MORAGO bjale monyakišiši yo mongwe o ile a botšiša bafsa ba fetago ba 800 ba mekgatlong e mentši ya madumedi ge e ba ba dumela gore Jesu o araba dithapelo. Ba ka godimo ga 60 lekgolong ba ile ba re ba dumela ba tiišitše gore o a di araba. Lega go le bjalo, mofsa yo mongwe o ile a tloša leina Jesu nyakišišong yeo gomme a ngwala “Modimo.”

Wena o nagana’ng? Na re swanetše go lebiša dithapelo tša rena go Jesu goba go Modimo? * E le gore re hwetše karabo, a re thomeng ka go ela hloko kamoo Jesu a rutilego barutiwa ba gagwe go rapela.

Jesu o ile a ruta le go re bontšha motho yoo re swanetšego go mo rapela.

THUTO YA GAGWE: Ge yo mongwe wa barutiwa a kgopela Jesu a re: “Morena, re rute go rapela,” Jesu o ile a araba ka gore: “Neng le neng ge le rapela le re: ‘Tate.’” (Luka 11:1, 2) Go oketša moo, Thutong ya gagwe e tumilego ya Thabeng, Jesu o ile a kgothaletša batheetši ba gagwe go rapela. O itše: “Rapela Tatago.” O ile a ba a ba kgonthišetša ka gore: “Tatago lena o tseba gore ke dilo dife tšeo le di nyakago le pele le mo kgopela.” (Mateo 6:6, 8) Bošegong bja mafelo bja ge e sa le motho, Jesu o boditše barutiwa ba gagwe gore: “Ge e ba le kgopela Tate selo le ge e le sefe, o tla le nea sona leineng la ka.” (Johane 16:23) Ka gona Jesu o re rutile go rapela yoo e lego Tatagwe le Tatago rena, Jehofa Modimo.—Johane 20:17.

MOHLALA WA GAGWE: Ka go dumelelana le kamoo a rutilego ba bangwe go rapela, Jesu ka boyena o rapetše ka gore: “Ke go tumiša phatlalatša wena Tate, Morena wa legodimo le lefase.” (Luka 10:21) Lebakeng le lengwe, “Jesu [o ile] a lebelela legodimong gomme a re: ‘Tate, ke a go leboga ka ge o nkwele.’” (Johane 11:41) Le gona ge a be a ehwa, Jesu o rapetše ka gore: “Tate, ke gafela moya wa ka diatleng tša gago.” (Luka 23:46) Ka go rapela Tatagwe wa legodimong—“Morena wa legodimo le lefase”—Jesu o beetše bohle mohlala o mobotse gore ba o latele. (Mateo 11:25; 26:41, 42; 1 Johane 2:6) Na ke kamoo barutiwa ba Jesu ba lekgolong la pele ba kwešišitšego ditaelo tša gagwe?

Dibeke tše sego kae ka morago ga ge Jesu a boetše legodimong, barutiwa ba gagwe ba ile ba tlaišwa le go tšhošetšwa ke baganetši ba bona. (Ditiro 4:18) Ke therešo gore ba ile ba rapelela thušo—eupša ba rapetše mang? Ba ile “ba hlatlošetša mantšu a bona go Modimo,” ba rapelela gore a tšwele pele a ba thuša “ka leina la mohlanka wa [gagwe] yo mokgethwa Jesu.” (Ditiro 4:24, 30) Ka gona barutiwa ba be ba diriša tlhahlo ya Jesu ya go rapela. Ba be ba rapela Modimo, e sego Jesu.

Nywaga ka morago, moapostola Paulo o ile a hlalosa tsela yeo ka yona yena le badirišanigotee le yena ba ilego ba rapela. Ge a ngwalela Bakristegotee le yena o itše: “Re leboga Modimo Tatago Morena wa rena Jesu Kriste ka mehla ge re le rapelela.” (Bakolose 1:3) Paulo gape o ngwaletše badumedigotee le yena mabapi le go “leboga Modimo wa rena le Tate ka mehla leineng la Morena wa rena Jesu Kriste ka  baka la dilo tšohle.” (Baefeso 5:20) Mantšung a, re bona gore Paulo o be a kgothaletša ba bangwe go rapela “Modimo wa [gagwe] le Tate ka mehla . . . ka baka la dilo tšohle”—eupša ge e le gabotse go rapelwa leineng la Jesu.—Bakolose 3:17.

Re ka bontšha gore re rata Jesu go swana le Bakriste ba lekgolong la pele la nywaga ka go latela keletšo ya gagwe mabapi le thapelo. (Johane 14:15) Ge re rapela Tatago rena wa legodimong—le gona re rapela yena feela—mantšu a Psalme 116:1, 2 a tla dula a re kgodiša, ge a re: “Ke tlala lerato ge Jehofa a ekwa Lentšu la ka . . . ke tla mmitša matšatši ka moka a bophelo bja ka.” *