Acts 17:1-34
17 Amfípolis índa Apolóniya kin haalʼáá góneʼ chʼíjíkaigo Thesalonáíka kin haalʼáadi jíkai, ákwii Jew dineʼé bikin biiʼ áłah náʼádleehí hólǫ́ǫ́ lá.
2 Áko Paul, tʼáá átʼı̨́ı̨́ łehígi átʼéego hoł yah ííyáago, táadi hááʼáyı̨́ı̨́h jı̨́ azlı̨́ʼígíí biyiʼ Diyin God bizaad bee akʼedaʼashchínígíí hoł yeinístʼįįd.
3 Christ nilíinii tiʼhoozniiʼgo daaztsą́ą́dę́ę́ʼ náádiidzáhígíí, éí tʼáá ákónéehee ádzaago hazhóʼó bee bił hojilneʼgo bééhózingo ádajileʼ, áko ábijiní, Díí Jesus, bee nihił hweeshneʼígíí, éí Christ átʼı̨́.
4 Áko diné łaʼ bíniʼ daazlı̨́įʼgo Paul áádóó Sáílas yihidiikai; Gríik dineʼé dahodísinígíí tʼóó ahayóí índa sáanii alááh dahideezíinii ałdóʼ doo tʼáá díkwíltʼéhí da.
5 Nidi Jew dineʼé [doo daʼoodlánígíí] daʼoołchʼı̨́įdgo, diné nichxǫ́ʼógo nidaakaígíí łaʼ áłah ádayiilaago, kin haalʼáagi tʼáá átʼéé nítʼééʼ hadahoneeshchaad, áádóó Jéísan bighan yaa tiih yíjéeʼgo Paul áádóó Sáílas éí diné yílʼáhígíí bichʼįʼ chʼídahodiitʼish danízingo chʼééh ádáátʼįįd.
6 Áko chʼééh hadahoneeztą́ąʼgo Jéísan áádóó ałkʼisóó danilíinii kin haalʼáagi naatʼáanii yaa dayiizdzı̨́įzgo hadadeeshghaazhgo ádaaní, Díí diné éí tʼáá ałtsogóó diné yił hadahoneeshchaadígíí tʼáá éí níʼáazhgo,
7 Jéísan yaʼałkʼee sikéé lá. Éí diné tʼáá ałtso Síízar yee hasʼáanii doo yikʼeh ádaatʼéégóó, Náánáłaʼ aláahgo naatʼáanii nááhódlǫ́ éí Jesus, daaní.
8 Áko diné tʼáá átʼé índa kin haalʼáhígi naatʼáanii danilíinii díidíígíí deidiiztsʼą́ąʼgo doo bił ákódaadzaa da.
9 Áko Jéísan áádóó náádaałaʼígíí ákʼé ninádayiisdlaʼígíí nídeidiinilgo índa hwéédeideezhchid.
Daalʼaadii Beríyadi naakai
10 Tʼáá áko ałkʼisóó danilíinii Paul índa Sáílas éí tłʼéeʼgo Beríyagóó adeisʼaʼ; ákweʼé níʼáazhgo Jew dineʼé bikin biiʼ áłah náʼádleehí góneʼ yah ííʼáázh.
11 Jew dineʼé ákweʼé kéédahatʼínígíí Thesalonáíkadi kéédahatʼíinii yiláahdi átʼéego yáʼátʼéehgo nitsídaakees, háálá yídaneedlı̨́įgo haneʼ yáʼátʼéehii nídeidiilá, áko Paul yee naʼnitinígíí daatsʼí tʼáá aaníí danízingo tʼáá ákwíí jı̨́ Diyin God bizaad bee akʼedaʼashchínígíí nideiłkaahgo dayółtaʼ.
12 Éí bąą ląʼí daʼoosdląąd. Gríik dineʼé danilínígíí, hastóí índa sáanii ił danilíinii tʼóó ahayóí daʼoosdląąd.
13 Ákondi Jew dineʼé Thesalonáíkadi kéédahatʼíinii, Beríyadi Paul ałdóʼ Diyin God bizaad yaa nahalneʼígíí dayííniiʼgo, áajįʼ yaa dahaaskaigo áłah ílíinii yił hadahoneeshchaadgo yádahóółchįįd.
14 Áko tʼáá áko ałkʼisóó danilíinii tónteel bichʼįʼgo Paul adeisʼaʼ, nidi Sáílas índa Timothy tʼéiyá tʼáá ákwii siké.
15 Paul yił dah diikaígíí Áthenz hoolyéedi yił yíkai, áko éí dah nídiikáahgo ábizhdííniid, Áádę́ę́ʼ Sáílas índa Timothy tsʼídá tsı̨́įłgo shaa doohʼash nihijiní, shá bididoohniił.
Áthenzgi Paul naaghá
16 Ákohgo Áthenzgi Paul éí Sáílas índa Timothy bibaʼ dzizdáago, éí kin haalʼáagi tʼáá átʼéé nítʼééʼ edaʼalyaii bichʼįʼ nidahadláá lágo jiiłtsą́ągo doo hoł ákótʼéégóó hwiiʼ sizíinii nayiisnááʼ.
17 Áko kin biiʼ áłah náʼádleehí biyiʼ góneʼ Jew dineʼé índa diné dahodísinii bił baa nídajitʼı̨́, áádóó tʼáá ákwíí jı̨́ nidaʼiiniih bá hazʼą́ągi nidahakáhígíí ałdóʼ bił baa nídajitʼı̨́.
18 Bee hódzáanii hádaatʼíinii łaʼ Epikuríyan danilínígíí índa łaʼ Stówik* danilínígíí ałdóʼ haa haaskaigo hoł ałghaʼdaditʼááh. Áko łaʼ ádaaní, Díí haʼdiłchʼałí lá, haʼátʼíí níí lá? Náádaałaʼ ádaaní, Haʼátʼíí shı̨́ı̨́ dadiyin doo béédahózin da léiʼ yaa halneʼgi átʼé? Háálá Jesus índa aninéédę́ę́ʼ náádiʼdoojahgi yaa nahalneʼ.
19 Áko dahasiłgo Ariyápagasdi* hastóí áłah silı̨́ʼígi kódaaníigo hoł yíkai, Díí naʼnitin ániidíii bee naʼnítinígíí daatsʼí nihił bééhodíísįįł?
20 Háálá haʼátʼíí shı̨́ı̨́ doo bééhózin da léiʼ baa hólneʼgo dasidiitsʼą́ą́ʼ, éí bąą éidí nihił béédahodoozįįł.
21 (Háálá Áthenzgi kéédahatʼíinii áádóó ákwii nidahakáhígíí tʼáá ałtso tʼáá hazhóʼó haneʼ ániidí danilíinii tʼéí yaa dahalneʼgo áádóó deidiitsʼaʼgo hoolzhish.)
22 Áko Ariyápagasdi hastóí áłah silı̨́ʼígíí ałníiʼgi Paul yiizįʼgo haadzííʼ, Áthenzgi kéédahohtʼíinii, tʼáá ałtsojįʼ tʼáá íiyisí dahodíínóhsin lágo nihá baa ákoniizı̨́ı̨́ʼ.
23 Háálá aadę́ę́ʼ yisháałgo edaʼalyaii bichʼįʼ nidahohłáhígíí yiiłtsą́, áádóó bikááʼ nááʼiiniihí łaʼ, Diyin doo bééhózinii bichʼįʼ, níigo bikááʼ bee akʼeʼashchı̨́įgo yiiłtsą́. Áko doo hwéédahonohsingóó hachʼįʼ nidahohłáhígíí, éí bee nihił hashneʼ.
24 Diyin God éí nahasdzáán índa tʼáá ałtsoní bikáaʼgi dahólóonii áyiilaii, éí yádiłhił índa nahasdzáán bee bóhólníihgo, kin biiʼ sohodizin yílá bee ádaalyaii doo yiiʼ hólǫ́ǫ da,
25 tʼáadoo leʼé nidi doo yídin nilı̨́į da, diné nidi doo bíká oolyeed átʼée da, háálá tʼáá bí, iiná áádóó bee níʼdídzihii índa tʼáá ałtsoní diné tʼáá ałtso yeidiiʼaah.
26 Áko diné tʼááłáʼí bidił bitsʼą́ą́dóó ałʼąą dineʼé tʼáá ałtso nahasdzáán bikáaʼgi tʼáá átʼéé nítʼééʼ kéédahatʼı̨́į dooleeł biniyé áyiilaa, áádóó hoolzhishii biyiʼ dahináa dooleełígíí, índa kéédahatʼı̨́į dooleełgóó tʼáá átséedi yee nihoníʼą́.
27 Éí Diyin God hadeintáago tʼah nítʼéeʼda haa ákodaniizįįhgo hakʼídaakah łeh nízingo ákótʼéego áyiilaa. Azhą́ tʼááłáʼí niitínígo nihitsʼą́ądi doo nízaadi hojílǫ́ǫ da nidi,
28 háálá hwee dahiniiʼná, áádóó nidahiiʼná, índa dahoniidlǫ́. Tʼáá nihí nihitahdóó saad nideichʼąąhii ádadííniid yę́ęgi átʼéego, Háálá nihí tʼáá aaníí haʼáłchíní daniidlı̨́.
29 Diyin God baʼałchíní daniidlı̨́įgo, eʼelyaii óola áádóó béésh łigaii índa tséda diné tʼóó yaa nitsídaazkéezgo dayiichįįhgo ádayiilaa nidi, éí Diyin God nahalin daniidzingo doo bohónéedzą́ą da.
30 Díidíígíí diné doo yaa ákodanízindą́ą́ʼ Diyin God doo bá yił ííłtaʼ da, nidi kʼad tʼáá ałtsogóó diné tʼáá ádzíłtso yee há hasʼą́ągo áháłní, Łahgo átʼéego tsíńdahidohkeesgo shichʼįʼ ádił nidaʼayoołzíiʼii bitsʼáhóhkááh.
31 Háálá diné niiníłtíinii łaʼa jı̨́ nihokááʼ dineʼé tsʼídá tʼáá ákogi átʼéego yaa nídóotʼįįłgo yee nihoníʼą́. Éí daaztsą́ą́dę́ę́ʼ néidiisáhígíí bee tʼáá aaníí ákóhodooníiłgo diné tʼáá ałtso bił nibéédahwiizįįhgo áyiilaa.
32 Áko daʼaztsą́ą́dę́ę́ʼ nááʼdiijeeh haʼníigo haʼoodzíʼígíí deidiiztsʼą́ąʼgo, łaʼ tʼóó yá nidahałtʼiʼ, nidi náádaałaʼ éí, Náádanididiitsʼı̨́ı̨́ł, dadííniid.
33 Áko Paul hatsʼą́ą́ʼ dah diiyá.
34 Nidi diné łaʼ daʼoosdląądgo hodiikai, éí bitahgi Daiyaníshiyas éí Ariyápagasdi hastóí ándahaʼáhígíí łaʼ nilı̨́įgo áádóó asdzání łaʼ Dámaris yolyéhígíí índa náádaałaʼ ałdóʼ hoł daʼoosdląąd.
Footnotes
^ Gríik dineʼé bitahgi naaki dah ooldah éí iiná ałʼąą átʼéego yaa nitsídaakees.
^ Kin haalʼáagi Áthenz dah yiskʼid Marz hoolyéegi iiná átʼéegi yee nidaʼnitinii áłah nádleehgi áhoolyé.
