“KE KGONA go ganetša selo le ge e le sefe ntle le teko.” Polelwana ye ya go bapala ka mantšu yeo e tumilego e hlalosa gabotse kamoo batho ba bangwe ba lebelelago teko ka gona—ka garegare ba a e thabela. Lega go le bjalo, ba bangwe ba tšea teko e le lenaba leo le sa ba tlogelego leo ba tlogago ba rata go ka le fenya. O nagana’ng ka se? Ge o lebeletšane le teko, na o swanetše go ineela goba go e ganetša?

Ke therešo gore ga se diteko ka moka tšeo di wetšago mathateng a magolo. Ka mohlala, go ja setsekana sa kuku o sa swanela ga se gore go tla senya bophelo bja gago. Eupša go ineela dikgoketšong tše dingwe—kudukudu tšeo di lebišago boitshwarong bjo bo gobogilego bja tša thobalano—go ka ba le mafelelo a kotsi. Beibele e lemoša ka gore: “Mang le mang yo a hlotlolago . . . o na le pelo ya bošilo; yo a dirago seo o senya moya wa gagwe.”—Diema 6:32, 33.

O swanetše go arabela bjang ge e ba o lebana le teko ya boitshwaro bjo bo gobogilego go sa letelwa? Beibele e araba ka gore: “Thato ya Modimo ke gore le kgethagatšwe le be le ile bootswa. Yo mongwe le yo mongwe wa lena a tsebe go laola mmele wa gagwe ka kgethego le kgodišo.” (1 Bathesalonika 4:3, 4) O ka hlagolela bjang boikemišetšo bjoo? Ela hloko megato e meraro yeo e ka thušago.

Go bogela diswantšho tšeo di tsošago kganyogo ya thobalano go tla fo gakatša dikganyogo tše di fošagetšego. Jesu ge a kgonthišetša kgokagano yeo e lego gona magareng ga go bona le go kganyoga, o lemošitše ka gore: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” Ge a diriša pheteletšo e lego molaleng, o kgothaleditše gore: “Ge e ba leihlo leo la gago la le letona le go diriša sebe, le gonye o le lahlele kgole le wena.” (Mateo 5:28, 29) Ke ntlha efe yeo re e rutwago mo? E le gore re ganetše teko, re swanetše go ikemišetša go gata mogato gomme re se ke ra bogela diswantšho tšeo di tsošago kganyogo.

Ka mohlala: Akanya o lebelela seetša seo se foufatšago  sa thotšhi ya motšhumeledi wa ditšhipi. Na o tla tšwela pele o se lebeletše? Ruri ga go bjalo! O tla retologa goba wa thiba mahlo a gago gore o se ke wa senyegelwa ke go bona. Ka mo go swanago, ge e ba mahlo a gago a wela diswantšhong tše di tsošago kganyogo ya thobalano—e ka ba tšeo di gatišitšwego, sekirining goba tša kgonthe—lebelela thoko kapejana. Šireletša monagano wa gago gore o se ke wa šilafatšwa. Motho yo pele a bego a lemaletše go bogela diswantšho tša batho bao ba sa aparago, e lego Juan, o re: “Ge ke bona mosadi yo a kgahlišago, gantši ke lekega gore ke mo lebelele gabedi goba gararo. Ka gona ke gapeletša mahlo a ka gore a lebelele thoko, ke moka ka ipotša gore: ‘Rapela Jehofa! Ruri o swanetše go rapela gona bjale!’ Ka morago ga ge ke rapetše, kganyogo yeo e hwelela kapejana.”—Mateo 6:9, 13; 1 Bakorinthe 10:13.

Ela hloko gaešita le monna yo a botegago Jobo, yo a itšego: “Ke dirile kgwerano le mahlo a ka. Bjale nka šetša kgarebe bjang?” (Jobo 31:1) Ke ka baka la’ng o sa dire phetho e swanago?

Leka mokgwa wo: Ge e ba mahlo a gago a wela diswantšhong tšeo di tsošago kganyogo ya thobalano, lebelela thoko kapejana. Ekiša mongwadi wa Beibele yo a rapetšego ka gore: “Tlogediša mahlo a ka go bona se se hlokago mohola.”—Psalme 119:37.

Ka ge ka moka ga rena re sa phethagala, ka dinako tše dingwe re ka lwantšhana le dikganyogo tše fošagetšego. Beibele e re: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e gotše e tswala sebe.” (Jakobo 1:14, 15) O ka phema bjang go tanywa boemong bjoo bjo bo mpefalelago pele, e bile go le thata kudu go tšwa go bjona?

Ge o welwa ke dikganyogo tše fošagetšego, gopola gore o ka kgetha gore o arabela bjang go tšona. Lwantšha dikganyogo tšeo. Di ntšhe monaganong wa gago. O se ke wa dula o nagana ka dilo tša boikgopolelo tšeo di gobogilego. Monna yo a bitšwago Troy, yo a bego a lemaletše go bogela diswantšho tša batho bao ba sa aparago Inthaneteng, o re: “Ke ile ka lwela go tloša dikgopolo tše fošagetšego monaganong wa ka ka gore ke tsepamiše monagano dikgopolong tše nepagetšego. Go be go se bonolo. Ke ile ka palelwa gantši. Eupša mafelelong ke ile ka ithuta go laola monagano wa ka.” Mosadi  yo a bitšwago Elsa, yo a bego a lwantšha teko ya boitshwaro bjo bo gobogilego ge e be e sa le mofsa, o gopola ka gore: “Ke ile ka kgona go laola dikgopolo tše fošagetšego ka go dula ke swaregile le ka go rapela Jehofa.”

Leka mokgwa wo: Ge o hlasetšwe ke dikgopolo tše gobogilego, kgaotša go nagana ka tšona gateetee gomme o rapele. Lwantšha dikgopolo tše fošagetšego ka go tlatša monagano wa gago ka “dilo le ge e le dife tša therešo, dilo le ge e le dife tše di naganišišwago ka šedi, dilo le ge e le dife tše di lokilego, dilo le ge e le dife tše di sekilego, dilo le ge e le dife tše di rategago, dilo le ge e le dife tšeo go bolelwago gabotse ka tšona, dilo le ge e le dife tša bokwala le dilo le ge e le dife tše di tumišegago.”—Bafilipi 4:8.

Ge kganyogo, teko le sebaka di kopane, go ka ba bonolo go wela kotsing. (Diema 7:6-23) O ka phema bjang go wela kotsing?

Beibele e eletša ka bohlale ka gore: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.” (Diema 22:3) Ka gona diša dikgato tša gago. Nagana e sa le pele ka maemo ao a ka bakago mathata, gomme o a pheme. (Diema 7:25) Monna yo a bitšwago Filipe, yo a fentšego go lemalela mokgwa wa go bogela diswantšho tša batho bao ba sa aparago, o re: “Ke beile khomphutha ya lapa moo e ka bonwago ke bohle e bile ke tsentše lenaneo la khomphutha leo le thibelago mekero e itšego bakeng sa Inthanete. Le gona ke tsena Inthaneteng ge feela ba bangwe ba le gona.” Ka mo go swanago, Troy, yo go boletšwego ka yena pejana, o re: “Ke phema go bogela difilimi tšeo di tsošago kganyogo ya tša thobalano le go ba gare ga batho bao ba bolelago ka thobalano ka tsela ya maroga. Ga ke nyake go ipea kotsing.”

Leka mokgwa wo: Sekaseka mafokodi a gago ka potego gomme o rulaganye e sa le pele go phema maemo ao a ka go lebanyago le teko.—Mateo 6:13.

Go thwe’ng ge e ba, go sa šetšwe go leka ga gago ka mešegofela, o thoma go felelwa ke matla gomme wa ineela tekong? O se ke wa nyama gomme wa kgaotša go leka. Beibele e re: “Moloki le ge a ka wa gašupa, o tla tsoga gape.” (Diema 24:16) Ee, Tatago rena wa legodimong o re kgothaletša gore re ‘tsoge.’ Na o tla amogela thušo ya gagwe e lerato? Gona o se ke wa lapa go retologela go yena ka thapelo. Aga tumelo ya gago ka go ithuta Lentšu la gagwe. Matlafatša boikemišetšo bja gago ka go ba gona dibokeng tša Bokriste. Kgothatšwa ke kholofetšo ya Modimo e rego: “Ke tla go matlafatša. Ruri ke tla go thuša.”—Jesaya 41:10.

Cody, yo go boletšwego ka yena mathomong, o re: “Ke dirile boiteko bjo bogolo gore ke fenye mokgwa wa ka wa go bogela diswantšho tša batho bao ba sa aparago. Ke ile ka palelwa gantši, eupša ka thušo ya Modimo, ke ile ka feleletša ke atlegile.” Dylan, yo go boletšwego le ka yena pejana, o re: “Nkabe go ile gwa ba bonolo gore ke robale le mošomigotee le nna. Eupša ke ile ka ema ke tiile gomme ka mmotša gore, ‘Ke a gana!’ Go bose kudu go ba le letswalo le le hlwekilego. Sa bohlokwa kudu ke go tseba gore ke dirile gore Jehofa a ikgantšhe ka nna.”

Ge o ema o tiile gomme o ganetša teko, o ka kgodišega gore Modimo o tla ikgantšha le ka wena!—Diema 27:11.