MORAGONYANA, dikgoro tše dingwe tša tsheko nageng e nngwe kua Bodikela di ile tša amogela bohlatse bja maaka kgahlanong le banna ba babedi bao ba bego ba pharwa ka molato wa go bolaya e bile ba ile ba ahlolelwa lehu ka baka la molato woo. Gateetee ka morago ga go tseba gore bohlatse bjoo bo neilwego ke bja maaka, boramolao ba ile ba šoma ka thata go lokolla monna o tee yo a bego a šetše a ahloletšwe lehu. Eupša boramolao bao ba nago le bokgoni ba ile ba palelwa ke go lokolla monna yo mongwe ka ge a be a šetše a bolailwe.

Ka ge kae le kae dilong tša molao kahlolo e ka kgopamišwa, Beibele e kgothaletša gore: “Ge e le toka yona o e phegelele.” (Doiteronomio 16:20) Ge baahlodi ba katanela go ahlola ka toka, setšhaba se a holega. Molao wa Modimo o be o nea Isiraele ya bogologolo tshepedišo ya molao yeo e bego e sa bebe sefahlego le go hloka toka. Anke re lebeleleng Molao woo go bona ge e ba ‘ditsela tša gagwe Modimo ka moka e le toka.’—Doiteronomio 32:4.

Batho ba ahlolwa ka toka ge baahlodi ba šoma ka thata, ba ahlola ka toka le go hloka bomenetša. Molao wo Modimo a o neilego Baisiraele o be o tšeela godimo baahlodi ba mohuta wo. Pejana ge Baisiraele ba be ba le lešokeng, Moshe o ile a laelwa go nyaka “banna ba swanelegago, ba boifago Modimo, ba botegago e bile ba hloile poelo e hwetšwago ka boradia,” go hlankela e le baahlodi. (Ekisodo 18:21, 22) Ka morago ga nywaga e 40, o ile a gatelela gape go nyakega ga banna bao ba nago le “bohlale, temogo le boitemogelo” go ahlola batho.—Doiteronomio 1:13-17.

Nywaga e makgolo ka morago, Kgoši Jehoshafate * wa Juda o ile a laela baahlodi gore: “Šetšang seo le se dirago, ka gobane ga le ahlolele batho eupša le ahlolela Jehofa; e bile o na le lena ditabeng tša go ahlola. Bjale anke le boifeng Jehofa. Elang hloko le be le gate mogato, ka gobane go Jehofa Modimo wa rena ga go na go se loke goba go beba sefahlego goba go amogela letsogo-le-kobong.” (2 Dikoronika 19:6, 7) Ka gona kgoši e ile ya gopotša baahlodi gore ge e ba go beba sefahlego goba megabaru go be go ka laola diphetho tša bona, gona Modimo o be a tla ba bea molato ka baka la ditlamorago tše kotsi tšeo di ka tlišwago ke kahlolo yeo.

Ge baahlodi ba Isiraele ba be ba phela ka ditekanyetšo tšeo tše phagamego, setšhaba se be se ikwa se šireletšegile le go thaba. Molao wa Modimo gape o be o neile baahlodi melao ya motheo e mentši go ba thuša gore ba dire diphetho tšeo di lokilego gaešita le melatong e thata. E mengwe ya melao yeo ya motheo ke efe?

Le ge baahlodi bao ba kgethilwego e be e swanetše go ba banna ba bohlale le bao ba nago le bokgoni, ba be ba sa tlogelelwa go dira dikahlolo ka go bota bokgoni le bohlale bja bona. Jehofa Modimo o be a ba neile melao ya motheo goba ditlhahlo tšeo di bego di ka ba thuša go dira diphetho tša maleba. Ditlhahlo tše dingwe tšeo di bego di neilwe baahlodi ba Baisiraele ke tše.

Nyakišišang taba ka botlalo. A diriša Moshe, Modimo o ile a laela baahlodi ba Baisiraele gore: “Ge go na le taba yeo e sekwago magareng ga bana babo lena, le  ahlole ka toko.” (Doiteronomio 1:16) Baahlodi ba be ba ka dira phetho e lokilego ge feela ba be ba ena le ditaba ka botlalo tša molato woo. Ka baka leo Modimo o ile a laela bao ba swaraganago le ditaba tša boahlodi go ‘tsoma taba yeo, le go e nyakišiša le go e botšišiša ka botlalo.’ Baahlodi kgorong ba be ba swanetše go kgonthišetša gore molato wa bosenyi woo motho a pharwago ka wona o “hlatselwa gore ke therešo” pele o ka tšwela pele.—Doiteronomio 13:14; 17:4.

Theetšang bohlatse bja dihlatse. Bohlatse bja dihlatse bo be bo le bohlokwa ge molato o be o nyakišišwa. Molao wa Modimo o be o bolela gore: “Hlatse e tee e se ke ya ema go bea motho molato le ge e le ofe goba go mo phara ka sebe le ge e le sefe, ge e ba go ka ba le sebe le ge e le sefe seo a se dirago. Taba e tiišwe ka molomo wa dihlatse tše pedi goba tše tharo.” (Doiteronomio 19:15) Molao wa Modimo o be o laela hlatse gore: “O se ke wa bolela pego ya maaka. O se ke wa dirišana le yo kgopo ka go ba hlatse yeo e logago maano a bošoro.”—Ekisodo 23:1.

Tsomang therešo go bao ba neago bohlatse. Kotlo ya bao ba bolelago maaka kgorong e be e le matla go batho ka moka bao ba bego ba akaretšwago, e be e akaretša gore: “Baahlodi ba nyakišiše gabotse; ge e ba hlatse yeo e le hlatse ya maaka gomme e latofatša ngwanabo yona ka maaka, gona le e direng ka mokgwa wo e bego e rerile go dira ngwanabo yona, le tlošeng se sebe mo gare ga lena.” (Doiteronomio 19:18, 19) Ge e ba hlatse e be e bolela maaka kgorong e le ge e nyaka go tšea bohwa bja motho yo a latofatšwago, gona hlatse yeo e swanetše go lefišwa tefo e lekanago le yeo molatofatšwa a bego a tla e lefa. Ge e ba hlatse ye e ka bolela maaka ao a ka dirago gore motho yo a latofatšwago a bolawe, e be e tla swanelwa ke go bolawa le yona. Kotlo ye e be e dira gore hlatse e bolele therešo.

Ahlolang ka go se bebe sefahlego. Gateetee ge bohlatse ka moka bo kwelwe, baahlodi ba a boledišana gore ba fihlele phetho. Mo nakong ye go latela sebopego se bohlokwa seo se bolelwago ke Molao wa Modimo, se rego: “Le se ke la hloka toka ge le ahlola. Le se ke la  swara mmotlana ka go beba sefahlego, le gona le se ke la šia sefahlego sa motho yo mogolo setšhabeng. Le ahlole mogagabo lena ka toka.” (Lefitiko 19:15) Melatong ka moka, baahlodi ba be ba swanetše go dira phetho go ya le ka moo molato o lego ka gona e sego go dira phetho go ya ka ponagalo ya motho goba maemo a gagwe setšhabeng.

Melao ye ya motheo, yeo e bego e neilwe Baisiraele Molaong wa Modimo nywageng e makgolo e fetilego, e sa dutše e ka šoma le dikgorong tša tsheko le lehono. Ge e ba e ka latelwa, go se ahlole molato ka toka go ka phengwa.

Moshe o ile a botšiša Baisiraele potšišo e rego: “Ke setšhaba sefe se segolo seo se nago le ditaelo tša go loka gotee le dikahlolo tše di swanago le molao wo ka moka wo ke o beago pele ga lena lehono?” (Doiteronomio 4:8) Ruri ga gona setšhaba seo se bego se holwa ke ditaelo tše. Ka tlase ga pušo ya Kgoši Solomone, yo bofseng bja gagwe a ilego a tsoma go diriša melao ya Jehofa, batho ba ile ba “dula ka polokego” le go thabela khutšo le katlego, “ba eja, ba enwa e bile ba thabile.”—1 Dikgoši 4:20, 25.

Ka maswabi, Baisiraele ba ile ba furalela Modimo wa bona. A diriša moporofeta Jeremia, Modimo o ile a bolela gore: “Bonang! Ba ganne lentšu la Jehofa, gomme ke bohlale mang bjo ba nago le bjona?” (Jeremia 8:9) Mafelelo e ile ya ba gore Jerusalema e fetoga “motse wo o nago le molato wa madi” wo o tletšego ‘dilo tšeo di šišimišago.’ Mafelelong o ile wa senywa le go dula e le lešope nywaga e 70.—Hesekiele 22:2; Jeremia 25:11.

Moporofeta Jesaya o ile a phela dinakong tšeo di hlobaetšago historing ya Baisiraele. Ge a be a lebelela dilo tšeo di bego di direga ka nako yeo, o ile a šušumeletšega go bolela therešo e matla ka Jehofa Modimo le Molao wa Gagwe gore: “Gobane ge o ahlola lefase, baagi ba naga e enywago ba tla ithuta go loka”—Jesaya 26:9.

A thabišitšwe ke se, moporofeta Jesaya o ile a porofeta ka pušo ya Kgoši Mesia, Jesu Kriste gore: “A ka se ahlole go ya ka seo a se bonago ka mahlo feela goba go fo kgalema go ya ka seo a se kwelego ka ditsebe tša gagwe. O tla ahlola babotlana ka toko, a kgalema batho ba boleta ba lefase ka go loka.” (Jesaya 11:3, 4) A tebelelo e kgahlišago gakaakang go bohle bao ba tlago go ba balata ba Pušo ya Mesia ka tlase ga Mmušo wa Modimo!—Mateo 6:10.