Nagana ka boemo bjo: Ge Julia a itebelela seiponeng, o bona go nona feela. O ipotša gore: “Ke swanetše go fokotša mmele wa ka,” gaešita le ge batswadi ba gagwe le bagwera ba mmotša gore ke yo mosesane bjalo ka lehlokwa.

Morago bjale, Julia o ile a nagana ka go šomiša mekgwa ye e lego kotsi gore a fokotše “bonyenyane dikhilograma tše pedi le seripa.” O ile a nagana ka go ipolaiša tlala matšatši a mmalwa . . .

Ge nkabe o be o ikwa go swana le Julia, o be o tla dira’ng?

Ga se phošo go tshwenyega ka gore o lebelelega bjang. Ge e le gabotse, Beibele e bolela gore banna le basadi ba bantšinyana, go akaretša Sara, Ragele, Abigaile, Josefa le Dafida e be e le ba babotse. Beibele e re mosadi yo a bitšwago Abishaga e be e le “yo mobotse kudu.”—1 Dikgoši 1:4.

Lega go le bjalo, bafsa ba bantši ba tshwenyega kudu ka gore ba lebelelega bjang. Seo se ka ba tlišetša mathata a magolo. Ela hloko mehlala ye e latelago:

• Nyakišišong e nngwe go ile gwa boledišanwa le banenyana ba itšego gomme ba diperesente tše 58 ba be ba bolela gore ba nonne, mola e le gore e be e le ba e ka bago diperesente tše 17 bao ba nonnego.

• Nyakišišong e nngwe go hweditšwe gore basadi ba e ka bago diperesente tše 45 bao ge e le gabotse ba bego ba otile ba be ba nagana gore ba nonne kudu!

• E le ge ba nyaka go fokotša mmele, bafsa ba bangwe ba feleletša ba swere ke bolwetši bja anorexia, e lego bolwetši bjo bo beago bophelo  kotsing bjo bo akaretšago go itima dijo.

Ge e ba o na le maswao a bolwetši bja anorexia goba mokgwa le ge e le ofe wa go se je gabotse, nyaka thušo. Thoma ka go ntšhetša motswadi wa gago sa mafahleng goba motho yo mongwe yo mogolo yo o mmotago. Beibele e re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.”—Diema 17:17.

Ge e le gabotse, ke motho wa ka gare yo a dirago gore motho a ratege goba a se ratege. Nagana ka Abesalomo morwa wa Kgoši Dafida. Beibele e re:

“Go be go se na monna yo botse bja gagwe bo bego bo retega kudu go swana le bja Abesalomo. O be a se na bosodi.”—2 Samuele 14:25.

Lega go le bjalo, lesogana le le be le ikgantšha, le rata maemo e bile e le moradia! Ka gona Beibele ga e bolele gabotse ka Abesalomo, e mo hlalosa e le monna yo a sa botegego ka tsela e feteletšego le yo a nago le lehloyo le lešoro.

Ke mo go kwagalago gore Beibele e re nee keletšo ye:

“Le apare semelo se sefsa.”—Bakolose 3:10.

“Go ikgabiša ga lena e se be ga ka ntle . . . , eupša e be ga motho wa sephiring wa pelo.”—1 Petro 3:3, 4.

Le ge e se phošo go nyaka go ba botse, sa bohlokwa kudu ke semelo sa gago. Ge nako e dutše e eya, dika tša gago tše dibotse di tla dira gore o ratege kudu go ba bangwe go feta go ba senatla goba go ba le letheka le lesesane! Ngwanenyana yo a bitšwago Phylicia o re: “Bobotse bo ka dira gore batho ba go bone ka pela, eupša batho ba tla gopola kudu seo o lego sona ka gare le dika tša gago tše dibotse.”

Na gantši o nyamišwa ke tsela yeo o lebelegago ka yona?

Na o kile wa nagana ka go dira ophareišene ya gore o be botse goba ka go itima dijo ka mo go feteletšego e le gore o lokiše karolo yeo e sa go kgahlego ya mmele wa gago?

Ke’ng seo o bego o ka se fetoša mo go wena ge o be o ka kgona? (Swaya tšeo o bego o ka di fetoša.)

• BOTELELE

• BOIMA BJA MMELE

• MORIRI

• SEBOPEGO SA MMELE

• SEFAHLEGO

• MMALA WA LETLALO

Ge e ba o arabile ka ee dipotšišong tše pedi tša mathomo gomme wa swaya dilo tše tharo goba go feta moo potšišong ya boraro, nagana ka se: Go na le kgonagalo e kgolo ya gore ba bangwe ga ba go bone o sa kgahliše go etša kamoo wena o iponago ka gona. Go bonolo go feteletša dilo gomme wa tshwenyega kudu ka tsela yeo o lebelegago ka yona.—1 Samuele 16:7.