Michelle: Na mohlomongwe o na le lebaka leo le mo dirago gore gona bjale a se ke a fediša mathata a rena? *

Sophia: Hmm, mohlomongwe o na le lebaka.

Michelle: Ke kwa mogala wa gago o lla, ka gona ke kgopela go boa ka nako e nngwe gore re tle re tšwetše pele taba ye.

Sophia: Ke a leboga. Nka thabela seo. *