GE KE be ke sa tšwa go kolobetšwa, bagolo ba ile ba mpotšiša ge eba nka rata go hlankela Jehofa ka mo go oketšegilego. Ka di-4 tša May 1992, ke ile ka ya sebokeng seo se kgethegilego seo se bego se rulaganyeditšwe bao ba bego ba nyaka go ya tlhokagalong. Nna le ngwanabo rena yo mongwe re ile ra hudugela boemakepeng bja Batumi, tikologong ya Ajaria.

Ke be ke tšhogile ge ke be ke thoma go boledišana le batho ka Beibele kua Batumi. Ke ile ka ipotšiša gore, ‘Ke swanetše go thoma bjang go boledišana le batho?’ Ke ile ka makatšwa ke tsela yeo mosadi wa mathomo yo ke boledišanego le yena a ilego a arabela ka yona. O ile a botšiša a thabile gore: “Le be le le kae nako ye ka moka?” O be a tloga a fela pelo ya go tseba mo go oketšegilego ka Dihlatse moo a ilego a thoma go ithuta Beibele le rena letšatšing le latelago!

Pele ga ge re ka ya Batumi, re ile ra hwetša diaterese tša batho bao ba bego ba thabela go ithuta Beibele. Ka ge re be re  sa tsebe motse woo gabotse, re be re botšiša batho setarateng gore ba re bontšhe tsela. Ka ge ditarata tša moo di be di sa tšwa go fetošwa maina, ba bantši ba be ba sa kgone go re thuša, eupša ba be ba kgahlegela molaetša wa rena. Go se go ye kae, re ile ra thoma go ithuta Beibele le dihlopha tša batho ba 10 go ya go ba 15.

Ka morago ga dikgwedi tše nne feela re le moo, batho ba fetago ba 40 ba be ba etla dibokeng ka mehla. Ka gona re ile re ipotšiša gore: ‘Batho ba ba tla hlokomelwa ke mang?’ Ka ge mašole a Georgia a be a elwa le sehlopha sa bao ba ikarolago kua Abkhazia, ditho ka moka tša phuthego yeo pele ke bego ke kopanela go yona di ile tša hudugela Batumi. Ka letšatši le tee feela, go ile gwa ba le phuthego e mpsha yeo e nago le babulamadibogo le bagolo bao ba nago le phihlelo!