Kgaolo 38

Ke tla Dira’ng ka Bophelo bja ka?

“Mathomong ke be ke sa tshwenyege ka bokamoso. Eupša ge ke be ke le kgauswi le go aloga sekolong se se phagamego, ke ile ka lemoga gore bjale ke tlo thoma go tseba bophelo, go šoma gotee le go itefelela ditshenyagalelo tša ka.”—Alex.

A RE re o rulaganya go tšea leeto leo le tlago go go iša kgole le gae. Ga go pelaelo gore o tlo thoma ka go lebelela mmapa go bona gore ke tsela efe e kaone yeo o tlago go sepela ka yona. Go a swana le ka go rulaganya bokamoso bja gago. Michael, e lego lesogana leo ga bjale le hlankelago go e nngwe ya diofisi tša makala tša Dihlatse tša Jehofa, o re: “O na le dikgetho tše dintši.” Ge a botšišwa gore motho o kgona bjang go kgetha gare ga tšona, o re: “Ka go ipeela dipakane.”

Nagana ka pakane e le lefelo leo o yago go lona. Go ka direga gore o se ke wa fihla moo ge e ba o fo sepela o sa tsebe gore o ya kae. Ge re bolela ka tsela ya seswantšhetšo, go kaone kudu gore o lebelele mmapa ke moka o kgethe tsela yeo o tlago go sepela ka yona. Ge o dira se o tla ba o latela keletšo yeo e lego go Diema 4:26 ye e rego: “Batalatša tsela ya lenao la gago.” Contemporary English Version e fetolela mantšu ao ka gore: “Tseba mo o yago gona.”

Nywageng e tlago, o tlo dira diphetho tše dintši tša bohlokwa mabapi le borapedi, mošomo, lenyalo, lapa le ditaba tše dingwe tša bohlokwa kudu. Go tla ba bonolo gore o dire dikgetho tše bohlale ge e ba sa pele o tseba moo o yago gona. Le gona, ge o dutše o kgetha seo o nyakago go se dira ka bophelo bja gago, go na le ntlha yeo ruri o sa swanelago go e hlokomologa.

“Gopola Mmopi wa Gago”

E le gore o thabe e le ka kgonthe, o swanetše go tšeela godimo mantšu a Kgoši Solomone yo bohlale yo a itšego: “Gopola Mmopi wa gago yo Mogolo matšatšing a bofseng bja gago.” (Mmoledi 12:1) Ka mantšu a mangwe, dikgetho tšeo o di dirago bophelong di swanetše go laolwa ke go kganyoga go kgahliša Modimo.

Ke ka baka la’ng go etiša seo pele go le bohlokwa? Go Kutollo 4:11, Beibele e re: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.” Dibopiwa ka moka tša legodimong le lefaseng di na le lebaka la go leboga Mmopi. Na o a mo leboga gore o go neile “bophelo le mohemo le dilo ka moka”? (Ditiro 17:25) Na ga o ikwe o gapeletšega go nea Jehofa Modimo selo se itšego go mmontšha gore o leboga dilo ka moka tšeo a go neilego tšona?

E le ge ba gopola Mmopi wa bona, bafsa ba bantši ba Dihlatse tša Jehofa ba tsenetše tirelo ya nako e tletšego. Ela hloko tše dingwe tša dibopego tše di kgahlišago tša tirelo tšeo o ka di tsenelago.

Bobulamadibogo. Babulamadibogo ba ka mehla ba fetša nako e oketšegilego ba le bodireding. Ka go itlwaetša le ka phihlelo, ba kaonefatša bokgoni bja bona bja go ba barutiši ba Beibele.

Go hlankela mo go nyakegago thušo. Ba bangwe ba hudugela lefelong leo go nago le bagoeledi ba Mmušo ba sego kae. Ba bangwe ba ithuta leleme lešele gomme ba hlankela phuthegong ya kgauswi le mo ba dulago goba ba hudugela nageng e šele. *

Tirelo ya boromiwa. Babulamadibogo bao ba swanelegago ba ba phetšego gabotse le bao ba nago le matla ba tlwaeletšwa go yo dira boboledi dinageng dišele. Baromiwa ba phela maphelo a thabišago le ao a kgotsofatšago.

Tirelo ya Bethele. Ditho tša lapa la Bethele di hlankela diofising tša makala tša Dihlatse tša Jehofa. Dinageng tše dingwe, se se akaretša go gatiša dikgatišo tše di theilwego Beibeleng le go di romela mafelong a mangwe.

Tirelo ya go thuša dinageng tše dingwe. Bao ba lego tirelong ye ba ya dinageng tše dingwe go yo thuša ka go aga Diholo tša Mmušo, Diholo tša Kopano le diofisi tša makala.

Sekolo sa Beibele sa Bana Babo Rena ba Sego Lenyalong. Bagolo le bahlanka ba bodiredi bao ba sego ba nyala bao ba swanelegago ba tlwaeletšwa go swaragana le ditaba tša mabapi le mokgatlo le go ruta phatlalatša. Dialoga tše dingwe di abelwa go yo hlankela mafelong a mangwe.

Go Kgetha Seo o Tlago go se Dira

Tirelo ya nako e tletšego ke pakane e hlomphegago, gomme ditšhegofatšo tša yona ke ga mantšha-o-tlogele. Lega go le bjalo, go nyakega gore o nagane le go rulaganya e sa le pele. Ka mohlala, ipotšiše gore: ‘Ke bokgoni bofe bjo ke nago le bjona bjo bo tlago go nthuša go itlhokomela?’

Kelly o be a ipeetše pakane ya go ba mmulamadibogo, ka gona o ile a kgetha mošomo wa boiphedišo ka bohlale. O re: “Ke ile ka swanelwa ke go kgetha mošomo wo o bego o tla nthuša go itlhokomela ge ke le bodireding.”

Kelly o ile a ingwadiša klaseng yeo e bego e ruta batho mešomo e itšego sekolong se se phagamego. Se se ile sa mo thuša go fihlelela pakane ya gagwe e kgolo. Kelly o re: “Go tsenela tirelo ya nako e tletšego e be e le selo seo ke bego ke nyaka go se dira. Dilo tše dingwe ka moka di be di tla tla ka morago.” Kelly o thabela kgetho ya gagwe. O re: “Ke nagana gore ye ke phetho e di phalago tšohle.”

Botšiša Tsela

Ge e ba o be o sepela lefelong leo o sa le tsebego, ga go pelaelo gore kaekae o tlo swanelwa ke go botšiša tsela. O ka dira se se swanago ge o rulaganya bokamoso bja gago. Kgopela keletšo go batho ba bangwe. Diema 20:18 e re: “Maano a tiišwa ka dikeletšo.”

Batswadi ba gago ke batho ba pele bao ba ka go eletšago. Eupša o ka kgopela keletšo le go Bakriste ba bangwe bao ba godilego tsebong bao tsela ya bona ya bophelo e bontšhago gore ba diriša bohlale bjo bo tšwago go Modimo. Roberto yo a lego nywageng ya gagwe ya bo-20 e bile e le setho sa lapa la Bethele, o eletša ka gore: “Boledišana le batho ba bagolo ba phuthegong ya geno goba ya kgauswi bao e lego mehlala e mebotse.”

Go phala motho le ge e le ofe, Jehofa Modimo o nyaka go go thuša gore o dire dikgetho tšeo di tlago go go tlišetša lethabo le legolo. Ka gona, mo kgopele gore a go thuše ‘go tšwela pele o hlatha seo thato ya gagwe e lego sona’ mabapi le bokamoso bja gago. (Baefeso 5:17) Dikarolong ka moka tša bophelo bja gago, latela keletšo ya Diema 3:5, 6 yeo e rego: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.”

Bakeng sa tsebišo e oketšegilego, bogela DVD ya “Young People Ask—What Will I Do With My Life?” E hwetšagala ka maleme a fetago a 30

[Mongwalo wa tlase]

 KEY SCRIPTURE

“‘Ntekeng. . . ,’ o re’alo Jehofa wa madira, ‘le bone ge nka se le bulele mašoba a legodimo gomme ka le tšhollela tšhegofatšo ka boati.’”—Maleaki 3:10.

KELETŠO

Boledišana le batho ba bangwe bao ba bilego tirelong ya nako e tletšego ka nywaga e mentši. Ba botšiše gore ke ka baka la eng ba kgethile mošomo o bjalo le gore ke ditšhegofatšo dife tšeo ba di thabetšego.

 Na O Be O Tseba . . . ?

Mohlagase o ka dira gore sedirišwa se itšego se šome. Ka mo go swanago, moya o mokgethwa wa Modimo o ka go tutueletša go dira mo gontši tirelong ya gagwe.—Ditiro 1:8.

 KGATO YEO KE TLAGO GO E TŠEA!

E le go nthuša gore ke thabe kutšwanyana bodireding, ke tla boledišana le ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

 O NAGANA ENG?

● O na le bokgoni bofe?

● O ka diriša bokgoni bja gago ka ditsela dife go tumiša Jehofa?

● Ke sebopego sefe sa tirelo ya nako e tletšego seo go boletšwego ka sona kgaolong ye seo se go kgahlago ka mo go kgethegilego?

 [Ntlhakgolo go letlakala 313]

“Ke hlompha batswadi ba ka kudu. Go kgotlelela ga bona ka phišego bodireding, tsela yeo ba ilego ba lebeletšana le mathata a tša ditšhelete le kgothatšo yeo ba nneilego yona ya gore ke tsenele tirelo ya nako e tletšego, ka moka tše di nthušitše kudu.”—Jarrod

 [Lepokisi go letlakala 314]

Letlakala la go Itlhahloba

Dipakane tša ka

Swaya gore ke dipakane dife tšeo o ka ratago go ipeela tšona. Diriša dikgoba tšeo o di neilwego go ngwala dipakane tšeo di swanelago wena goba o ingwalele tša gago.

Dipakane tša Bodireding

□ Ke tla oketša nako yeo ke e fetšago ke le bodireding ka diiri tše kgwedi le kgwedi

□ Ke tla sepediša dikgatišo tše kgwedi le kgwedi

□ Ke tla diriša Beibele ge ke bolela le ba bangwe ka tumelo ya ka

□ Ke tla dira maeto a go boela a kgwedi le kgwedi

□ Ke tla thoma go swara thuto ya Beibele

Dipakane tše dingwe:

Dipakane tša Thuto ya Motho ka Noši

□ Ke tla bala matlakala a a Beibele letšatši le letšatši

□ Ke tla lokišeletša diboka tša beke le beke

□ Ke tla dira nyakišišo ka dintlha tše tša Beibele:

Dipakane tša Phuthegong

□ Ke tla araba bonyenyane gatee sebokeng se sengwe le se sengwe

□ Ke tla thoma poledišano le motho yo mogolo yo ke nyakago go mo tseba gakaone

□ Ke tla etela motšofadi goba setho se se babjago sa phuthego

Dipakane tše dingwe: ․․․․․

Letšatšikgwedi la Lehono ․․․․․

Hlahloba lelokelelo le ka morago ga dikgwedi tše tshela gomme o bone gore o šomile bjang go fihleleleng dipakane tša gago. Ge e ba go nyakega, di fetoše goba o di oketše.

[Seswantšho go letlakala 312]

Go ipeela dipakane go tla go thuša gore o se ke wa itapiša eupša o sa fihle felo