O ka letela gore Lentšu la Modimo e be la moswananoši, gomme go bjalo ka Beibele. Dikopi tša yona tše dibilione di gatišitšwe ka maleme a makgolo. Bohlale bjo bo hwetšwago ka Beibeleng bo na le matla a go fetoša batho gore e be ba kaone.—Bala 1 Bathesalonika 2:13; 2 Timotheo 3:16.

Re a tseba gore Beibele e tšwa go Modimo ka gobane e bolela e sa le pele ka mo go nepagetšego ka bokamoso. Ga go motho yoo a ka dirago seo ka boyena. Ka mohlala, ela hloko puku ya Jesaya. Kopi ya yona yeo e dirilwego nywaga e ka godimo ga e lekgolo pele Jesu a belegwa, e ile ya hwetšwa ka leweng kgauswi le Lewatle le le Hwilego. E bolela gore motse wa Babilona o be o ka se dulwe ke batho. Seo se phethagetše la mathomo nywaga e mentši ka morago ga bodiredi bja Jesu mo lefaseng.—Bala Jesaya 13:19, 20; 2 Petro 1:20, 21.

Beibele e ngwadilwe ka lebaka la nywaga e ka godimo ga e 1 600. Go be go na le bangwadi ba e ka bago ba 40 ba Beibele gomme ba ile ba latela sehlogo se tee ka ntle le gore ba ikganetše. Seo se ile sa kgonega bjang? Modimo o be a ba hlahla ge ba be ba ngwala.—Bala 2 Samuele 23:2.

Ka dinako tše dingwe Modimo o be a bolela le bangwadi ba Beibele a diriša barongwa, dipono goba ditoro. Gantši, Modimo o be a tsenya dikgopolo tša gagwe ka monaganong wa mongwadi gomme a mo dumelela gore a kgethe mantšu ao a tlago go a diriša gore a ngwale molaetša wa Gagwe.—Bala Kutollo 1:1; 21:3-5.