Proverbs 13:1-25
13 Ayeʼ hóyáanii bizhéʼé yínabiniłtinii yiyíistsʼą́ą́ʼ, nidi diné ánahałtʼiʼii éí bichʼahojishkéego doo yiyíistsʼą́ąʼ da.
2 Diné yáʼátʼéehgo yáłtiʼii éí yáʼátʼéehii yiyą́ą doo, nidi diné ninádaʼdiiʼaahii éí doo atsʼííd dabijíłkiin doo.
3 Tʼáá háiida bizaad yaa áhályą́ągo yáłtiʼii éí hináa dooleeł, nidi diné tʼáá ádzaagóó yádíłtihii yee átíʼádiilʼįįh.
4 Bił hóyéeʼii biiʼ sizíinii tʼáadoo leʼé yídin nilíinii doo bee haleeh da, nidi diné haleeyee átʼíinii biiʼ sizíinii bá yáʼátʼéehgo áhooníił doo.
5 Diné tʼáá ákogi átʼéii woochʼííd yijoołxá, nidi diné doo yáʼáshóonii éí nádı̨́ʼídi tʼóó haaʼih, áádóó tʼóó haa yánáhásįįh.
6 Diné tʼáá ákogi átʼéego joogáałii éí tʼáá ákogi ájítʼínígíí haa áhályą́, nidi diné ádił niʼiisíihii éí doo yáʼáshóonii hakʼeh didleeh.
7 Diné atʼı̨́ áʼdílʼíinii hólǫ́, nidi tʼáadoo bee hólóní da, áádóó diné baa hojoobáʼí áʼdílʼíinii hólǫ́, nidi tʼáá íiyisí bidziilgo dah ooléeł łeh.
8 Diné biyódí yee hináanii áchʼą́ą́h neilyé, nidi diné baa hojoobáʼígíí tʼáadoo bizééʼ yidóʼáłí da.
9 Diné tʼáá ákogi átʼéii nizhónígo adinídínígíí nahalin, nidi diné doo yáʼáshóonii bee hoolʼiní neeztsizii nahalin.
10 Ádaa haʼniih bee ahinídiiltłáád tʼéí nihwiileeh, nidi kótʼé dabidiʼníigo dayíistsʼą́ąʼii éí hódzą́ átʼé.
11 Jitʼíinii tʼáadoo bikʼénaʼazhnishí shóoztʼeʼii tʼáá áko ábiʼniidįįh, nidi diné naalnishgo áłah éʼéléehii éí tʼah yówehgo bá bilááh yileeh.
12 Bíká hoł chohooʼíinii doo hah ánééhgóó hajéí bąąh nahodookał, nidi laanaa jinízinii haleehgo éí iiná tsin sikaadii átʼé.
13 Tʼáá háiida saad bee hódzą́ yiyííʼįįdígíí éí atíhodiʼdoolnííł, nidi bikʼeh óʼooʼníiłii yidísinígíí bichʼįʼ niʼdoolyééł.
14 Diné hóyáanii yee hasʼáanii éí iiná háálíinii átʼé, áko éí anoonééł biloh bitsʼą́ąjįʼ dashdidoogááł.
15 Yáʼátʼéehgo akʼiʼdaʼdiitįįhii bichʼohaʼneeh, nidi ninádaʼdiiʼaahgo dahináanii éí bá nahontłʼah.
16 Diné dahóyáanii tʼááłáʼí nítínígo bił bééhózinígíí yaa nidaakai, nidi diné doo áhályáanii bidoo áháyąʼ bééhózínígo ádeileʼ.
17 Diné doo yáʼáshóonii haneʼ neiʼáii doo yáʼátʼéehii yiih yilwoʼ, nidi baʼahódlíigo naalʼaʼí éí hadaałtʼé ánáʼoodlííł.
18 Diné hashtʼeʼnináhodiʼdoodlóosgo doo dziniizı̨́įʼii éí haa hojoobáʼí áádóó tʼóó haa yáhásin doo, nidi hodidooteh hoł nilíinii éí diné bichʼįʼ ajílı̨́įgo áhoʼdiilyaa doo.
19 Laanaa hwiindzinii bohoolʼįįhgo éí ayiʼ sizíinii bił bikʼeʼahwiih, nidi diné doo ádahalyáanii éí doo yáʼáshóonii bitsʼáʼdoodááł doo deíłdin da.
20 Diné dahóyáanii bił jookahii éí hojíyą́ą doo, nidi diné doo ádahalyáanii béézhdiilwoʼii bikʼee tiʼnáhwiizhdooʼnih.
21 Ádił nidaʼjiisíihii doo yáʼáshóonii shódahwiidoołtʼeeł biniyé nidahoniłché, nidi diné tʼáá ákogi ádaatʼéii éí yáʼátʼéehii bichʼįʼ ninádahidoolyééł.
22 Diné yáʼátʼéehii binálíké bííʼ dadooleełii yá atsʼéidiʼááh, áádóó diné ádił nidaʼiisíihii binaalyeʼé dah yootʼįįłígíí diné tʼáá ákogi ádaaníiłii bá hashtʼeʼniiʼnił.
23 Kédaayah índa bikááʼ kʼiʼdoolyáago ákwii badahojoobáʼígíí chʼiyáán tʼóó ahayóí bá hólǫ́ǫ łeh, nidi doo ákwii áhooníiłii biniinaa hatsʼą́ą́ʼ nidahachǫǫh.
24 Habee atsxis áádzísįįdii éí hayeʼ jijoołxá, nidi hayeʼ ayóóʼájóʼníinii éí nínázníłtsxis doo.
25 Diné tʼáá ákogi átʼéii hwiih yileehjįʼ ayą́, nidi diné doo yáʼáshóonii bibid dichin nilı̨́į łeh.
