1, 2. Nea e mengwe ya mehlala ya batho bao Jehofa a ilego a ba lebelela e le bagwera ba gagwe ba kgaufsi.

KE MOTHO wa mohuta ofe yo o ka mo kgethago gore e be mogwera wa gago? Ga go pelaelo gore o tla nyaka mogwera yoo wena le yena le nago le dipono, dikgahlego le ditekanyetšo tše di swanago. Le gona o tla gogelwa ke mogwera yo a nago le dika tše dibotse, tše bjalo ka potego le botho.

² Go theoša le histori, Modimo o kgethile batho ba itšego gore e be bagwera ba gagwe ba kgaufsi. Ka mohlala, Jehofa o ile a bitša Aborahama mogwera wa gagwe. (Jesaya 41:8; Jakobo 2:23) Modimo o ile a bolela ka Dafida e le ‘monna yo a kwanago le pelo ya gagwe’ ka gobane e be e le mohuta wa motho yoo Jehofa a mo ratago. (Ditiro 13:22) E bile Jehofa o ile a tšea Daniele e le “moratiwa.”—Daniele 9:23.

3. Ke ka baka la’ng Jehofa a kgetha batho ba itšego gore e be bagwera ba gagwe?

³ Ke ka baka la’ng Jehofa a ile a tšea Aborahama, Dafida le Daniele e le bagwera ba gagwe? O ile a botša Aborahama gore: “O kwele lentšu la-ka.” (Genesi 22:18) Ka gona Jehofa o batamela kgaufsi le bao ka boikokobetšo ba dirago seo a se kgopelago go bona. O ile a botša ba-Isiraele gore: “Kwang se ke se bolêlaxo, ké mo ke tl’o xo ba Modimo wa lena, ’me lena la  ba sethšaba sa-ka.” (Jeremia 7:23) Ge e ba o theetša Jehofa, le wena o ka ba mogwera wa gagwe!

4, 5. Jehofa o bontšha bjang matla a gagwe bakeng sa batho ba gagwe?

⁴ Nagana ka mehola ya go ba mogwera wa Modimo. Beibele e bolela gore Jehofa o tsoma dibaka tša gore a “bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Jehofa a ka bontšha bjang matla bakeng sa gago? Tsela e nngwe e bontšhitšwe go Psalme 32:8, moo re balago gore: “Ke [Jehofa] tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.”

⁵ A mantšu a kgomago kudu gakaakang a tlhokomelo ya Jehofa! O tla go nea tlhahlo ye e nyakegago gomme a go hlokomela ge o dutše o e diriša. Modimo o nyaka go go thuša gore o kgotlelele diteko tša gago ka katlego. (Psalme 55:22) Ka gona ge e ba o hlankela Jehofa ka pelo e feletšego, o ka kgodišega go swana le mopsalme yo a itšego: “Ke dula kè itebanya le Morêna, ó hleng xa-ka, nka se kê ka šutha.” (Psalme 16:8; 63:8) Ee, Jehofa a ka go thuša gore o phele ka tsela yeo e mo kgahlišago. Eupša ka ge o tseba, go na le lenaba la Modimo leo le ratago go go thibela gore o se ke wa dira se.

6. Tatofatšo ya Sathane malebana le batho e be e le efe?

⁶ Kgaolo 11 ya puku ye e hlalositše kamoo Sathane Diabolo a ilego a hlohla bogoši bja Modimo. Sathane o ile a latofatša Modimo ka maaka gomme a bolela gore Jehofa o be a sa bontšhe toka ka go se dumelele Adama le Efa go ikgethela seo se bego se nepagetše le seo se bego se fošagetše. Ka morago ga gore Adama le Efa ba senye gomme lefase le thome go tlala ka bana ba bona, Sathane o ile a belaela boikemišetšo bja batho ka moka. Sathane o ile a latofatša ka gore: “Batho ga ba hlankele Modimo ka gobane ba mo rata. Mphe sebaka, gomme ke tla dira gore motho yo mongwe le yo mongwe a go furalele.” Pego ya monna yo a bitšwago Jobo e bontšha gore se ke seo Sathane  a ilego a se dumela. Jobo e be e le mang, gomme o be a akaretšwa bjang tlhohlong ya Sathane?

7, 8. (a) Ke’ng seo se ilego sa dira Jobo gore e be wa moswana-noši gare ga batho ba nakong yeo? (b) Sathane o ile a belaela bjang boikemišetšo bja Jobo?

⁷ Jobo o phetše nywageng e ka bago 3 600 e fetilego. E be e le monna yo a lokilego, ka gobane Jehofa o ile a re: “Lefaseng ka moka xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.” (Jobo 1:8) Jobo o be a kgahla Modimo.

⁸ Sathane o ile a belaela boikemišetšo bja Jobo bja go hlankela Modimo. Diabolo o ile a botša Jehofa gore: “A xa se Wene O mo axeleditšexo ka lexora, yêna le ba lapá la xaxwe, le tšohle tše e lexo tša xaxwe thokô tše xo fêla? Medirô ya diatla tša xaxwe O e šexofaditše, diruô tša xaxwe tša tlala lefase. Byale, O k’O lekê xo iša letsôxô O kxwathê tšohle tše e lexo tša xaxwe, O bônê xe a tlo Xo hlala pepeneneng.”—Jobo 1:10, 11.

9. Jehofa o ile a arabela bjang tlhohlong ya Sathane, gomme ka baka la’ng?

⁹ Ka gona Sathane o ile a nganga ka gore Jobo o hlankela Modimo feela ka baka la mehola yeo a e hwetšago. Diabolo gape o ile a bolela gore ge e ba Jobo a be a ka lekwa, o be a tla furalela Modimo. Jehofa o ile a arabela bjang tlhohlong ya Sathane? Ka ge kgang e be e akaretša boikemišetšo bja Jobo, Jehofa o ile a dumelela Sathane gore a leke Jobo. Ka tsela ye, go rata ga Jobo Modimo—goba go hloka lerato leo—go be go tla bonagala gabotse.

10. Ke diteko dife tšeo di ilego tša wela Jobo, gomme o ile a arabela bjang?

¹⁰ Go se go ye kae Sathane o ile a thoma go leka Jobo ka ditsela tše di fapa-fapanego. Tše dingwe tša diruiwa tša Jobo di ile tša utswiwa, gomme tše dingwe tša bolawa. Bahlanka ba gagwe ba bantši ba ile ba bolawa. Se se ile sa tliša mathata a tša boiphedišo. Go ile gwa tšwelela masetla-pelo a oketšegilego ge bana ba Jobo ba lesome ba bolawa ke ledimo. Lega go le bjalo, go sa šetšwe ditiragalo tše tše šoro, “Jobo . . . xa a ka a senya a tsôta Modimo.”—Jobo 1:22.

11. (a) Ke tatofatšo efe ya bobedi yeo Sathane a ilego a e dira mabapi le Jobo, gomme Jehofa o ile a arabela bjang? (b) Jobo o ile a arabela bjang bolwetšing bja gagwe bjo bohloko?

 ¹¹ Sathane ga se a ka a hwa matwa. O swanetše go ba a ile a nagana gore le ge Jobo a be a ka kgotlelela go loba dilo tša gagwe, bahlanka le bana, o be a tla furalela Modimo ge a be a ka babja. Jehofa o ile a dumelela Sathane gore a hlasele Jobo ka bolwetši bjo bo šišimišago le bjo bohloko. Eupša gaešita le se ga se sa ka sa dira Jobo gore a lahlegelwe ke tumelo ya gagwe go Modimo. Go e na le moo, o ile a bolela a tiišitše gore: “Ke tlo hwa kè sešo ka re: Ke molato.”—Jobo 27:5.

12. Jobo o ile a arabela bjang tlhohlong ya Diabolo?

¹² Jobo o be a sa lemoge gore Sathane e be e le sebaki sa mathata a gagwe. A sa tsebe ditaba ka botlalo mabapi le tlhohlo ya Diabolo malebana le bogoši bja Jehofa, Jobo o be a tšhoga gore Modimo e be e le mothopo wa mathata a gagwe. (Jobo 6:4; 16:11-14) Go dutše go le bjalo, o ile a kgomarela potego ya gagwe go Jehofa. Le gona, tatofatšo ya Sathane ya gore Jobo o be a hlankela Modimo ka mabaka a boithati e ile ya hlatselwa e le ya maaka ke tsela ya Jobo ya potego!

13. Ke’ng seo se ilego sa direga e le ka gobane Jobo a be a botegela Modimo?

¹³ Go botega ga Jobo go ile gwa dumelela Jehofa gore a nee karabo e kwagalago kudu tlhohlong ya Sathane ya thogako. Jobo e be e le mogwera wa Jehofa e le ka kgonthe, gomme Modimo o ile a mo putsa ka baka la tsela ya gagwe ya potego.—Jobo 42:12-17.

14, 15. Ke ka baka la’ng re ka bolela gore tlhohlo ya Sathane yeo e akaretšago Jobo e šoma go batho ka moka?

¹⁴ Kgang ya go botegela Modimo yeo e ilego ya rotošwa ke Sathane e be e se ya lebišwa go Jobo feela. Le wena o a akaretšwa. Se se bontšhwa gabotse go Diema 27:11, moo Lentšu la Jehofa le rego: “Ngwan’a-ka! Hlalefa, O nthabiše pelo, ke tsebê se nkaxo fetola sôna xe ba nnyatša.” Mantšu a ao a ngwadilwego nywaga e makgolo ka morago ga lehu la Jobo, a bontšha gore Sathane o be a sa dutše a hlohla Modimo le go latofatša  bahlanka ba Gagwe. Ge re phela ka tsela yeo e kgahlišago Jehofa, ge e le gabotse re thuša go nea karabo ditatofatšong tša maaka tša Sathane, gomme ka tsela yeo re thabiša pelo ya Modimo. O ikwa bjang ka seo? Na e ka se be mo go kgahlišago go ba le karolo go arabeng ditatofatšo tša maaka tša Diabolo, gaešita le ge seo se bolela go dira diphetogo tše itšego bophelong bja gago?

¹⁵ Ela hloko gore Sathane o ile a re: “Motho tše a naxo natšô’ a ka di nthša tšohle xe a hlêkêlêla bophelô bya xaxwe.” (Jobo 2:4, mongwalo o sekamego ke wa rena.) Ka go bolela gore “motho,” Sathane o ile a bontšha gabotse gore tatofatšo ya gagwe e be e sa lebišwa go Jobo feela eupša e be e lebišitšwe go batho ka moka. Yeo ke ntlha e bohlokwa kudu. Sathane o ile a belaela potego ya gago ya go botegela Modimo. Diabolo o tla rata go go bona o sa kwe Modimo gomme o tlogela tsela ya go loka ge mathata a tšwelela. Sathane a ka leka bjang go dira se?

16. (a) Sathane o diriša mekgwa efe go leka go dira batho gore ba furalele Modimo? (b) Diabolo a ka diriša bjang mekgwa ye malebana le wena?

¹⁶ Ka ge go ahla-ahlilwe go Kgaolo 10, Sathane o diriša mekgwa e fapa-fapanego go leka go dira batho gore ba furalele Modimo. Ka lehlakoreng le lengwe, o hlasela “go swana le tau e rorago, a tsoma go metša yo mongwe.” (1 Petro 5:8) Ka gona tutuetšo ya Sathane e ka bonwa ge bagwera, ba leloko goba ba bangwe ba ganetša maiteko a gago a go ithuta Beibele le go diriša seo o ithutago sona. * (Johane 15:19, 20) Ka lehlakoreng le lengwe, Sathane “ka boyena o dula a itira morongwa wa seetša.” (2 Ba-Korinthe 11:14) Diabolo a ka diriša mekgwa e sa lemogegego go go fora le go go goketša gore o tlogele tsela ya go phela yeo e kgahlago Modimo. A ka diriša gape le go nolega moko, mohlomongwe a go dira gore o ikwe o sa swanelege ka mo go lekanego gore o ka kgahliša Modimo. (Diema 24:10) Go sa šetšwe gore Sathane o šoma bjalo ka “tau e rorago” goba  o itira “morongwa wa seetša,” tlhohlo ya gagwe e dula e le e swanago: O bolela gore ge o lebane le diteko o tla tlogela go hlankela Modimo. O ka arabela bjang tlhohlong ya gagwe gomme wa bontšha potego ya gago go Modimo go swana le ge Jobo a dirile?

17. Lebaka le legolo la go kwa ditaelo tša Jehofa ke lefe?

¹⁷ O ka araba tlhohlo ya Sathane ka go phela ka tsela yeo e kgahlišago Modimo. Se se akaretša’ng? Beibele e araba ka gore: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka matla a xaxo ka moka.” (Doiteronomio 6:5) Ge lerato la gago la go rata Modimo le gola, o tla tlala kganyogo ya go dira seo a se nyakago go wena. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe.” Ge e ba o rata Jehofa ka pelo ya gago ka moka, o tla hwetša gore “ditaelo tša gagwe ga di boima.”—1 Johane 5:3.

18, 19. (a) Ditaelo tše dingwe tša Jehofa ke dife? (Bona lepokisi go letlakala 122.) (b) Re tseba bjang gore Modimo ga a nyake mo gontši kudu go rena?

¹⁸ Ditaelo tša Jehofa ke dife? Tše dingwe tša tšona di akaretša boitshwaro bjoo re swanetšego go bo phema. Ka mohlala, ela hloko  lepokisi leo le lego go letlakala 122, leo le nago le sehlogo se se rego “Phema Seo Jehofa a se Hloilego.” Moo o tla hwetša go lokeleditšwe boitshwaro bjoo Beibele e bo ganago ka mo go feletšego. Ge o e gaša mahlo la mathomo, mekgwa e mengwe yeo e lokeleditšwego e ka bonagala e se e mebe gakaalo. Eupša ka morago ga go naganišiša ka mangwalo ao a bontšhitšwego, mo gongwe o tla bona bohlale bja melao ya Jehofa. Go dira diphetogo boitshwarong bja gago e ka ba tlhohlo e kgolo kudu yeo o kilego wa lebeletšana le yona. Lega go le bjalo, go phela ka tsela yeo e kgahlago Modimo go tliša kgotsofalo e kgolo le lethabo. (Jesaya 48:17, 18) E bile ke selo seo o ka se fihlelelago. Re tseba bjang seo?

¹⁹ Jehofa le ka mohla ga a nyake mo gontši kudu go rena go feta kamoo re ka kgonago. (Doiteronomio 30:11-14) O tseba  bokgoni bja rena le mafokodi a rena go feta kamoo rena re tsebago. (Psalme 103:14) Go feta moo, Jehofa a ka re nea matla e le gore re mo kwe. Moapostola Paulo o ngwadile gore: “Modimo o a botega, gomme a ka se le lese le lekwa go feta kamoo le ka kgonago go kgotlelela ka gona, eupša gotee le moleko o tla ba a bula tsela ya go tšwa e le gore le kgone go o kgotlelela.” (1 Ba-Korinthe 10:13) Go go thuša gore o kgotlelele, Jehofa e bile a ka go nea “matla a fetago a tlwaelegilego.” (2 Ba-Korinthe 4:7) Ka morago ga go kgotlelela diteko tše dintši, Paulo o ile a kgona go bolela gore: “Dilong tšohle ke na le matla ka baka la yo a mphago matla.”—Ba-Filipi 4:13.

20. Ke dika dife tšeo Modimo a di ratago tšeo o swanetšego go di hlagolela, gomme ke ka baka la’ng tše di le bohlokwa?

²⁰ Ee, go na le mo gontši mo go akaretšwago tabeng ya go kgahliša Jehofa go feta go phema dilo tšeo a di hloilego. O swanetše gore gape o rate seo a se ratago. (Ba-Roma 12:9) Na ga o ikwe o gogelwa go bao ba nago le dipono, dikgahlego le ditekanyetšo tše di swanago le tša gago? Jehofa le yena o ikwa bjalo. Ka gona ithute go rata dilo tšeo Jehofa a di ratago. Tše dingwe tša dilo tše go bolelwa ka tšona go Psalme 15:1-5, moo  re balago ka bao Modimo a ba tšeago e le bagwera ba gagwe. Bagwera ba Jehofa ba bontšha dilo tšeo Beibele e di bitšago “dienywa tša moya.” Di akaretša dika tše di swanago le “lerato, lethabo, khutšo, bopelotelele, botho, bolo, tumelo, boleta, boitshwaro.”—Ba-Galatia 5:22, 23.

21. Ke’ng seo se tlago go go thuša gore o hlagolele dika tšeo Modimo a di ratago?

²¹ Go bala le go ithuta Beibele ka mehla go tla go thuša gore o hlagolele dika tšeo Modimo a di ratago. Le gona go ithuta seo Modimo a se nyakago go tla go thuša gore o dumelelanye dikgopolo tša gago le tsela ya Modimo ya go nagana. (Jesaya 30:20, 21) Ge o dutše o matlafatša kudu lerato la gago go Jehofa, ke moo kganyogo ya gago ya go phela ka tsela yeo e kgahlago Modimo e tlago go gola.

22. Ke’ng seo o tlago go se fihlelela ge e ba o phela ka tsela yeo e kgahlago Modimo?

²² Go phela ka tsela yeo e kgahlago Jehofa go nyaka maiteko. Beibele e swantšha go fetoša bophelo bja gago le go apola semelo sa kgale gomme wa ikapeša se sefsa. (Ba-Kolose 3:9, 10) Eupša ge e le mabapi le ditaelo tša Jehofa, mopsalme o ngwadile gore: “Ka xo hlôkômêla tšôna ó bôna moputsô-moxolo.” (Psalme 19:11) Le wena o tla hwetša gore go phela ka tsela yeo e kgahlago Modimo go na le meputso e megolo. Ka go dira bjalo, o tla nea karabo tlhohlong ya Sathane gomme o thabiše pelo ya Jehofa!