Go na le diporofeto tše dintši tšeo di hlaloswago ka botlalo ka Beibeleng. Ga go motho yo a ka bolelago e sa le pele kamoo go nabilego gakaalo ka bokamoso. Ka go re’alo, go phethagala ga diporofeto tša Beibele go nea bohlatse bjo bo kgodišago bja gore Beibele ke Lentšu la Modimo.—Bala Joshua 23:14; 2 Petro 1:20, 21.

Diporofeto tša Beibele tšeo di šetšego di phethagetše di re nea motheo o kwagalago wa gore re dumele go Modimo. (Baheberu 11:1) Le gona di re nea kgodišego ya gore dikholofetšo tša Modimo ka bokamoso bjo bokaone di tla phethagala. Ka go re’alo, boporofeta bja Beibele bo re nea kholofelo ya kgonthe.—Bala Psalme 37:29; Baroma 15:4.

Diporofeto tše dingwe di lemoša bahlanka ba Modimo gore ba tšee kgato. Ka mohlala, ge Bakriste ba lekgolong la pele la nywaga ba be ba bona go phethagala ga diporofeto tše itšego, ba ile ba tloga Jerusalema. Ka morago, ge motse o be o fedišwa ka ge batho ba bantši ba wona ba ile ba gana Jesu, Bakriste ba be ba le kgole lefelong leo le bolokegilego.—Bala Luka 21:20-22.

Lehono, diporofeto tšeo di phethagalago di bontšha gore kgauswinyane Mmušo wa Modimo o tla fediša mebušo ya batho. (Daniele 2:44; Luka 21:31) Ka gona go akgofile gore motho yo mongwe le yo mongwe a tšee kgato gona bjale gore a amogelwe ke Kgoši yeo Modimo a e kgethilego, e lego Jesu Kriste.—Bala Luka 21:34-36.