Kesara Augustose, e lego mmušiši wa Mmušo wa Roma, o laetše gore yo mongwe le yo mongwe o swanetše go ingwadiša. Ka gona Josefa le Maria ba swanetše go tšea leeto ba ye motseng wo Jesu a bego a tla belegelwa go wona, e lego motse wa Betlelehema, wo o lego ka borwa bja Jerusalema.

Batho ba bantši ba tlile Betlelehema go tlo ingwadiša. Lefelo le nnoši leo le hwetšagalago gore Josefa le Maria ba dule go lona ke ka setaleng, moo go dulago ditonki le diphoofolo tše dingwe. Jesu o belegelwa moo. Maria o mo phuthela ka mašela gomme a mo latša legopong, moo go tsenywago dijo tša diphoofolo.

Modimo e ka ba e le yena a dirilego gore Kesara Augustose a bee molao wo wa go ingwadiša. Ka baka la’ng? Ka gobane se se dirile gore Jesu a belegelwe Betlelehema, e lego gagabo rakgolokhukhu wa gagwe Kgoši Dafida. E be e le kgale Mangwalo a boletše e sa le pele gore motse wo e tla ba motse woo Mmuši yo a holofeditšwego a tlago go belegelwa go wona.—Mika 5:2.

Ruri bjo ke bošego bjo bohlokwa! Kua ntle merakeng, seetša se phadimago se bonegela sehlopha sa badiši. Ke letago la Jehofa! Morongwa yo mongwe wa Modimo o botša badiši a re: “Se boifeng, gobane ke le tsebiša ditaba tše dibotse tša lethabo le legolo leo batho ka moka ba tlago go ba le lona, gobane lehono le belegetšwe Mophološi, yo e lego Kriste Morena, motseng wa Dafida. Se le tlago go bona ka sona se se: Le tla hwetša lesea le phuthetšwe ka mašela le letše legopong.” Gateetee, barongwa ba bangwe ba bantši ba iponagatša gomme ba re: “Letago a le ye go Modimo magodimodimong, lefaseng go be le khutšo bathong bao a ba amogelago.”—Luka 2:10-14.

Ge barongwa ba tloga, badiši ba a boledišana ba re: “A re yeng gona Betlelehema re yo bona se se diregilego seo Jehofa a re tsebišitšego sona.” (Luka 2:15) Ba hlaganela go ya gona gomme ba hwetša lesea Jesu gona moo morongwa a ba boditšego gore ba tla le hwetša gona. Ge badiši ba anega seo morongwa a ba boditšego sona, bohle bao ba kwago se ba a tlabega. Maria o tšeela godimo mantšu a ka moka gomme o itirela diphetho ka pelong ya gagwe.

Batho bantši lehono ba dumela gore Jesu o belegwe ka di-25 tša December. Eupša tikologong ya Betlelehema, ka December go na pula le gona go a tonya. Lehlwa le fela le ewa. Ka nako yeo ya ngwaga, badiši ba ka se be ka ntle merakeng bošego le mehlape ya bona. Le gona, go ka se direge gore mmušiši wa Roma o be a ka nyaka gore batho bao ba bego ba nyaka go mo hlanogela ba tšee leeto la matšatši garegare ga marega gore ba tlo ingwadiša. Go bonagala Jesu a belegwe nengneng ka October.